TITUS
White Yajur-Veda: Vajasaneyi-Samhita (Madhyandina)
Part No. 27
Previous part

Paragraph: 27 
Verse: 1 
Sentence: a    सा॑स्त्वाग्न ऋ॒तवो॑ वर्धयन्तु संवत्स॒रा ऋष॑यो॒ यानि॑ स॒त्या ।
Sentence: b    सं दि॒व्येन॑ दीदिहि रोच॒नेन॒ विश्वा॒ आ भा॑हि प्र॒दिश॒श्चत॑स्रः ।।

Verse: 2 
Sentence: a    सं चे॒ध्यस्वा॑ग्ने॒ प्र च॑ बोधयैन॒मुच्च॑ तिष्ठ मह॒ते सौ॑भगाय ।
Sentence: b    मा च॑ रिषदुपस॒त्ता ते॑ अग्ने ब्र॒ह्माण॑स्ते य॒शसः॑ सन्तु॒ मान्ये ।।

Verse: 3 
Sentence: a    त्वाम॑ग्ने वृणते ब्राह्म॒णा इ॒मे शि॒वो अ॑ग्ने सं॒वर॑णे भवा नः ।
Sentence: b    स॑पत्न॒हा नो॑ अभिमाति॒जिच्च॒ स्वे गये॑ गागृ॒ह्यप्र॑युच्छन् ।।

Verse: 4 
Sentence: a    इहै॒वाग्ने॒ अधि॑ धारया र॒यिं मा त्वा॒ नि क्र॑न्पूर्व॒चितो॑ निका॒रिणः॑ ।
Sentence: b    क्ष॒त्रम॑ग्ने सु॒यम॑मस्तु॒ तुभ्य॑मुपस॒त्ता व॑र्धतां ते॒ अनि॑ष्टृतः ।।

Verse: 5 
Sentence: a    क्ष॒त्रेणा॑ग्ने॒ स्वायुः॒ सँ र॑भस्व मि॒त्रेणा॑ग्ने मित्र॒धेये॑ यतस्व ।
Sentence: b    स॑जा॒तानां॑ मध्यम॒स्था ए॑धि॒ राज्ञा॑मग्ने विह॒व्यो॑ दीदिही॒ह ।।

Verse: 6 
Sentence: a    अति॒ निहो॒ अति॒ स्रिधो त्यचि॑त्ति॒मत्यरा॑तिमग्ने ।
Sentence: b    विश्वा॒ ह्य॑ग्ने दुरि॒ता स॑ह॒स्वाथा॒स्मभ्यँ॑ स॒हवी॑राँ र॒यिं दाः॑ ।।

Verse: 7 
Sentence: a    अ॑नाधृ॒ष्यो जा॒तवे॑दा॒ अना॑धृष्टो वि॒राडग्ने॑ क्षत्र॒भृद्दी॑दिही॒ह ।
Sentence: b    विश्वा॒ आशाः॑ प्रमु॒ञ्चन्मानु॑षीर्भ॒यः शि॒वेभि॑र॒द्य परि॑ पाहि नो वृ॒धे ।।

Verse: 8 
Sentence: a    बृह॑स्पते सवितर्बो॒धयै॑नँ॒ सँशि॑तं चित्संत॒राँ सँ शि॑शाधि ।
Sentence: b    व॒र्धयै॑नं मह॒ते सौ॑भगाय॒ विश्व॑ एन॒मनु॑ मदन्तु दे॒वाः ।।

Verse: 9 
Sentence: a    अ॑मुत्र॒भूया॒दध॒ यद्य॒मस्य॒ बृह॑स्पते अ॒भिस॑स्ते॒रमु॑ञ्चः ।
Sentence: b    प्रत्औ॑हताम॒श्विना॑ मृ॒त्युम॑स्माद्दे॒वाना॑मग्ने भि॒षजा॒ शची॑भिः ।।

Verse: 10 
Sentence: a    उद्व॒यं तम॑स॒स्परि॒ स्वः॒ पश्य॑न्त॒ उत्त॑रम् ।
Sentence: b    दे॒वं दे॑व॒त्रा सूर्य॒मग॑न्म॒ ज्योति॑रुत्त॒मम् ।।

