ვიხილე მე უფალი მდგომარჱ საკურთხეველსა ზედა, და თქუა; დაეცსაკურთხეველსა <ზედა>, და შეიძრას ბჭეთა წინაშე, და განკუეთე თავსა ზედა ყოველთასა, და ნეშტნი იგი მათნი მახჳლითა მოვსწყჳდნე, არა მოაკლდეს მათგანი მეოტი, და არა განერეს მათგანი განრინებული.
დაღათუ დაეფარნენ ჯოჯოხეთს, მიერ ჴელმან ჩემმან აღმოიტაცნეს იგინი, დაღათუ აღჴდენ ცად, მიერ გარდამოვსთხინე იგინი.
უკუეთუ დაეფარნენ თხემსა კარმელისასა, მიერ გამოვიძინე, და მოვიყვანნე იგინი, და უკუეთუ შთაჴდენ თუალთაგან ჩემთა სიღრმესა ზღჳსასა, მუნ უბრძანო ვეშაპსა, და უკბენდეს მათ.
და უკუეთუ წარვიდენ ტყუედ პირსა წინაშე მტერთა მათთისა მუნ უბრძანო მახჳლსა, და Page of ms. J: B12r მოვსწყჳდნე იგინი, და ვიგნე/ თუალნი ჩემნი მათ ზედა ბოროტად და არა კეთილად.
და უფალი ღმერთი არს, რომელი შეახებს ქუეყანასა, და შესძრავს მას, და იგლოვდენ ყოველნი მკჳდრნი მისნი, და აღმოვიდეს; ვითარცა მდინარე აღსასრული მისი, და წარმოეცეს ვითარცა მდინარჱ ეგჳპტისაჲ.
რომელი აშენებს ზეცად აღსლვასა თჳსსა, და აღთქუმასა ქუეყანასა ზედა დააფუძნებს, რომელი მოუწესს წყალსა ზღჳსასა, და მიჰფინის პირსა ქუეყანისასა, უფალ ყოვლისა-მპყრობელ სახელი მისი.
არა ვითარცა ძენი ეთიოპელთანი ხართ თქუენ ჩემდამო, ძენო ისრაჱლისანო, იტყჳს უფალი, ანუ არა ისრაჱლი აღმოვიყვანე ქუეყანით ეგჳპტით, და უცხოთესლნი კაბადუკიაჲთ, და ასურნი მღჳმით.
აჰა ესერა თუალნი უფლისა ღმრთისანი მეფობასა ზედა ცოდვილთასა, და აღვიღო იგი პირისაგან ქუეყანისა, ხოლო არა სრულიად აღვიღო სახლი იაკობისი, იტყჳს უფალი.
აჰა ესერა მე ვამცნო, და განვაბნიო ყოველთა შორის თესლთა სახლი ისრაჱლისაჲ; ვითარცა იგი განიქრიის სანქრეველითა, და არა დავარდის განსამუსრველი ქუეყანასა ზედა.
მახჳლითა ა<ღ>ესრულნენ ყოველნი ცოდვილნი ერისა ჩემისანი, რომელნი იტყჳან, არა მოგუეახლოს, არცა მოიწიოს ჩუენ ზედა ბოროტი.
მას დღესა შინა აღვჰმართო კარავი დავითისი დაცემული, და აღვაშჱნო დარღუეული მისი, ვითარცა დღენი საუკუნენი,
რაჲთა გამოიძიონ ნეშტთა კაცთა ღმერთი, და ყოველთა თესლთა, რომელთა ზედა წოდებულ არს სახელი ჩემი, იტყჳს უფალი, რომელმან ქმნა ესე ყოველი.
აჰა ესერა დღენი მოვლენან, იტყჳს უფალი, და მიიწიოს ლეწვაჲ სდულებად, და ლწიფოოდის ყურძენი თესლსა შინა, და გამოადინებდენ მთანი სიტკბოებასა, და ყოველნი ბორცუნი Page of ms. J: B12v ნერგოვან იყვნენ.
და მოვაქციო ტყუჱ ერისა ჩემისა ისრაჱლისაჲ,/ და აღაშჱნნენ ქალაქნი განრყუნილნი, და ემკჳდრნენ მათ შინა, და დაასხან ვენაჴები, და სუმიდენ ღჳნოსა მათსა; და იქმნენ მტილები, და ჭამდენ ნაყოფსა მათსა.
და დავჰნერგნე იგინი ქუეყანასა მათსა, და არღარა ა<ღ>იფხურნენ ქუეყანით მათით, რომელი მივეც მათ, იტყჳს უფალი ღმერთი ყოვლისა-მპყრობელი.: .: .:
