TITUS
White Yajur-Veda: Vajasaneyi-Samhita (Madhyandina)
Part No. 39
Previous part

Paragraph: 39 

Verse: 1 
Sentence: a    स्वाहा॑प्रा॒णेभ्यः॒ साधि॑पतिकेभ्यः ।
Sentence: b    पृ॑थिव्यै॒ स्वाहा॑ ।
Sentence: c    अ॒ग्नये॒ स्वाहा॑ ।
Sentence: d    अ॒न्तरि॑क्षे॒ स्वाहा॑ ।
Sentence: e    वा॒यवे॒ स्वाहा॑ ।
Sentence: f    दि॒वे स्वाहा॑ ।
Sentence: g    सूर्या॑य॒ स्वाहा॑ ।।

Verse: 2 
Sentence: a    दि॒ग्भ्यः स्वाहा॑ ।
Sentence: b    च॒न्द्राय॒ स्वाहा॑ ।
Sentence: c    नक्ष॑त्रेभ्यः॒ स्वाहा॑ ।
Sentence: d    अ॒द्भ्यः स्वाहा॑ ।
Sentence: e    वरु॑णाय॒ स्वाहा॑ ।
Sentence: f    नाभ्यै॒ स्वाहा॑ ।
Sentence: g    पू॒ताय॒ स्वाहा॑ ।।

Verse: 3 
Sentence: a    वा॒चे स्वाहा॑ ।
Sentence: b    प्रा॒णाय॒ स्वाहा॑ ।
Sentence: c    प्रा॒णाय॒ स्वाहा॑ ।
Sentence: d    चक्षु॑षे॒ स्वाहा॑ ।
Sentence: e    चक्षु॑षे॒ स्वाहा॑ ।
Sentence: f    श्रोत्रा॑य॒ स्वाहा॑ ।
Sentence: g    श्रोत्रा॑य॒ स्वाहा॑ ।।

Verse: 4 
Sentence: a    मन॑सः॒ काम॒माकू॑तिं वा॒चः स॒त्यम॑शीय ।
Sentence: b    प॑शू॒नाँ रू॒पमन्न॑स्य॒ रसो॒ यशः॒ श्रीः श्र॑यतां॒ मयि॒ स्वाहा॑ ।।

Verse: 5 
Sentence: a    प्र॒जाप॑तिः संभ्रि॒यमा॑णः स॒म्राट्संभृ॑तो वैश्वदे॒वः सँ॑स॒न्नो घ॒र्मः प्रवृ॑क्त॒स्तेज॒ उद्य॑त आश्वि॒नः पय॑स्यानी॒यमा॑ने पौ॒ष्णो विष्प॒न्दमा॑ने मारु॒तः क्लथ॑न् ।
Sentence: b    मै॒त्रः शर॑सि संता॒य्यमा॑ने वाय॒व्यो॑ ह्रि॒यमा॑ण आग्ने॒यो हू॒यमा॑नो॒ वाग्घु॒तः ।।

Verse: 6 
Sentence: a    स॑वि॒ता प्र॑थ॒मे ह॑न्न॒ग्निर्द्वि॒तीये॑ वा॒युस्तृ॒तीय॑ आदि॒त्यश्च॑तु॒र्थे च॒न्द्रमाः॑ पञ्च॒म ऋ॒तुः ष॒ष्ठे म॒रुतः॑ सप्त॒मे बृह॒स्पति॑रष्ट॒मे ।
Sentence: b    मि॒त्रो न॑व॒मे वरु॑णो दश॒म इन्द्र॑ एकाद॒शे विश्वे॑ दे॒वा द्वा॑द॒शे ।।

Verse: 7 
Sentence: a    उ॒ग्रश्च॑ भी॒मश्च॒ ध्वा॑न्तश्च॒ धुनि॑श्च ।
Sentence: b    सा॑स॒ह्वाँश्चा॑भियु॒ग्वा च॑ वि॒क्षिपः॒ स्वाहा॑ ।।

