TITUS
White Yajur-Veda: Vajasaneyi-Samhita (Madhyandina)
Part No. 38
Previous part

Paragraph: 38 

Verse: 1 
Sentence: a    दे॒वस्य॑ त्वा सवि॒तुः प्र॑स॒वे॒ श्विनो॑र्बा॒हुभ्यां॑ पू॒ष्णो हस्ता॑भ्याम् ।
Sentence: b    आ द॒दे दि॑त्यै॒ रास्ना॑सि ।।

Verse: 2 
Sentence: a    इड॒ एहि॑ ।
Sentence: b    अदि॑त॒ एहि॑ ।
Sentence: c    सर॑स्व॒त्त्येहि॑ ।
Sentence: d    असा॒वेहि॑ ।
Sentence: e    असा॒वेहि॑ ।
Sentence: f    असा॒वेहि॑ ।।

Verse: 3 
Sentence: a    अदि॑त्यै॒ रास्ना॑सीन्द्रा॒ण्या उ॒ष्णीषः॑ ।
Sentence: b    पू॒षासि॑ ।
Sentence: c    घ॒र्माय॑ दीष्व ।।

Verse: 4 
Sentence: a    अ॒श्विभ्यां॑ पिन्वस्व ।
Sentence: b    सर॑स्वत्पिन्वस्व ।
Sentence: c    इन्द्रा॑य पिन्वस्व ।
Sentence: d    स्वाहेन्द्र॑वत् ।
Sentence: e    स्वाहेन्द्र॑वत् ।
Sentence: f    स्वाहेन्द्र॑वत् ।।

Verse: 5 
Sentence: a    यस्ते॒ स्तनः॑ शश॒यो यो म॑यो॒भूर्यो र॑त्न॒धा व॑सु॒विद्यः सु॒दत्रः॑ ।
Sentence: b    येन॒ विश्वा॒ पुष्य॑सि॒ वार्या॑णि॒ सर॑स्व॒त्तमि॒ह धात॑वे कः ।
Sentence: c    उ॒र्व॒न्तरि॑क्ष॒मन्वे॑मि ।।

Verse: 6 
Sentence: a    गा॑य॒त्रं छन्दो॑ सि ।
Sentence: b    त्रै॑ष्टुभं॒ छन्दो॑ सि ।
Sentence: c    द्यावा॑पृथि॒वीभ्यां॑ त्वा॒ परि॑ गृह्णामि ।
Sentence: d    अ॒न्तरि॑क्षे॒णोप॑ यच्छामि ।
Sentence: e    इन्द्रा॑श्विना ।
Sentence: f    मधु॑नः सार॒घस्य॑ घ॒र्मं पा॑त॒ वस॑वो॒ यज॑त॒ वाट् ।
Sentence: g    स्वाहा॒ सूर्य॑स्य र॒श्मये॑ वृष्टि॒वन॑ये ।।

Verse: 7 
Sentence: a    स॑मु॒द्राय॑ त्वा॒ वाता॑य॒ स्वाहा॑ ।
Sentence: b    स॑रि॒राय॑ त्वा॒ वाता॑य॒ स्वाहा॑ ।
Sentence: c    अ॑नाधृ॒ष्याय॑ त्वा॒ वाता॑य॒ स्वाहा॑ ।
Sentence: d    अ॑प्रतिधृ॒ष्याय॑ त्वा॒ वाता॑य॒ स्वाहा॑ ।
Sentence: e    अ॑व॒स्यवे॑ त्वा॒ वाता॑य॒ स्वाहा॑ ।
Sentence: f    अ॑शिमि॒दाय॑ त्वा॒ वाता॑य॒ स्वाहा॑ ।।

Verse: 8 
Sentence: a    इन्द्रा॑य त्वा॒ वसु॑मते रु॒द्रव॑ते॒ स्वाहा॑ ।
Sentence: b    इन्द्रा॑य त्वादि॒त्यव॑ते॒ स्वाहा॑ ।
Sentence: c    इन्द्रा॑य त्वाभिमाति॒घ्ने स्वाहा॑ ।
Sentence: d    स॑वि॒त्रे त्व॑ ऋभु॒मते॑ विभु॒मते॒ वाज॑वते॒ स्वाहा॑ ।
Sentence: e    बृह॒स्पत॑ये त्वा वि॒श्वदे॑व्यावते॒ स्वाहा॑ ।।