Verse: 11 
Sentence: a    ऊ॒र्ध्वा अ॑स्य स॒मिधो॑ भवन्त्यू॒र्ध्वा शु॒क्रा शो॒चीँष्य॒ग्नेः ।
Sentence: b    द्यु॒मत्त॑मा सु॒प्रती॑कस्य सू॒नोः ।।

Verse: 12 
Sentence: a    तनू॒नपा॒दसु॑रो वि॒श्ववे॑दा दे॒वो दे॒वेषु॑ दे॒वः ।
Sentence: b    प॒थो अ॑नक्तु॒ मध्वा॑ घृ॒तेन॑ ।।

Verse: 13 
Sentence: a    मध्वा॑ य॒ज्ञं न॑क्षसे प्रीणा॒नो नरा॒शँसो॑ अग्ने ।
Sentence: b    सु॒कृद्दे॒वः स॑वि॒ता वि॒श्ववा॑रः ।।

Verse: 14 
Sentence: a    अच्छा॒यमे॑ति॒ शव॑सा घृ॒तेने॑डा॒नो वह्नि॒र्नम॑सा ।
Sentence: b    अ॒ग्निँ स्रुचो॑ अध्व॒रेषु॑ प्र॒यत्सु॑ ।।

Verse: 15 
Sentence: a    स य॑क्षदस्य महि॒मान॑म॒ग्नेः स ईं॑ म॒न्द्रा सु॑प्र॒यसः॑ ।
Sentence: b    वसु॒श्वेति॑ष्ठो वसु॒धात॑मश्च ।।

Verse: 16 
Sentence: a    द्वारो॑ दे॒वीरन्व॑स्य॒ विश्वे॑ व्र॒ता द॑दन्ते अ॒ग्नेः ।
Sentence: b    उ॑रु॒व्यच॑सो॒ धाम्ना॒ पत्य॑मानाः ।।

Verse: 17 
Sentence: a    ते अ॑स्य॒ योष॑णे दि॒व्ये न योना॑ उ॒षासा॒नक्ता॑ ।
Sentence: b    इ॒मं य॒ज्ञमव॑तामध्व॒रं नः॑ ।।

Verse: 18 
Sentence: a    दै॑व्या॒ होता॑रा ऊ॒र्ध्वम॑ध्व॒रं नो॒ ग्नेर्जु॒ह्वाम॒भि गृ॑णीतम् ।
Sentence: b    कृ॑णु॒तम्नः॒ स्वि॑ष्टम् ।।

Verse: 19 
Sentence: a    ति॒स्रो दे॒वीर्ब॒र्हिरि॒दँ स॑द॒न्त्विडा॒ सर॑स्वती॒ भार॑ती ।
Sentence: b    म॒ही गृ॑णा॒ना ।।

Verse: 20 
Sentence: a    तन्न॑स्तु॒रीप॒मद्भु॑तं पुरु॒क्षु त्वष्टा॑ सु॒वीर्य॑म् ।
Sentence: b    रा॒यस्पोषं॒ वि ष्य॑तु॒ नाभि॑म॒स्मे ।।

Verse: 21 
Sentence: a    वन॑स्प॒ते व॑ सृजा॒ ररा॑ण॒स्त्मना॑ दे॒वेषु॑ ।
Sentence: b    अ॒ग्निर्ह॒व्यँ श॑मि॒ता सू॑दयाति ।।

Verse: 22 
Sentence: a    अग्ने॒ स्वाहा॑ कृणुहि जातवेदो॒ इन्द्रा॑य ह॒व्यम् ।
Sentence: b    विश्वे॑ दे॒वा ह॒विरि॒दं जु॑षन्ताम् ।।

Verse: 23 
Sentence: a    पीवोअ॑न्ना रयिं॒वृधः॑ सुमे॒धाः श्वे॒तः सि॑षक्ति नि॒युता॑मभि॒श्रीः ।
Sentence: b    ते वा॒यवे॒ सम॑नसो॒ वि त॑स्थु॒र्विश्वेन्नरः॑ स्वप॒त्यानि॑ चक्रुः ।।

