Եւ յարեաւ յետ աբիմեղիքայ փրկել զի(սրա)էլ, թովղա որդի փուայ. որդի հօ́ր եղբօր ն(ո)ր(ա), այր յիսաքարայ. եւ նա բնակէր ՛ի սամարիա, ՛ի լերինն եփրեմայ։
Եւ դատեաց զի(սրա)էլ ամս քսան եւ երիս, եւ մեռաւ՝ եւ թաղեցաւ ՛ի սամարիա։
Եւ յարեաւ յետ ն(ո)ր(ա) յայի́ր գաղաադացի, եւ դատեաց զի(սրա)էլ ամս քսան եւ երկուս։
եւ եղեն ն(ո)ր(ա) որդիք՝ երեսուն եւ երկու, որ հեծանէին յերեսուն եւ երկո́ւ յովանակս. եւ երեսուն եւ երկու քաղաքք ն(ո)ց(ա)։ եւ կոչեաց զն(ո)ս(ա) աւանս յայիրայ մինչեւ ցայսօր, որ են ՛ի գաղաադ։
Եւ մեռաւ յայիր եւ թաղեցաւ ՛ի կամովն։
Եւ յաւելին որդիքն իսրայէլի առնել չա́ր առաջի տ(եառ)ն, եւ պաշտեցին զբահաղի́մսն, եւ զաստարովթն, եւ զաստուածս ասորւոց, եւ զաստուածս սիդոնայ, եւ զաստուածս մովաբայ, եւ զաստուածս որդւոցն ամոնայ, եւ զաստուածս այլազգեացն։ եւ թողին զտ(է)ր, եւ ո́չ ծառայեցին նմա։
Եւ սրտմտեցաւ բարկութ(եամ)բ տ(է)ր ի(սրաէ)լի, եւ մատեաց զն(ո)ս(ա) ՛ի ձեռս այլազգացն, եւ ՛ի ձեռս որդւոցն ամոնայ։
եւ խախտեցին խորտակեցին զորդիսն ի(սրաէ)լի ՛ի ժամանակին յայնմիկ ա́մս ո́ւթուտասն զա(մենայ)ն ի(սրա)էլցիս յա́յնկոյս յորդանանու, յերկրի ամովրհացւոցն՛ի գաղաադ։
Եւ անցին որդիքն ամոնայ ը(նդ) յորդանան տա́լ պատերազմ ընդ յուդայ եւ ընդ բենիամինի, եւ ը(նդ) տանն եփրեմայ. եւ նեղեցան որդիքն ի(սրաէ)լի յոյժ։
Եւ աղաղակեցին որդիքն ի(սրաէ)լի առ տ(է)ր՝ եւ ասեն. մեղա́ք քեզ, զի թողաք զա(ստուա)ծդ մեր՝ եւ պաշտեցաք զբահաղիմսն։
Եւ ասէ տ(է)ր ցորդիսն ի(սրաէ)լի. ո՞չ ապաքէն եգիպտացիք եւ ամուրհացիք, եւ որդիք ամոնայ, եւ մովաբ, եւ այլազգիք,
եւ սիդոնացիք, եւ ամաղէկ եւ քանան՝ նեղեցի́ն զձեզ, եւ աղաղակեցէք առիս՝ եւ փրկեցի զձեզ ՛ի ձեռաց ն(ո)ց(ա)։
Եւ դուք թողէք զիս՝ եւ ծառայեցէք աստուածոց օտարաց. վ(ա)ս(ն) այնորիկ ո́չ յաւելից փրկել զձեզ։
այլ երթա́յք աղաղակեցէք առ աստուածսն զոր ընտրեցէք ձեզ. եւ նոքա́ փրկեսցեն զձեզ ՛ի ժամանակի նեղու(թ)ե(ան)ց ձերոց։
Եւ ասեն որդիքն ի(սրաէ)լի ցտ(է)ր. մեղա́ք, արա́ դու ընդ մեզ զա(մենայ)ն, որ ինչ հաճոյ թուի առաջի քո. բայց տ(է)ր՝ միայն ապրեցո́ զմեզ յաւուր յայսմիկ։
Եւ մերժեցին զաստուածսն օտարոտիս ՛ի միջոյ իւրեանց. եւ պաշտեցին զտ(է)ր միայն։ եւ ո́չ հաշտեցաւ ը(նդ) ժողովրդեանն։ եւ յոգի́ս ապաստան եղեւ յաշխատու(թեն)է ի(սրաէ)լի։
Եւ ելին որդիքն ամոնայ, եւ բանակեցան ՛ի գաղաադ։ եւ ելին որդիքն ի(սրաէ)լի, եւ բանակեցան ՛ի գիտանոցին։
Եւ ասեն իշխանք ժողովրդեանն գաղաադու՝ այր ցընկեր իւր. այր որ սկիզբն առնիցէ պատերազմել ընդ որդիսն ամոնայ, եղիցի գլո́ւխ ա(մենայ)ն բնակչացս գաղաադու։