Verse: 9 
Sentence: a    य॒माय॒ त्वाङ्गि॑रस्वते पितृ॒मते॒ स्वाहा॑ ।
Sentence: b    स्वाहा॑ घ॒र्माय॑ ।
Sentence: c    स्वाहा॑ घ॒र्मः पि॒त्रे ।।

Verse: 10 
Sentence: a    विश्वा॒ आशा॑ दक्षिण॒सद्विश्वा॑न्दे॒वानया॑डि॒ह ।
Sentence: b    स्वाहा॑कृतस्य घ॒र्मस्य॒ मधोः॑ पिबतमश्विना ।।

Verse: 11 
Sentence: a    दि॒वि धा॑ इ॒मं य॒ज्ञमि॒मम्य॒ज्ञं दि॒वि धाः॑ ।
Sentence: b    स्वाहा॒ग्नये॑ य॒ज्ञिया॑य॒ शं यजु॑र्भ्यः ।।

Verse: 12 
Sentence: a    अश्वि॑ना घ॒र्मं पा॑तँ॒ हार्द्वा॑न॒मह॑र्दि॒वाभि॑रू॒तिभिः॑ ।
Sentence: b    त॑न्त्रा॒यिणो॒ नमो॒ द्यावा॑पृथि॒वीभ्या॑म् ।।

Verse: 13 
Sentence: a    अपा॑ताम॒श्विना॑ घ॒र्ममनु॒ द्यावा॑पृथि॒वी अ॑मँसाताम् ।
Sentence: b    इहै॒व रा॒तयः॑ सन्तु ।।

Verse: 14 
Sentence: a    इ॒षे पि॑न्वस्व ।
Sentence: b    ऊ॒र्जे पि॑न्वस्व ।
Sentence: c    ब्रह्म॑णे पिन्वस्व ।
Sentence: d    क्ष॒त्राय॑ पिन्वस्व ।
Sentence: e    द्यावा॑पृथि॒वीभ्यां॑ पिन्वस्व ।
Sentence: f    धर्मा॑सि सु॒धर्म॑ ।
Sentence: g    अमे॑न्य॒स्मे नृ॒म्णानि॑ धारय॒ ब्रह्म॑ धारय क्ष॒त्रम्धा॑रय॒ विषं॑ धारय ।।

Verse: 15 
Sentence: a    स्वाहा॑ पू॒ष्णे शर॑से ।
Sentence: b    स्वाहा॒ ग्राव॑भ्यः ।
Sentence: c    स्वाहा॑ प्रतिर॒वेभ्यः॑ ।
Sentence: d    स्वाहा॑ पि॒तृभ्य॑ ऊ॒र्ध्वब॑र्हिर्भ्यो घर्म॒पाव॑भ्यः ।
Sentence: e    स्वाहा॒ द्यावा॑पृथि॒वीभ्या॑म् ।
Sentence: f    स्वाहा॒ विश्वे॑भ्यः दे॒वेभ्यः॑ ।।

Verse: 16 
Sentence: a    स्वाहा॑ रु॒द्राय॑ रु॒द्रहू॑तये ।
Sentence: b    स्वाहा॒ सं ज्योति॑षा॒ ज्योतिः॑ ।
Sentence: c    अहः॑ के॒तुना॑ जुषताँ सु॒ज्योति॒र्ज्योति॑षा॒ स्वाहा॑ ।
Sentence: d    रात्रिः॑ के॒तुना॑ जुषताँ सु॒ज्योति॒र्ज्योति॑षा॒ स्वाहा॑ ।
Sentence: e    मधु॑ हु॒तमिन्द्र॑तमे अ॒ग्नाव॒श्याम॑ ते देव॒ घर्म॒ नम॑स्ते अस्तु॒ मा मा॑ हिँसीः ।।

Verse: 17 
Sentence: a    अ॒भी॒मं म॑हि॒मा दिवं॒ विप्रो॑ बभूव स॒प्रथाः॑ ।
Sentence: b    उ॒त श्रव॑सा पृथि॒वीँ सँ सी॑दस्व म॒हाँ अ॑सि॒ रोच॑स्व देव॒वीत॑मः ।।