Verse: 24 
Sentence: a    रा॒ये नु यं ज॒ज्ञतू॒ रोद॑सी॒मे रा॒ये दे॒वी धि॒षणा॑ धाति दे॒वम् ।
Sentence: b    अध॑ वा॒युं नि॒युतः॑ सश्चत॒ स्वा उ॒त श्वे॒तं वसु॑धितिं निरे॒के ।।

Verse: 25 
Sentence: a    आपो॑ ह॒ यद्बृ॑ह॒तीर्विश्व॒माय॒न्गर्भं॒ दधा॑ना ज॒नय॑न्तीर॒ग्निम् ।
Sentence: b    ततो॑ दे॒वानाँ॒ सम॑वर्त॒तासु॒रेकः॒ कस्मै॑ दे॒वाय॑ ह॒विषा॑ विधेम ।।

Verse: 26 
Sentence: a    यश्चि॒दापो॑ महि॒ना प॒र्यप॑श्य॒द्दक्षं॒ दधा॑ना ज॒नय॑न्तीर्य॒ज्ञम् ।
Sentence: b    यो दे॒वेष्वधि॑ दे॒व एक॒ आसी॒त्कस्मै॑ दे॒वाय॑ ह॒विषा॑ विधेम ।।

Verse: 27 
Sentence: a    प्र याभि॒र्यासि॑ दा॒श्वाँस॒मच्छा॑ नि॒युद्भि॑र्वायवि॒ष्टये॑ दुरो॒णे ।
Sentence: b    नि नो॑ र॒यिँ सु॒भोज॑सं युवस्व॒ नि वी॒रं गव्य॒मश्व्यं॑ च॒ राधः॑ ।।

Verse: 28 
Sentence: a    आ नो॑ नि॒युद्भिः॑ श॒तिनी॑भिरध्व॒रँ स॑ह॒स्रिणी॑भि॒रुप॑ याहि य॒ज्ञम् ।
Sentence: b    वायो॑ अ॒स्मिन्सव॑ने मादयस्व यू॒यं पा॑त स्व॒स्तिभिः॒ सदा॑ नः ।।

Verse: 29 
Sentence: a    नि॒युत्वा॑न्वाय॒वा ग॑ह्य॒यँ शु॒क्रो अ॑यामि ते ।
Sentence: b    गन्ता॑सि सुन्व॒तो गृ॒हम् ।।

Verse: 30 
Sentence: a    वायो॑ शु॒क्रो अ॑यामि ते॒ मध्वो॒ अग्रं॒ दिवि॑ष्टिषु ।
Sentence: b    आ या॑हि॒ सोम॑पीतये स्पा॒र्हो दे॑व नि॒युत्व॑ता ।।

Verse: 31 
Sentence: a    वा॒युर॑ग्रे॒गा य॑ज्ञ॒प्रीः सा॒कं ग॒न्मन॑सा य॒ज्ञम् ।
Sentence: b    शि॒वो नि॒युद्भिः॑ शि॒वाभिः॑ ।।

Verse: 32 
Sentence: a    वायो॒ ये ते॑ सह॒स्रिणो॒ रथा॑स॒स्तेभि॒रा ग॑हि ।
Sentence: b    नि॒युत्वा॒न्त्सोम॑पीतये ।।

Verse: 33 
Sentence: a    एक॑या च द॒शभि॑श्च स्वभूते॒ द्वाभ्या॑मि॒ष्टये॑ विँश॒ती च॑ ।
Sentence: b    ति॒सृभि॑श्च॒ वह॑से त्रिँ॒शता॑ च नि॒युद्भि॑र्वायवि॒ह ता वि मु॑ञ्च ।।

Verse: 34 
Sentence: a    तव॑ वायवृतस्पते॒ त्वष्टु॑र्जामातरद्भुत ।
Sentence: b    अवाँ॒स्या वृ॑णीमहे ।।