Verse: 8 
Sentence: a    अ॒ग्निँ हृद॑येना॒शनिँ॑ हृदया॒ग्रेण॑ पशु॒पतिं॑ कृत्स्न॒हृद॑येन भ॒वं य॒क्ना ।
Sentence: b    श॒र्वं मत॑स्नाभ्या॒मीशा॑नं म॒न्युना॑ महादे॒वम॑न्तःपर्श॒व्येनो॒ग्रं दे॒वं व॑नि॒ष्ठुना॑ वसिष्ठ॒हनुः॒ शिङ्गी॑नि को॒श्याभ्या॑म् ।।

Verse: 9 
Sentence: a    उ॒ग्रं लोहि॑तेन मि॒त्रँ सौ॑व्रत्येन रु॒द्रं दौ॑र्व्रत्ये॒नेन्द्रं॑ प्रक्री॒डेन॑ म॒रुतो॒ बले॑न सा॒ध्यान्प्र॒मुदा॑ ।
Sentence: b    भ॒वस्य॒ कण्ठँ॑ रु॒द्रस्या॑न्तःपा॒र्श्व्यं म॑हादे॒वस्य॒ यकृ॑च्छ॒र्वस्य॑ वनि॒ष्ठुः प॑शु॒पतेः॑ पुरी॒तत् ।।

Verse: 10 
Sentence: a    लोम॑भ्यः॒ स्वाहा॒ लोम॑भ्यः॒ स्वाहा॑ त्व॒चे स्वाहा॑ त्व॒चे स्वाहा॒ लोहि॑ताय॒ स्वाहा॒ लोहि॑ताय॒ स्वाहा॒ मेदो॑भ्यः॒ स्वाहा॒ मेदो॑भ्यः॒ स्वाहा॑ ।
Sentence: b    माँ॒सेभ्यः॒ स्वाहा॑ माँ॒सेभ्यः॒ स्वाहा॒ स्नाव॑भ्यः॒ स्वाहा॒ स्नाव॑भ्यः॒ स्वाहा॒स्थभ्यः॒ स्वाहा॒स्थभ्यः॒ स्वाहा॑ म॒ज्जभ्यः॒ स्वाहा॑ म॒ज्जभ्यः॒ स्वाहा॑ ।
Sentence: c    रेत॑से॒ स्वाहा॑ पा॒यवे॒ स्वाहा॑ ।।

Verse: 11 
Sentence: a    आ॑या॒साय॒ स्वाहा॑ प्राया॒साय॒ स्वाहा॑ संया॒साय॒ स्वाहा॑ विया॒साय॒ स्वाहो॑द्या॒साय॒ स्वाहा॑ ।
Sentence: b    शु॒चे स्वाहा॒ शोच॑ते॒ स्वाहा॒ शोच॑मानाय॒ स्वाहा॒ शोका॑य॒ स्वाहा॑ ।।

Verse: 12 
Sentence: a    तप॑से॒ स्वाहा॒ तप्य॑ते॒ स्वाहा॒ तप्य॑मानाय॒ स्वाहा॑ त॒प्ताय॒ स्वाहा॑ घ॒र्माय॒ स्वाहा॑ ।
Sentence: b    निष्कृ॑त्यै॒ स्वाहा॒ प्राय॑श्चित्त्यै॒ स्वाहा॑भेष॒जाय॒ स्वाहा॑ ।।

Verse: 13 
Sentence: a    य॒माय॒ स्वाहान्त॑काय॒ स्वाहा॑ मृ॒त्यवे॒ स्वाहा॒ ब्रह्म॑णे॒ स्वाहा॑ ब्रह्मह॒त्यायै॒ स्वाहा॒ विश्वे॑भ्यो दे॒वेभ्यः॒ स्वाहा॒ द्यावा॑पृथि॒वीभ्याँ॒ स्वाहा॑ ।।



Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.