Ա́յս բա́նք են ուխտին զոր պատուիրեաց տ(է)ր մովսիսի. հաստատել որդւոցն ի(սրաէ)լի յերկրին մովաբու. թո́ղ զայն ուխտ՝ զոր ուխտեաց ն(ո)ց(ա) ՛ի քորէբ։
Եւ կոչեաց մովսէս զա(մենայ)ն որդիսն ի(սրաէ)լի՝ եւ ասէ́ ցնոսա։ Դուք ձեզէ́ն տեսէք զա(մենայ)ն ինչ զոր արա́ր տ(է)ր յեգիպտոս առաջի ձեր, ը(նդ) փարաւոն եւ ը(նդ) ծառայս ն(ո)ր(ա), եւ ը(նդ) ա(մենայ)ն երկիր ն(ո)ր(ա)։
Զփորձանսն մեծամեծս՝ զոր տեսին աչք ձեր. զնշանսն եւ զարուեստս մեծամեծս զայնոսիկ, զձեռն հզօր, եւ զբազուկ բարձր։
Եւ ո́չ ետ ձեր տ(է)ր ա(ստուա)ծ ձեր սի́րտ գիտելոյ, եւ աչս տեսանելոյ. եւ ականջս լսելոյ մինչեւ ցայսօր։
եւ ած զձեզ զքառասո́ւն ամ ը(նդ) անապատն։ Ո́չ հնացան ձորձք ձեր, եւ ո́չ մաշեցան կօշիկք յոտից ձերոց։
Հաց ո́չ կերայք, եւ գինի եւ ցքի ո́չ արբէք. զի ծանիջիք թէ ե́ս եմ տ(է)ր ա(ստուա)ծ ձեր.
եւ եկիք մինչեւ ՛ի տեղիս յայս։ Եւ ել սեհոն թագաւոր եսեբոնայ, եւ ովդ թագաւոր բասանու ընդդէ́մ մեր պատերազմաւ. եւ հարա́ք զն(ո)ս(ա),
եւ առա́ք զերկիր ն(ո)ց(ա). եւ ետու զնա ՛ի ժառանգութի(ւն) ռուբինի եւ գադայ եւ կիսոյ ցեղին մանասէի։
Եւ զգուշասջի́ք առնել զա(մենայ)ն բանս ուխտիս այսորիկ. զի իմանայցէ́ք զա(մենայ)ն զոր առնիցէք։
Դուք կա́յք աւադիկ այսօր ամենեքեան առաջի տ(եառ)ն ա(ստուծո)յ ձերոյ. ցեղապե́տք ձեր, եւ ծերակոյտ ձեր, եւ դատաւո́րք ձեր, եւ ատենադպիրք ձեր, եւ ա(մենայ)ն այր ի(սրաէ)լի,
եւ կանայք ձեր, եւ որդիք ձեր, եւ եկն որ ՛ի միջի ձերում բնակէ. եւ ՛ի փայտակոտորէ́ ձերմէ մինչեւ ցջրբե́ր ձեր։
Յանցանել ձեր զուխտիւ տ(եառ)ն ա(ստուծո)յ ձերոյ, եւ զնզովիւք ն(ո)ր(ա) զոր տ(է)ր ա(ստուա)ծ քո ուխտէ́ քեզ այսօր։
զի կացուսցէ զքեզ իւր ժողովուրդ, եւ նա եղիցի քեզ ա(ստուա)ծ՝ ո(ր)պ(էս) եւ ասաց. եւ զոր օրինակ երդուաւ հարցն քոց՝ աբրահամու եւ սահակայ եւ յակոբու։
Եւ ո́չ ձեզ միայն ուխտեմ ես զուխտս զայս, եւ զնզովս զայսոսիկ,
այլ եւ որոց ա́ստ ը(նդ) մեզ իցեն այսօր առաջի տ(եառ)ն ա(ստուծո)յ մերոյ, եւ որոց չիցեն ընդ մեզ այսօր։
Զի դուք ինքնին գիտէք՝ ո(ր)պ(էս) բնակեցայք յերկրին եգիպտացւոց, եւ ո՞րպէս անցաք ը(նդ) մէջ ազգացն. ը(նդ) որս անցէք դուք.
