და ეტყოდა უფალი მოსეს და ჰრქუა:
ერთსა დღესა თჳსა მის პირველისასა თჳს თავსა აღჰმართო შენ კარავი ეგე საწამებელისაჲ
და დასდგა კიდობანი იგი წამებისაჲ და Page of ms. O: 117r დაჰბურო კიდობანი იგი საბურველითა.
და შეიღო ტაბლაჲ იგი და დააგო მას ზედა დასაგებელი მისი და მიიღო სასანთლჱ იგი და დასდგნე მას ზედა სანთელნი მისნი
და დასდგა საკურთხეველი იგი ოქროჲსაჲ კუმევად საკუმეველისა წინაშე კიდობანსა მას საწამებელისასა. და დაჰბურო საბურველი იგი კრეტსაბმელისაჲ კარსა მას კარვისა საწამებელისასა.
და საკურთხეველი იგი ნაყოფთაჲ დასდგა წინაშე კარსა კარვისა მის საწამებელისასა
და მოადგა ეზოჲ გარემო
და მოიღო ზეთი იგი ცხებისაჲ და სცხო კარავსა მას და ყოველი რაჲ არს მას შინა და განსწმიდო იგი და ყოველი ჭურჭერი მისი, და იყოს წმიდა;
და სცხო საკურთხეველსა მას ნაყოფთასა და ყოველსა ჭურჭერსა მისსა
და განსწმიდო საკურთხეველი იგი და იყოს წმიდა წმიდათა.
და მოიყვანო აჰრონ და ძენი მისნი წინაშე კარსა კარვისა მის საწამებელისასა და განჰბანნე იგინი წყლითა.
და შემოსო აჰრონს სამოსელი იგი წმიდაჲ და სცხო მას და წმიდა იყოს იგი ჩემდა მღდელად.
და ძენი მისნი მოიყვანნე და შეჰმოსო მათ სამოსელი.
და სცხო მათ, ვითარცა-იგი სცხე მამასა მათსა, და მღდელობდეს იგინი ჩემ წინაშე ...
Page of ms. O: 117v და ყო ეგრე მოსე, ვითარცა-იგი უბრძანა მას უფალმან, ეგრეცა ქმნა.
და იყო თუესა მას პირველსა მეორესა წელსა გამოსლვასა მათსა ეგჳპტით თჳს თავსა აღემართა კარავი იგი.
და აჰმართა მოსე კარავი იგი და დადგნა სუეტის თავნი მისნი და განუთხინა მოქლონნი იგი და აჰმართნა სუეტის თავნი მისნი.
და განჰმართა ეზოები იგი კარავსა მას და დაჰბურა საბურველი იგი კარვისაჲ მის მას ზედა-კერძო, ვითარცა-იგი უბრძანა უფალმან მოსეს.
და მოიხუნა საწამებელნი იგი და შთასხნა იგინი კიდობანსა მას და განუთხინა უღელნი იგი ქუეშე-კერძო კიდობანსა მას.
და შეიღო კიდობანი იგი შინაგან კარავსა მას და დაჰბურა საფარველი იგი კრეტსაბმელისაჲ და დაფარა კიდობანი იგი წამებისაჲ, ვითარცა უბრძანა უფალმან მოსეს.
და დადგა ტაბლაჲ იგი კარავსა მას შინა საწამებელისასა ... ჩრდილოჲთ კერძო გარეშე-კერძო კრეტსაბმელსა მას კარვისა მის საწამებელისასა.
და დააგო მას ზედა პური იგი შესაწირავი წინაშე უფლისა, ვითარცა [უბრძანა] უფალმან მოსეს.
და დადგა სასანუვაგჱ (!) იგი კარავსა მას საწამებელისასა ადგილსა მას სამხრით კერძო.
და დადგნა სანთ/ელნი Page of ms. O: 118r იგი მისნი მას ზედა წინაშე უფლისა, ვითარცა უბრძანა უფალმან მოსეს.
და დადგა საკურთხეველი ოქროჲსაჲ კარავსა მას შინა საწამებელისასა წინაშე კრეტსაბმელსა მას.
და აკუმია საკუმეველი იგი აღზავებული მას ზედა, ვითარცა-იგი უბრძანა უფალმან მოსეს.
და საკურთხეველი იგი ნაყოფთაჲ დადგა კართა თანა კარვისა მის საწამებელისათა
და აღდგა ეზოჲ იგი გარემო კარავსა მას და საკურთხეველსა. და აღასრულა მოსე ყოველივე იგი საქმჱ.
და დაფარა ღრუბელმან კარავი იგი საწამებელისაჲ და აღივსო დიდებითა უფლისაჲთა კარავი იგი.
და ვერ ჴელ-ეწიფა მოსეს შესლვად კარავსა მას საწამებელისასა, რამეთუ აგრილობდა მას ზედა ღრუბელი იგი და დიდებითა უფლისაჲთა აღივსო კარავი იგი.
რაჟამს აღმაღლდის ღრუბელი იგი კარვისა მისგან, აღებნიან ძენი ისრაჱლისანი წარძრვად ვანითურთ მათით.
უკუეთუ არა აღიმაღლის ღრუბელმან მან, არა აღებნიან ძრვად მუნ დღედმდე, ვიდრემდე აღიმაღლის ღრუბელმან მან,
რამეთუ ღრუბელი იყო კარავსა მას ზედა დღისი და ცეცხლი იყო მას ზედა ღამე [წინაშე] ყოვლისა ისრაჱლისა ყოველსა მას ვანის ძრვასა მათსა.