Verse: 18 
Sentence: a    या ते॑ घर्म दि॒व्या शुग्या गा॑य॒त्र्याँ ह॑वि॒र्धाने॑ ।
Sentence: b    सा त॒ आ प्या॑यतां॒ निष्प्या॑यतां॒ तस्यै॑ ते॒ स्वाहा॑ ।
Sentence: c    या ते॑ घर्मा॒न्तरि॑क्षे॒ शुग्या त्रि॒ष्टुभ्याग्नी॑ध्रे ।
Sentence: d    सा त॒ आ प्या॑यतां॒ निष्प्या॑यतां॒ तस्यै॑ ते॒ स्वाहा॑ ।
Sentence: e    या ते॑ घर्म पृथि॒व्याँ शुग्या जग॑त्याँ सद॒स्या॑ ।
Sentence: f    सा त॒ आ प्या॑यतां॒ निष्प्या॑यतां॒ तस्यै॑ ते॒ स्वाहा॑ ।।

Verse: 19 
Sentence: a    क्ष॒त्रस्य॑ त्वा प॒रस्पा॑य॒ ब्रह्म॑णस्त॒न्वं॑ पाहि ।
Sentence: b    विश॑स्त्वा॒ धर्म॑णा व॒यमनु॑ क्रामाम सुवि॒ताय॒ नव्य॑से ।।

Verse: 20 
Sentence: a    चतुः॑स्रक्ति॒र्नाभि॑रृ॒तस्य॑ स॒प्रथाः॒ स नो॑ वि॒श्वायुः॑ स॒प्रथाः॒ स नः॑ स॒र्वायुः॑ स॒प्रथाः॑ ।
Sentence: b    अप॒ द्वेषो॒ अप॒ ह्वरो॒ न्यव्र॑तस्य सश्चिम ।।

Verse: 21 
Sentence: a    घर्मै॒तत्ते॒ पुरी॑षं॒ तेन॒ वर्ध॑स्व॒ चा च॑ प्यायस्व ।
Sentence: b    व॑र्धिषी॒महि॑ च व॒यमा च॑ प्यासिषीमहि ।।

Verse: 22 
Sentence: a    अचि॑क्रद॒द्वृषा॒ हरि॑र्म॒हान्मि॒त्रो न॑ दर्श॒तः ।
Sentence: b    सँ सूर्ये॑ण दिद्युतदुद॒धिर्नि॒धिः ।।

Verse: 23 
Sentence: a    सु॑मित्रि॒या न॒ आप॒ ओष॑धयः सन्तु+ दुर्मित्रि॒यास्तस्मै॑ सन्तु॒ यो॒ स्मान्द्वेष्टि॒ यं च॑ व॒यं द्वि॒ष्मः ।।

Verse: 24 
Sentence: a    उद्व॒यं तम॑स॒स्परि॒ स्वः॒ पश्य॑न्त॒ उत्त॑रम् ।
Sentence: b    दे॒वं दे॑व॒त्रा सूर्य॒मग॑न्म॒ ज्योति॑रुत्त॒मम् ।।

Verse: 25 
Sentence: a    एधो॑ स्येधिषी॒महि॑ ।
Sentence: b    स॒मिद॑सि॒ तेजो॑ सि॒ तेजो॒ मयि॑ धेहि ।।

Verse: 26 
Sentence: a    याव॑तो॒ द्यावा॑पृथि॒वी याव॑च्च स॒प्त सिन्ध॑वो वितस्थि॒रे ।
Sentence: b    तव॑न्तमिन्द्र ते॒ ग्रह॑मू॒र्जा गृ॑ह्णा॒म्यक्षि॑तं॒ मयि॑ गृह्णा॒म्यक्षि॑तम् ।।

Verse: 27 
Sentence: a    मयि॒ त्यदि॑न्द्रि॒यं बृ॒हन्मयि॒ दक्षो॒ मयि॒ क्रतुः॑ ।
Sentence: b    घ॒र्मस्त्रि॒शुग्वि रा॑जति वि॒राजा॒ ज्योति॑षा स॒ह ब्रह्म॑णा॒ तेज॑सा स॒ह ।।

Verse: 28 
Sentence: a    पय॑सो॒ रेत॒ आभृ॑तं॒ तस्य॒ दोह॑मशीम॒ह्युत्त॑राम्ुत्तराँ॒ समा॑म् ।
Sentence: b    त्विषः॑ सं॒वृक्क्रत्वे॒ दक्ष॑स्य ते सुषुवा॒णस्य॑ ते सुषुम्णाग्निहु॒तः ।
Sentence: c    इन्द्र॑पीतस्य प्र॒जाप॑तिभक्षितस्य॒ मधु॑मत॒ उप॑हूत॒ उप॑हूतस्य भक्षयामि ।।


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.