TITUS
White Yajur-Veda: Vajasaneyi-Samhita (Madhyandina)
Part No. 26
Previous part

Paragraph: 26 

Verse: 1 
Sentence: a    अ॒ग्निश्च॑ पृथि॒वी च॒ संन॑ते॒ ते मे॒ सं न॑मताम॒दः ।
Sentence: b    वा॒युश्चा॒न्तरि॑क्षं च॒ संन॑ते॒ ते मे॒ सं न॑मताम॒दः ।
Sentence: c    आ॑दि॒त्यश्च द्यौश्च॒ संन॑ते॒ ते मे॒ सं न॑मताम॒दः ।
Sentence: d    आप॑श्च॒ वरु॑णश्च॒ संन॑ते॒ ते मे॒ सं न॑मताम॒दः ।
Sentence: e    स॒प्त सँ॒सदो॑ अष्ट॒मी भू॑त॒साध॑नी ।
Sentence: f    सका॑माँ॒ अध्व॑नस्कुरु सं॒ज्ञान॑मस्तु मे॒ मुना॑ ।।

Verse: 2 
Sentence: a    यथे॒मां वाचं॑ कल्या॒णीमा॒वदा॑नि॒ जने॑भ्यः ।
Sentence: b    ब्र॑ह्मराज॒न्या॑भ्याँ शू॒द्राय॒ चार्या॑य च॒ स्वाय॒ चार॑णाय ।
Sentence: c    प्रि॒यो दे॒वानां॒ दक्षि॑णायै दा॒तुरि॒ह भू॑यासम॒यं मे॒ कामः॒ समृ॑ध्यता॒मुप॑ मा॒दो न॑मतु ।।

Verse: 3 
Sentence: a    बृह॑स्पते॒ अति॒ यद॒र्यो अर्हा॑द्द्यु॒मद्वि॒भाति॒ क्रतु॑म॒ज्जने॑षु ।
Sentence: b    यद्दी॒दय॒च्छव॑स ऋतप्रजात॒ तद॒स्मासु॒ द्रवि॑णं धेहि चि॒त्रम् ।
Sentence: c    उ॑पया॒मगृ॑हीतो सि॒ बृह॒स्पत॑ये त्वा ।
Sentence: d    ए॒ष ते॒ योनि॒र्बृह॒स्पत॑ये त्वा ।।

Verse: 4 
Sentence: a    इन्द्र॒ गोम॑न्नि॒हा या॑हि॒ पिबा॒ सोमँ॑ शतक्रतो ।
Sentence: b    वि॒द्यद्भि॒र्ग्राव॑भिः सु॒तम् ।
Sentence: c    उ॑पया॒मगृ॑हीतो॒ सीन्द्रा॑य त्वा॒ गोम॑ते ।
Sentence: d    ए॒ष ते॒ योनि॒रिन्द्रा॑य त्वा॒ गोम॑ते ।।

Verse: 5 
Sentence: a    इन्द्रा या॑हि वृत्रह॒न्पिबा॒ सोमँ॑ शतक्रतो ।
Sentence: b    गोम॑द्भि॒र्ग्राव॑भिः सु॒तम् ।
Sentence: c    उ॑पया॒मगृ॑हीतो॒ सीन्द्रा॑य त्वा॒ गोम॑ते ।
Sentence: d    ए॒ष ते॒ योनि॒रिन्द्रा॑य त्वा॒ गोम॑ते ।।

Verse: 6 
Sentence: a    ऋ॒तावा॑नं वैश्वान॒रमृ॒तस्य॒ ज्योति॑ष॒स्पति॑म् ।
Sentence: b    अज॑स्रं घ॒र्ममी॑महे ।
Sentence: c    उ॑पया॒मगृ॑हीतो सि वैश्वानराय त्वा ।
Sentence: d    ए॒ष ते॒ योनि॑र्वैश्वानराय त्वा ।।

Verse: 7 
Sentence: a    वै॑श्वान॒रस्य॑ सुमतौ स्याम॒ राजा॒ हि कं॒ भुव॑नानामभि॒श्रीः ।
Sentence: b    इ॒तो जा॒तो विश्व॑मि॒दं वि च॑ष्टे वैश्वान॒रो य॑तते॒ सूर्ये॑ण ।
Sentence: c    उ॑पया॒मगृ॑हीतो सि वैश्वानराय त्वा ।
Sentence: d    ए॒ष ते॒ योनि॑र्वैश्वानराय त्वा ।।

Verse: 8 
Sentence: a    वै॑श्वान॒रो न ऊ॒तय॒ आ प्र या॑तु परा॒वतः॑ ।
Sentence: b    अ॒ग्निरु॒क्थेन॒ वाह॑सा ।
Sentence: c    उ॑पया॒मगृ॑हीतो सि वैश्वानराय त्वा ।
Sentence: d    ए॒ष ते॒ योनि॑र्वैश्वानराय त्वा ।।

Verse: 9 
Sentence: a    अ॒ग्निरृषिः॒ पव॑मानः॒ पाञ्च॑जन्यः पु॒रोहि॑तः ।
Sentence: b    तमी॑महे महाग॒यम् ।
Sentence: c    उ॑पया॒मगृ॑हीतो स्य॒ग्नये॑ त्वा॒ वर्च॑से ।
Sentence: d    ए॒ष ते॒ योनि॑र॒ग्नये॑ त्वा॒ वर्च॑से ।।

