და თქუას; ისმინეთ აწ მთავართა სახლისა იაკობისთა და ნეშტთა სახლისა ისრაჱლისათა; არა თქუენი არს ცნობად სამართალისა,
რომელთა გძულს კეთილი და გიყუარს ბოროტი, მოჰჴდით ტყავსა მათსა მათგან და ჴორცსა მათსა ძუალთაგან მათთა.
ვითარცა შეჭამნეს ჴორცნი ერისა ჩემისანი და ტყავი მათი მათგან განსძარცუეს და ძუალნი მათნი შემუსრნეს და ასოეულად განაგდეს ვითარცა ჴორცი სიავსა შიდა და ვითარცა დრონეული ქოთანსა შინა,
ეგრეთ ღაღადებდენ უფლისა მიმართ და არა ისმინოს მათი და გარე-მიაქციოს პირი მისი Page of ms. J: A6v მათგან მას ჟამსა შინა ვითარცა/ იგი ბოროტი ყვეს საქმითა მათითა მათ ზედა.
ამას იტყჳს უფალი წინაწარმეტყუელთა მათთჳს რომელნი აცთუნებენ ერსა ჩემსა, რომელნი უკბენენ კბილითა მათითა და რომელნი უქადაგებენ მათ მშჳდობისა და არა მოეცა პირსა მათსა, აღადგინა მათ ზედა ბრძოლაჲ; [!]
ამისთჳს ღამე იყოს თქუენდა ხილვისაგან და ბნელი იყოს თქუენდა მისნობისაგან და დაჰჴდეს მზჱ წინაწარმეტყუელთა ზედა და დაბნელდეს მათ ზედა დღჱ.
და ჰრცხუენოდის რომელნი ხედვიდეს ჩუენებასა და საკიცხელ იყვნან მისანნი და ძჳრსა იტყოდიან მათთჳს ყოველნივე იგი, რამეთუ არა ზყოს რომელმანმცა ისმინა მათი.
უკუეთუ მე არა აღვავსო ძალი სულითა უფლისაჲთა და სამართალითა და ძლიერებითა მითხრობად იაკობისა უღმრთოებანი მისნი და ისრაჱლსა ცოდვანი მისნი.
ისმინეთ ესე წინამძღუარნო სახლისა იაკობისნო და ნეშტთა მაგათ სახლისა ისრაჱლისათა, რომელთა ეგე გძაგს სამართალი და ყოველსავე მართალსა გარდაჰგულარძნით.
რომელნი აშენებთ სიონსა სისხლითა და იჱრუსალემსა სიცრუვითა;
წინამძღუარნი მისნი ქრთამით შჯიდეს და მღღელნი მისნი სასყიდლით სიტყუასა მიუგებდეს და წინაწარმეტყუელნი მისნი ვეცხლითა უმისნიდეს და უფლისა ზედა განისუენებდეს და იტყოდეს; ანუ არა უფალი ჩუენ თანა არს, არა მოვიდეს ჩუენ ზედა ბოროტი.
ამისთჳს თქუენ ძლით სიონი ვითარცა ყანაჲ Page of ms. J: A7r მოი/ჴნას და იჱრუსალემი ვითარცა ხილის-საცავი იქმნეს და მთაჲ იგი სახლისა უფლისაჲ ვითარცა სერტყი მაღნარისაჲ.:
