TITUS Texts: White Yajur-Veda: Vajasaneyi-Samhita (Madhyandina)

TITUS
White Yajur-Veda: Vajasaneyi-Samhita (Madhyandina)
Part No. 35

Paragraph: 35

Verse: 1
Sentence: a    अपे॒तो य॑न्तु प॒णयो सु॑म्ना देवपी॒यवः॑ ।
Sentence: b    अ॒स्य लो॒कः सु॒ताव॑तः ।
Sentence: c    द्युभि॒रहो॑भिर॒क्तुभि॒र्व्य॑क्तं य॒मो द॑दात्वव॒सान॑मस्मै ।।

Verse: 2
Sentence: a    स॑वि॒ता ते॒ शरी॑रेभ्यः पृथि॒व्यां लो॒कमि॑च्छतु ।
Sentence: b    तस्मै॑ युज्यन्तामु॒स्रियाः॑ ।।

Verse: 3
Sentence: a    वा॒युः पु॑नातु ।
Sentence: b    स॑वि॒ता पु॑नातु ।
Sentence: c    अ॒ग्नेर्भ्राज॑सा ।
Sentence: d    सूर्य॑स्य॒ वर्च॑सा ।
Sentence: e    वि मु॑च्यन्तामु॒स्रियाः॑ ।।

Verse: 4
Sentence: a    अ॑श्व॒त्थे वो॑ नि॒षद॑नं प॒र्णे वो॑ वस॒तिष्कृ॒ता ।
Sentence: b    गो॒भाज॒ इत्किला॑सथ॒ यत्स॒नव॑थ॒ पूरु॑षम् ।।

Verse: 5
Sentence: a    स॑वि॒ता ते॒ शरी॑राणि मा॒तुरु॒पस्थ॒ आ व॑पतु ।
Sentence: b    तस्मै॑ पृथिवि॒ शं भ॑व ।।

Verse: 6
Sentence: a    प्र॒जाप॑तौ त्वा दे॒वता॑या॒मुपो॑दके लो॒के नि द॑धाम्यसौ ।
Sentence: b    अप॑ नः॒ शोशु॑चद॒घम् ।।

Verse: 7
Sentence: a    परं॑ मृत्यो॒ अनु॒ परे॑हि॒ पन्थां॒ यस्ते॑ अ॒न्य इत॑रो देव॒याना॑त् ।
Sentence: b    चक्षु॑ष्मते शृण्व॒ते ते॑ ब्रवीमि॒ मा नः॑ प्र॒जाँ री॑रिषो॒ मोत वी॒रान् ।।

Verse: 8
Sentence: a    शं वातः॒ शँ हि ते॒ घृणिः॒ शं ते॑ भव॒न्त्विष्ट॑काः ।
Sentence: b    शं ते॑ भवन्त्व॒ग्नयः॒ पार्थि॑वासो॒ मा त्वा॒भि शू॑शुचन् ।।

Verse: 9
Sentence: a    कल्प॑न्तां ते॒ दिश॒स्तुभ्य॒मापः॑ शि॒वत॑मा॒स्तुभ्यं॑ भवन्तु॒ सिन्ध॑वः ।
Sentence: b    अ॒न्तरि॑क्षँ शि॒वं तुभ्यं॒ कल्प॑न्तां ते॒ दिशः॒ सर्वाः॑ ।।

Verse: 10
Sentence: a    अश्म॑न्वती रीयते॒ सँ र॑भध्व॒मुत्ति॑ष्ठत॒ प्र त॑रता॒ सखा॑यः ।
Sentence: b    अत्र॑ जही॒मो शि॑वा॒ ये अस॑ञ्छिवान्व॒यमुत्त॑रेमा॒भि वाजा॑न् ।।

Verse: 11
Sentence: a    अपा॒घमप॒ किल्वि॑ष॒मप॑ कृ॒त्यामपो॒ रपः॑ ।
Sentence: b    अपा॑मार्ग॒ त्वम॒स्मदप॑ दुः॒ष्वप्न्यँ॑ सुव ।।