եւ տեսէք զգարշելի́ս նոցա եւ զկո́ւռս իւրեանց, զփա́յտն եւ զքար, զարծա́թն եւ զոսկի. որ է́ առ նոսա։
Մի́ ոք իցէ ՛ի ձէնջ ա́յր կամ կին, կամ ա́զգ, կամ ցեղ՝ որոյ միտք իւր խոտորեա́լ իցեն ՛ի տ(եառն)է ա(ստուծո)յ իւրմէ, երթա́լ պաշտել զդիս ազգացն այնոցիկ։
եւ եղիցի եթէ լուիցէ զպատգամս նզովիցս այսոցիկ, եւ խոկասցի ՛ի սրտի իւրում՝ եւ ասիցէ, քաւութի(ւն)ք եղիցին ինձ. զի եթէ ես ըստ մոլորու(թ)ե(ան) սրտի իմոյ գնայցեմ. զի մի́ կորուսանիցէ մեղաւորն զանմեղն։
Եւ ո́չ հաճեսցի ա(ստուա)ծ ներել նմա այլ յայնժամ բորբոքեսցի́ բարկութի(ւն) ն(ո)ր(ա), եւ նախանձ ն(ո)ր(ա) ՛ի մարդն յայն. եւ հասցե́ն նմա ա(մենայ)ն նզովք ուխտիս այսորիկ, գրեա́լք ՛ի գրի օրինացս այսոցիկ. եւ ջնջեսցէ́ տ(է)ր զանուն ն(ո)ր(ա) ՛ի ներքոյ երկնից.
եւ զատուսցէ́ զնա տ(է)ր ՛ի չարիս յա(մենայ)ն որդւոցն ի(սրաէ)լի. ըստ ա(մենայ)ն նզովի́ց ուխտիս գրելոյ ՛ի գիրս օրինացս այսոցիկ։
Եւ ասիցեն ազգքն միւս՝ եւ որդիքն ձեր որ յարիցեն յե́տ ձեր, եւ օտարոտին որ գայցէ յերկրէ հեռաստանէ՝ տեսանիցեն զհարուածս երկրին այնորիկ. եւ զախտս ն(ո)ց(ա) զոր առաքեաց տ(է)ր ՛ի վ(ե)ր(այ) ն(ո)ց(ա).
զծըծումբն եւ զա́ղն այրեցեալ, յա(մենայ)ն ՛ի հող ն(ո)ր(ա) մի́ սերմանեսցի եւ մի́ բուսցի, եւ մի́ ելցէ ՛ի վ(ե)ր(այ) ն(ո)ր(ա) ա(մենայ)ն դեղ դալար։ Ո(ր)պ(էս) կործանեցան սոդոմ եւ գոմոր, ադամա́ եւ սեբոյիմ, զորս կործանեաց տ(է)ր սրամտութ(եամ)բ եւ բարկութ(եամ)բ։
Եւ ասասցեն ա(մենայ)ն ազգքն. ընդէ՞ր արար տ(է)ր այնպէս երկրին այնմիկ, զի՞նչ իցէ սրտմտու(թ)ի(ւն) մեծ բարկութե(ա)ն այնորիկ։
Պատասխանի́ տացեն եւ ասասցեն. զի թողին զուխտն ա(ստուծո)յ հա́րց իւրեանց, զոր ուխտեաց հարցն ն(ո)ց(ա), յորժամ եհա́ն զն(ո)ս(ա) յերկրէն եգիպտացւոց.
եւ գնացեալ պաշտեցին զաստուածս օտարս, եւ երկի́ր պագին ն(ո)ց(ա) զոր ո́չն ճանաչէին, եւ ո́չ բաժանեաց ն(ո)ց(ա)·
եւ բարկացաւ տ(է)ր սրտմտու(թեամ)բ ՛ի վ(ե)ր(այ) երկրին այնորիկ, ածե́լ ՛ի վ(ե)ր(այ) ն(ո)ր(ա) ը(ս)տ ա(մենայ)ն նզովից ուխտիս գրելոյ ՛ի մատենի օրինացս այսոցիկ։
Եւ եբա́րձ զն(ո)ս(ա) տ(է)ր յերկրէ իւրեանց, բարկութ(եամ)բ եւ սրտմտութ(եամ)բ եւ զայրացմամբ մեծա́ւ յոյժ. եւ մերժեաց զն(ո)ս(ա) յերկիր օտար մինչեւ ցայժմ։
Ծածուկքն տ(եառ)ն ա(ստուծո)յ մերում, եւ յայտնիքն մե́զ եւ որդւոց մերոց յաւիտեան՝ առնել զա(մենայ)ն պատգամս օրինացս այսոցիկ։
