Եւ եղեն որդւոցն յովսեփայ սահմանք, ՛ի յորդանանէ հանդէպ երիքոյի, ՛ի ջրոյ անտի որ հանդէպ երիքոյի, յարեւելից ընդ անապատն. եւ ամբառնան յերիքովէ ՛ի լեռնակողմ անապատին ՛ի բեթեղղուզ։
եւ ելանէ ՛ի բեթէղղուզայ, եւ անցանեն առ սահմանօքն արքիատարովթայ։
Եւ ելանեն ընդ ծովակողմն ՛ի սահմանս յեփաղթեայ, մինչեւ ցսահմանս բեթորոնայ ներքնոյ, եւ մինչեւ ցգազեր. եւ եղիցին ելք ն(ո)ց(ա) ը(նդ) ծովակողմն։
եւ ժառանգեցին որդիքն յովսեփայ՝ եփրեմ եւ մանասէ։
Եւ եղեն սահմանք որդւոցն եփրեմայ ըստ տոհմից իւրեանց։ եւ եղեն սահմանք ժառանգութե(ան) ն(ո)ց(ա), յարեւելից՝ աստարովթ, եւ ադար, մինչեւ ցբեթորոնն վերին, եւ ցգաղեր։
եւ անցանեն սահմանքն ընդ ծովակողմն ՛ի քամովթ ՛ի հիւսւսոյ. եւ պատիցի սահմանն ընդ արեւելս ՛ի թենաթսելով. եւ անցանէ յարեւլից առ յանովաւ։
եւ իջցէ յանովայ յաստարովթ, եւ ՛ի նաարաթա. եւ աւանք ն(ո)ց(ա)։ Եւ անցցեն առ երիքոյիւ, եւ հանցեն ՛ի յորդանան.
եւ ՛ի թափուեա անցցեն սահմանքն ՛ի ծովակողմն ՛ի հեղեղատն կանայ. եւ եղիցին ելք ն(ո)ր(ա) ՛ի ծովակողմն։ Ա́յս է ժառանգութի(ւն) ցեղի որդւոցն եփրեմի ը(ս)տ տոհմից իւրեանց։
Եւ քաղաքքն զատուցեալք որդւոցն եփրեմի, ՛ի մէջ ժառանգութե(ան) որդւոցն մանասէի։ եւ ա(մենայ)ն քաղաքք եւ աւանք ն(ո)ց(ա)։
Եւ ո́չ կորոյս եփրեմ զքանանացին բնակեալ ՛ի գազեր. եւ բնակէր քանանացին ՛ի մէջ եփրեմայ մինչեւ ցայսօր։ Մինչեւ ել փարաւոն արքայ եգիպտացւոց եւ ա́ռ զքաղաքն՝ եւ այրեաց զնա հրով. եւ զքանանացին եւ զփերեզացին զբնակեալն ՛ի գազեր խոտեաց. եւ ետ զնա փարաւոն պաշտակա́ն դստեր իւրում. եւ եղեն ծառա́յք հարկատուրք։