Verse: 35 
Sentence: a    अ॒भि त्वा॑ शूर नोनु॒मो दु॑ग्धा इव धे॒नवः॑ ।
Sentence: b    ईशा॑नम॒स्य जग॑तः स्व॒र्दृश॒मीशा॑नमिन्द्र त॒स्थुषः॑ ।।

Verse: 36 
Sentence: a    न त्वावाँ॑ अ॒न्यो दि॒व्यो न पार्थि॑वो॒ न जा॒तो न ज॑निष्यते ।
Sentence: b    अ॑श्वा॒यन्तो॑ मघवन्निन्द्र वा॒जिनो॑ ग॒व्यन्त॑स्त्वा हवामहे ।।

Verse: 37 
Sentence: a    त्वामिद्धि हवा॑महे सा॒ता वाज॑स्य का॒रवः॑ ।
Sentence: b    त्वां वृ॒त्रेष्वि॑न्द्र॒ सत्प॑तिं॒ नर॒स्त्वां काष्ठा॒स्वर्व॑तः ।।

Verse: 38 
Sentence: a    स त्वं न॑श्चित्र वज्रहस्त धृष्णु॒या म॒ह स्त॑वा॒नो अ॑द्रिवः ।
Sentence: b    गामश्वँ॑ र॒थ्य॑मिन्द्र॒ सं कि॑र स॒त्रा वाजं॒ न जि॒ग्युषे॑ ।।

Verse: 39 
Sentence: a    कया॑ नश्चि॒त्र आ भु॑वदू॒ती स॒दावृ॑धः॒ सखा॑ ।
Sentence: b    कया॒ शचि॑ष्ठया वृ॒ता ।।

Verse: 40 
Sentence: a    कस्त्वा॑ स॒त्यो मदा॑नां॒ मँहि॑ष्ठो मत्स॒दन्ध॑सः ।
Sentence: b    दृ॒ढा चि॑दा॒रुजे॒ वसु॑ ।।

Verse: 41 
Sentence: a    अ॒भी षु णः॒ सखी॑नामवि॒ता ज॑रितॄ॒णाम् ।
Sentence: b    श॒तं भ॑वास्यू॒तये॑ ।।

Verse: 42 
Sentence: a    य॒ज्ञाय॑ज्ञा वो अ॒ग्नये॑ गि॒रागि॑रा च॒ दक्ष॑से ।
Sentence: b    प्रप्र॑ व॒यम॒मृतं॑ जा॒तवे॑दसं प्रि॒यं मि॒त्रं न शँ॑सिषम् ।।

Verse: 43 
Sentence: a    पा॒हि नो॑ अग्न॒ एक॑या पा॒ह्यु॒त द्वि॒तीय॑या ।
Sentence: b    पा॒हि गी॒र्भिस्ति॒सृभि॑रूर्जां पते पा॒हि च॑त॒सृभि॑र्वसो ।।

Verse: 44 
Sentence: a    ऊ॒र्जो नपा॑तँ॒ स हि॒नायम॑स्म॒युर्दाशे॑म ह॒व्यदा॑तये ।
Sentence: b    भुव॒द्वाजे॑ष्ववि॒ता भुव॑द्वृ॒ध उ॒त त्रा॒ता त॒नूना॑म् ।।

Verse: 45 
Sentence: a    सं॑वत्स॒रो॑ सि परिवत्स॒रो॑ सीदावत्स॒रो॑ सीद्वत्स॒रो॑ सि वत्स॒रो॑ सि ।
Sentence: b    उ॒षस॑स्ते कल्पन्तामहोरा॒त्रास्ते॑ कल्पन्तामर्धमा॒सास्ते॑ कल्पन्तां मा॒सास्ते॑ कल्पन्तामृ॑स्ते कल्पन्ताँ संवत्स॒रस्ते॑ कल्पताम् ।
Sentence: c    प्रेत्या॒ एत्यै॒ सं चाञ्च॒ प्र च॑ सारय ।
Sentence: d    सु॑पर्ण॒चिद॑सि॒ तया॑ दे॒वत॑याङ्गिर॒स्वद्ध्रु॒वः सी॑द ।।


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.