ყოველი ოქროჲ, რომელი შეემსახურა საქმესა მას ყოვლისა მისებრ საქმისა წმიდათაჲსა, იყო ოქროჲსა მის შესაწირავისა, ოც და ცხრა ქანქარ და შჳდას და ოც და ათ სიკლა სიკლითა მით წმიდითა.
და ვეცხლი შეწირული აღრაცხილთა მათგან კაცთა კრებულისათა ას ქანქარ და ათას შჳდას და სამეოც და ათხუთმეტ სიკლა
და დრაქმე ერთი თავად-თავად ნაზოგალი სიკლისაჲ, სიკლითა მით წმიდითა.
ყოველი, რომელი წარმოვიდოდა ახილვასა მას ოცით წლითგანი და უზეშთაჱსი, სამეოცისა მის ბევრისაჲ და სამ ათას ხუთას ერგასისაჲ.
და იყო ათი იგი ქანქარი ვეცხლისაჲ გამოსადნობელად დასხმით სუეტის თავებად კარვისა მის და სუეტის თავად კრეტსაბმელისა.
ასი სუეტის თავები ასისა მის ქანქარისაჲ. ქანქარი ერთი იყო სუეტის თავი ერთი.
და [ათას] შჳდას სამეოც და ათხუთმეტ სიკლაჲ Page of ms. O: 116r ქმნეს იდაყუებად სუეტებისა მის და ოქრო-ცხებულ სუეტის თავები იგი და შეემკო იგი.
და რვალი იგი შესაწირავისაჲ ოთხას სამეოც და ათ ქანქარ და ორ ათას ოთხას სიკლაჲ.
და ქმნა მისგან...
.. ხარისხები იგი ბჭეთა მათ ეზოჲსათაჲ და მანაებად კარვისა და მანაებად ეზოჲსა მის გარემო საკურთხეველისა მის.
... და ყოველი ჭურჭერი საკურთხეველისაჲ და ყოველი საქმარი საკურთხეველისაჲ მის საწამებელისაჲ.
და ყვეს ძეთა ისრაჱლისათა ეგრე, ვითარცა უბრძანა უფალმან მოსეს.
ხოლო ნეშტი იგი ოქროჲსაჲ მის შეწირულისაჲ ქმნეს სამსახურებელად წინაშე უფლისა.
და ნეშტი იაკინთისაჲ და ძოწეულისაჲ და მეწამულისაჲ და ზეზისაჲ ქმნეს სამოსლად სამსახურებელად აჰრონისა, რაჲთა ჰმსახურებდეს მით სიწმიდესა მას შინა.
და მოიღეს სამოსელი იგი მოსეს წინაშე და კარავი იგი და ყოველი ჭურჭერი მისი და მოქლონები და ხარისხები მისი და სუეტები.
და კიდობანი იგი შჯულისაჲ და აღსაპყრობელნი მისნი.
და საკურთხეველი და ყოველი ჭურჭერი მისი და ზეთი იგი ცხებისაჲ და საკუმეველი იგი შეზავებისაჲ
და სასანთლჱ იგი წმიდაჲ
და სანთელნი მისნი, Page of ms. O: 116v სანთელნი სანთებელნი და ზეთი იგი ნათლისაჲ.
და ტაბლაჲ იგი წინაშე დასაგებელი და ყოველივე სასანოვაგე ჭურჭერი მისი და პურნი იგი შესაწირავთანი.
და სამოსლები იგი სიწმიდისაჲ, რომელ არიან აჰრონისი, და სამოსელნი იგი ძეთა მისთანი სამღდელონი.
და საბურველი იგი წარმოსაყოფელი ეზოჲსაჲ, სუეტნი და ხარისხნი მისნი და კრეტსაბმელი [კარისა] კარვისაჲ მის და ბჭისაჲ მის ეზოჲსაჲ.
და ყოველივე ჭურჭერი კარვისაჲ და ყოველი საქმარი მისი,
მაშკები იგი ტყავებისა ვერძთაჲსაჲ ენდროჲს ფერი და ბურვილი იგი ტყავებისა მის სიავისათაჲ და სხუათა მათ სახურველები იგი,
და მანები იგი და ყოველივე საქმარი საქმისაჲ მის კარვისა საწამებელისაჲ,
რავდენი უბრძანა უფალმან მოსეს; ეგრე ყვეს ძეთა ისრაჱლისათა ყოველივე მომზადებაჲ.
და იხილა მოსე ყოველი იგი ქმნული და მოჰმზადა იგი, ვითარცა უბრძანა უფალმან მოსეს, ეგრეთ მოექმნა იგი. და აკურთხნა იგინი მოსე.
