და იყოს უკუანაჲსკნელთა დღეთა გამოჩინებულ მთაჲ უფლისაჲ და განმზადებულ თხემსა ზედა მთათასა და აღმაღლდეს უფროჲს ყოველთა ბორცუთა და მოისწრაფდენ მუნ ერნი.
და მოვიდოდიან თესლნი მრავალნი, და იტყოდიან, მოვედით და აღვედით მთასა უფლისასა და სახლსა ღმრთისა იაკობისსა, და მიჩუენოს ჩუენ გზაჲ მისი, და ვიდოდით ალაგთა მისთა, რამეთუ სიონით გამოვიდეს შჯული, და სიტყუაჲ უფლისაჲ იჱრუსალემით.
და შჯიდეს შორის ერსა მრავალსა, და ამხილებდეს ნათესავთა ძლიერთა ვიდრე შორადმდე. და დაშჭრიდენ ჴრმლებსა მათსა საჴნისებად, და ლახურებსა მათსა მანგლებად, და არღარა აღიღოს ნათესავმან ნათესავსა ზედა მახჳლი, და არღარა ისწრაფებდენ ბრძოლასა.
და განისუენებდეს კაცად-კაცადი ქუეშჱ ვენაჴსა თჳსსა, და კაცად-კაცადი ქუეშჱ ლეღუსა თჳსსა, და არა ვინ იყოს მაშინებელ, რამეთუ პირი უფლისა ყოვლისა-მპყრობელისაჲ იტყოდა ამას.
რამეთუ ყოველი ერი კაცად-კაცადი ვიდოდის გზასა თჳსსა, ხოლო ჩუენ ვიდოდით სახელითა უფლისა ღმრთისა ჩუენისაჲთა უკუნისამდე და მერმეცა.
მას დღესა შინა იტყჳს უფალი; შევკრიბნე შემუსრვილნი იგი, და განძებულნი იგი შევიწყნარნე, და რომელნი იგი განვიშორენ.
და დავსხნე შემუსრ/ვილნი Page of ms. J: A7v იგი ნეშტად, და განშორებულნი იგი ნათესავად დიდად და ძლიერად; და მეუფებდეს უფალი მათ ზედა სიონს შინა ამიერითგან და მი-უკუნისამდე.
და შენ გოდოლო სამწყსოჲსაო, მაღალო ასულო სიონისაო, შენ ზედა მოიწიოს, და შევიდეს დასაბამი პირველი მეფისა ბაბილონისაჲ ასულისა იჱრუსალემისა.
და აწ რაჲსათჳს სცან ბოროტი, ნუ უკუჱ მეუფჱ არა გესუაა შენ, ზრახვაჲ შენი წარწყმდა, რამეთუ შეგიპყრეს შენ სალმობათა ვითარცა შობადისათა.
გელმოდენ და მჴნე იყავ, და მიეახლე ასული სიონისაჲ ვითარცა შობადი, რამეთუ აწ განხჳდე ქალაქით, და დაემკჳდრო ველსა ზედა, და შეხჳდე ვიდრე ბაბილონდმდე. მიერ განგარინოს შენ, და მიერ გიჴსნეს შენ უფალმან ღმერთმან შენმან ჴელთაგან მტერთა შენთასა.
და აწ შეკრბა შენ ზედა ნათესავი არავალი, რომელნი იტყჳან, მოგუცხრების და იხილონ თუალთა ჩუენთა სიონი,
და მათ ვერ ცნეს ზრახვაჲ უფლისაჲ, და არა გულის-ხმა-ყვნეს ნებანი მისნი, რამეთუ შეკრიბნეს იგინი ვითარცა მჭელეულები კალოჲსაჲ.
აღდეგ და ლეწევდი მათ, ასულო სიონისაო, რამეთუ რქანი შეგასხნე შენ რკინისანი, და ჭლიკნი შენნი შეგადგნე რვალისანი, და დაამწულილნე ერნი მრავალნი, და დაამჴუნე მით წარმართნი, და შეჩუენებულ ჰყო უფლისა სიმრავლე მათი, და ძალი მათი უფლისა ყოვლისა ქუეყანისა.: Page of ms. J: A8r