Verse: 10 
Sentence: a    म॒हाँ इन्द्रो॒ वज्र॑हस्तः षोड॒शी शर्म॑ यच्छतु ।
Sentence: b    हन्तु॑ पा॒प्मानं॒ यो॒ स्मान्द्वेष्टि॑ ।
Sentence: c    उ॑पया॒मगृ॑हीतो सि महे॒न्द्राय॑ त्वा ।
Sentence: d    ए॒ष ते॒ योनि॑र्महे॒न्द्राय॑ त्वा ।।

Verse: 11 
Sentence: a    तं वो॑ द॒स्ममृ॑ती॒षहं॒ वसो॑र्मन्दा॒नमन्ध॑सः ।
Sentence: b    अ॒भि व॒त्सं न स्वस॑रेषु धे॒नव॒ इन्द्रं॑ गी॒र्भिर्न॑वामहे ।।

Verse: 12 
Sentence: a    यद्वाहि॑ष्ठं॒ तद॒ग्नये॑ बृ॒हद॑र्च विभावसो ।
Sentence: b    महि॑षीव॒ त्वद्र॒यिस्त्वद्वाजा॒ उदी॑रते ।।

Verse: 13 
Sentence: a    एह्यू॒ षु ब्रवा॑णि॒ ते ग्न॑ इ॒त्थेत॑रा॒ गिरः॑ ।
Sentence: b    ए॒भिर्व॑र्धास॒ इन्दु॑भिः ।।

Verse: 14 
Sentence: a    ऋ॒तव॑स्ते य॒ज्ञं वि त॑न्वन्तु॒ मासा॒ रक्ष॑न्तु ते॒ हविः॑ ।
Sentence: b    सं॑वत्स॒रस्ते॑ य॒ज्ञं द॑धातु नः प्र॒जां च॒ परि॑ पातु नः ।।

Verse: 15 
Sentence: a    उ॑पह्व॒रे गि॑री॒णाँ सं॑ग॒मे च॑ नदी॒नाम् ।
Sentence: b    धि॒या विप्रो॑ अजायत ।।

Verse: 16 
Sentence: a    उ॒च्चा ते॑ जा॒तमन्ध॑सो दि॒वि सद्भूम्या द॑दे ।
Sentence: b    उ॒ग्रँ शर्म॒ महि॒ श्रवः॑ ।।

Verse: 17 
Sentence: a    स न॒ इन्द्रा॑य॒ यज्य॑वे॒ वरु॑णाय म॒रुद्भ्यः॑ ।
Sentence: b    व॑रिवो॒वित्परि॑ स्रव ।।

Verse: 18 
Sentence: a    ए॒ना विश्वा॑न्य॒र्य आ द्यु॒म्नानि॒ मानु॑षाणाम् ।
Sentence: b    सिषा॑सन्तो वनामहे ।।

Verse: 19 
Sentence: a    अनु॑ वीरै॒रनु॑ पुष्यास्म॒ गोभि॒रन्वश्वै॒रनु॒ सर्वे॑ण पुष्टैः ।
Sentence: b    अनु॒ द्विप॒दानु॒ चतु॑ष्पदा व॒यं दे॒वा नो॑ य॒ज्ञमृ॑तु॒था न॑यन्तु ।।

Verse: 20 
Sentence: a    अग्ने॒ पत्नी॑रि॒हा व॑ह दे॒वाना॑मुश॒तीरुप॑ ।
Sentence: b    त्वष्टा॑रँ॒ सोम॑पीतये ।।

Verse: 21 
Sentence: a    अ॒भि य॒ज्ञं गृ॑णीहि नो॒ ग्नावो॒ नेष्टः॒ पिब॑ ऋ॒तुना॑ ।
Sentence: b    त्वँ हि र॑त्न॒धा असि॑ ।।

Verse: 22 
Sentence: a    द्र॑विणो॒दाः पि॑पीषति जु॒होत॒ प्र च॑ तिष्ठत ।
Sentence: b    ने॒ष्ट्रादृ॒तुभि॑रिष्यत ।।

Verse: 23 
Sentence: a    तवा॒यँ सोम॒स्त्वमेह्य॒र्वाङ्छ॑श्वत्त॒मँ सु॒मना॑ अ॒स्य पा॑हि ।
Sentence: b    अ॒स्मिन्य॒ज्ञे ब॒र्हिष्या नि॒षद्या॑ दधि॒ष्वेमं ज॒ठर॒ इन्दु॑मिन्द्र ।।

Verse: 24 
Sentence: a    अ॒मेव॑ नः सुहवा॒ आ हि गन्त॑न॒ नि ब॒र्हिषि॑ सदतना॒ रणि॑ष्टन ।
Sentence: b    अथा॑ मन्दस्व जुजुषा॒णो अन्ध॑स॒स्त्वष्ट॑र्दे॒वेभि॒र्जनि॑भिः सु॒मद्ग॑णः ।।

Verse: 25 
Sentence: a    स्वादि॑ष्ठया॒ मदि॑ष्ठया॒ पव॑स्व सोम॒ धार॑या ।
Sentence: b    इन्द्रा॑य॒ पात॑वे सु॒तः ।।

Verse: 26 
Sentence: a    र॑क्षो॒हा वि॒श्वच॑र्षणिर॒भि योनि॒मयो॑हतम् ।
Sentence: b    द्रुणा॑ स॒धस्थ॒मास॑दत् ।।


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.