TITUS
White Yajur-Veda: Vajasaneyi-Samhita (Madhyandina)
Part No. 40
Previous part

Paragraph: 40 
Verse: 1    {IsUp MK1}
Sentence: a    ई॒शा वा॒स्य॑मि॒दँ सर्वं॒ यत्किं च॒ जग॑त्यां॒ जग॑त् ।
Sentence: b    तेन॑ त्य॒क्तेन॑ भुञ्जीथा॒ मा गृ॑धः॒ कस्य॑ स्वि॒द्धन॑म् ।।

Verse: 2    {IsUp MK2}
Sentence: a    कु॒र्वन्ने॒वेह कर्मा॑णि जिजीवि॒षेच्छ॒तँ समाः॑ ।
Sentence: b    ए॒वं त्वयि॒ नान्यथे॒तो॑ स्ति॒ न कर्म॑ लिप्यते॒ नरे॑ ।।

Verse: 3    {IsUp MK3}
Sentence: a    अ॑सु॒र्या॒ नाम॑ ते लो॒का अ॒न्धेन॒ तम॒सावृ॑ताः ।
Sentence: b    ताँस्ते प्रेत्यापि॑ गच्छन्ति॒ ये के चा॑त्म॒हनो॒ जनाः॑ ।।

Verse: 4    {IsUp MK4}
Sentence: a    अने॑ज॒देकं॒ मन॑सो॒ जवी॑यो नैनद्दे॒वा आ॑प्नुव॒न्पूर्व॒मर्श॑त् ।
Sentence: b    तद्धाव॑तो॒ न्यानत्ये॑ति॒ तिष्ठ॒त्तस्मि॑न्न॒पो मा॑त॒रिश्वा॑ दधाति ।।

Verse: 5    {IsUp MK5}
Sentence: a    तदे॑जति॒ तन्नै॑जति॒ तद्दू॒रे तद्व॑न्ति॒के ।
Sentence: b    तद॒न्तर॑स्य॒ सर्व॑स्य॒ तदु॒ सर॑वस्यास्य बाह्य॒तः ।।

Verse: 6    {IsUp MK6}
Sentence: a    यस्तु सर्वा॑णि भू॒तान्या॒त्मन्ने॒वानु॒पश्य॑ति ।
Sentence: b    स॑र्वभू॒तेषु॑ चा॒त्मानं॒ ततो॒ न वि चि॑कित्सति ।।

Verse: 7    {IsUp MK7}
Sentence: a    यस्मि॒न्त्सर्वा॑णि भू॒तान्यात्मै॒वाभू॑द्विजानतः ।
Sentence: b    तत्र॒ को मोहः॒ कः शोक॑ एक॒त्वम॑नु॒पश्य॑तः ।।

Verse: 8    {IsUp MK8}
Sentence: a    स पर्य॑गाच्छु॒क्रम॑का॒यम॑व्र॒णम॑स्नावि॒रँ शु॒द्धमपा॑पविद्धम् ।
Sentence: b    क॒विर्म॑नी॒षी प॑रि॒भूः स्व॑यं॒भूर्या॑थातथ्य॒तो र्था॒न्व्य॑दधाच्छाश्व॒तीभ्यः॒ समा॑भ्यः ।।

Verse: 9    {IsUp M9/K12}
Sentence: a    अ॒न्धं तमः॒ प्र वि॑शन्ति॒ ये सं॑भूतिमु॒पास॑ते ।
Sentence: b    ततो॒ भूय॑ इव॒ ते तमो॒ य उ॒ संभू॑त्याँ र॒ताः ।।

Verse: 10    {IsUp M10/K13}
Sentence: a    अ॒न्यदे॒वाहुः सं॑भ॒वाद॒न्यदा॑हुर्शंभवात् ।
Sentence: b    इति॑ शुश्रुम॒ धीरा॑णां॒ ये न॒स्तद्वि॑चचक्षि॒रे ।।

Verse: 11    {IsUp M11/K14}
Sentence: a    संभू॑तिं च विना॒शं च॒ यस्तद्वेदो॒भयँ॑ स॒ह ।
Sentence: b    वि॑ना॒शेन॑ मृ॒त्युं ती॒र्त्वा संभू॑त्या॒मृत॑मश्नुते ।।

Verse: 12    {IsUp M12/K9}
Sentence: a    अ॒न्धं तमः॒ प्र वि॑शन्ति॒ ये वि॑द्यामु॒पास॑ते ।
Sentence: b    ततो॒ भूय॑ इव॒ ते तमो॒ य उ॑ वि॒द्यायाँ॑ र॒ताः ।।

Verse: 13    {IsUp M13/K10}
Sentence: a    अ॒न्यदे॒वाहुर्वि॒द्याया॑ अ॒न्यदा॑हु॒रवि॑द्यायाः ।
Sentence: b    इति॑ शुश्रुम॒ धीरा॑णां॒ ये न॒स्तद्वि॑चचक्षि॒रे ।।

Verse: 14    {IsUp M14/K11}
Sentence: a    वि॒द्यां चावि॑द्यां च॒ यस्तद्वेदो॒भयँ॑ स॒ह ।
Sentence: b    अवि॑द्यया मृ॒त्युं ती॒र्त्वा वि॒द्यया॒मृत॑मश्नुते ।।

Verse: 15    {IsUp M15}
Sentence: a    वा॒युरनि॑लम॒मृत॒मथे॒दं भस्मा॑न्तँ॒ शरी॑रम् ।
Sentence: b    ओ३म्क्रतो॑ स्मर क्लि॒बे स्म॑र कृ॒तँ स्म॑र ।।

Verse: 16    {IsUp M16/K18}
Sentence: a    अग्ने॑ नय सु॒पथा॑ रा॒ये अ॒स्मान्विश्वा॑नि देव व॒युना॑नि वि॒द्वान् ।
Sentence: b    यु॑यो॒ध्य॒स्मज्जु॑हुरा॒णमेनो॒ भुयि॑ष्ठां ते॒ नम॑उक्तिं विधेम ।।

Verse: 17    {IsUp M17/K15}
Sentence: a    हि॑र॒ण्मये॑न॒ पात्रे॑ण स॒त्यस्यापि॑हितं॒ मुख॑म् ।
Sentence: b    यो॒ सावा॑दि॒त्ये पुरु॑षः॒ सो॒ साव॒हम् ।

Sentence: c    ओ३म्खं ब्रह्म॑ ।।

This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.