Verse: 12
Sentence: a    सु॑मित्रि॒या न॒ आप॒ ओष॑धयः सन्तु दुर्मित्रि॒यास्तस्मै॑ सन्तु॒ यो॒ स्मान्द्वेष्टि॒ यं च॑ व॒यं द्वि॒ष्मः ।।

Verse: 13
Sentence: a    अ॑न॒ड्वाह॒मा र॑भामहे सौरभेयँ स्व॒स्तये॑ ।
Sentence: b    स न॒ इन्द्र॑ इव दे॒वेभ्यो॒ वह्निः॑ सं॒तर॑णो भव ।।

Verse: 14
Sentence: a    उद्व॒यं तम॑स॒स्परि॒ स्वः॒ पश्य॑न्त॒ उत्त॑रम् ।
Sentence: b    दे॒वं दे॑व॒त्रा सूर्य॒मग॑न्म॒ ज्योति॑रुत्त॒मम् ।।

Verse: 15
Sentence: a    इ॒मं जी॒वेभ्यः॑ परि॒धिं द॑धामि मैषां॒ नु गा॒दप॑रो॒ अर्थ॑मे॒तम् ।
Sentence: b    श॒तं जी॑वन्तु श॒रदः॑ पुरू॒चीर॒न्तर्मृ॒त्युं द॑धतां॒ पर्व॑तेन ।।

Verse: 16
Sentence: a    अग्न॒ आयूँ॑षि पवस्व॒ आ सु॒वोर्ज॒मिषं॑ च नः ।
Sentence: b    आ॒रे बा॑धस्व दु॒च्छुना॑म् ।।

Verse: 17
Sentence: a    आयु॑ष्मानग्ने ह॒विषा॑ वृधा॒नो घृ॒तप्र्स॑तीको घृ॒तयो॑निरेधि ।
Sentence: b    घृ॒तं पी॒त्वा मधु॒ चारु॒ गव्यं॑ पि॒तेव॑ पु॒त्रम॒भि र॑क्षतादि॒मान्त्स्वाहा॑ ।।

Verse: 18
Sentence: a    परी॒मे गाम॑नेषत॒ पर्य॒ग्निम॑हृषत ।
Sentence: b    दे॒वेष्व॑क्रत॒ श्रवः॒ क इ॒माँ आ द॑धर्षति ।।

Verse: 19
Sentence: a    क्र॒व्याद॑म॒ग्निं प्र हि॑णोमि दू॒रं य॑म॒राज्यं॑ गच्छतु रिप्रवा॒हः ।
Sentence: b    इहै॒वायमित॑रो जा॒तवे॑दा दे॒वेभ्यो॑ ह॒व्यं व॑हतु प्रजा॒नन् ।।

Verse: 20
Sentence: a    वह॑ व॒पां जा॑तवेदः पि॒तृभ्यो॒ यत्रै॑ना॒न्वेत्थ॒ निहि॑तान्परा॒के ।
Sentence: b    मेद॑सः कु॒ल्या उप॒ तान्त्स्र॑वन्तु स॒त्या ए॑षामा॒शिषः॒ सं न॑मन्ताँ॒ स्वाहा॑ ।।

Verse: 21
Sentence: a    स्यो॒ना पृ॑थिवि नो भवानृक्ष॒रा नि॒वेश॑नी ।
Sentence: b    यच्छा॑ नः॒ शर्म॑ स॒प्रथाः॑ ।
Sentence: c    अप॑ नः॒ शोशु॑चद॒घम् ।।

Verse: 22
Sentence: a    अ॒स्मात्त्वमधि॑ जा॒तो॑ सि॒ त्वद॒यं जा॑यतां॒ पुनः॑ ।
Sentence: b    असौ स्व॒र्गाय॑ लो॒काय॒ स्वाहा॑ ।।

This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.