ისმინეთ ესე, რასა უფალი იტყოდა. უფალმან თქუა, აღდეგ და ეშჯოდე მთათა, და ისმინედ ბორცუთა ჴმაჲ შენი.
ისმინეთ ბორცუნო საშჯელი უფლისაჲ, და ჴევთა საფუძველთა ქუეყანისათა, რამეთუ საშჯელი უფლისაჲ ერისა მიმართ თჳსისა, და ისრაჱლისა თანა შეეტყუას.
ერო ჩემო, რაჲ გიყავ შენ, ანუ რაჲთა შეგაწუხე შენ, ანუ რაჲთა შეგაურვე შენ; მომიგე მე სიტყუაჲ./ Page of ms. J: A9r
ამისთჳს, რამეთუ აღმოგიყვანე შენ ქუეყანით ეგჳპტით, და სახლისაგან კირთებისა გიჴსენ შენ, და გამოვავლინე წინაშე პირსა შენსა მოსჱ და აჰრონ და მარიამ.
ერო ჩემო, მოიჴსენე რაჲ იგი იზრახა შენ ზედა ბალაკ მეფემან მოაბისამან, და რაჲ იგი მიუგო მას ბალამ ძემან ბეორისმან საბელთაგან ნაწილთასა ვიდრე გალგალადმდე, რაჲთა საცნაურ იყოს სიმართლჱ უფლისაჲ.
რაჲთა მე წარვეწიო უფალსა, და შემწე ვეყო მე ღმერთსა ჩემსა მაღალსა. უკუეთუ ვეწიო მას მსხუერპლებითა ანუ ზუარაკებითა წელიწადეულითა.
უკუეთუ შეიწიროს უფალმან ათასეული ვერძთაჲ, ანუ ბევრეული ვაცთა მართებულთაჲ; უკუეთუ მივსცნე პირმშონი ჩემნი უღმრთოებისათჳს, და ნაყოფი მუცლისა ჩემისაჲ ცოდვისათჳს სულისა ჩემისა.
მე გითხრა შენ, კაცო, რაჲ იგი არს კეთილ, ანუ რასა ეძიებს უფალი შენგან, არამედ ყოფად სიმართლესა, და რაჲთა გიყუარდეს წყალობაჲ, და განმზადებულ იყო ყოფად, რაჲთა ხჳდოდი ღმრთისა შენისა თანა.
ჴმაჲ უფლისაჲ ქალაქსა ეწოდოს, და აცხოვნნეს მოშიშნა სახელისა მისისანი, ისმინეთ ტომთა, ვინ შეამკოს ქალაქი.
ნა უკუჱ ცეცხლმან და სახლი უშჯულოჲსაჲ, რომელი იუნჯებდეს საუნჯეთა უშჯულოთა, და გინებით სიცრუესა. Page of ms. J: A9v
უკუეთუ განმართლდეს უღლითა უშჯულოჲ იგი, და პა/ვასიკითა და სასწორითა ზაკულითა,
რომელთაგან სიმდიდრჱ მათი უღმრთოებით აღავსეს, და რომელნი მკჳდრ არიან მას შინა. იტყოდეს სიცრუესა, და ენაჲ მათი აღმაღლდა პირსა მათსა.
და მეცა გტანჯე შენ განქარვებითა ცოდვისათჳს შენისა.
შენ შჭამდე, და ვერ განსძღე, და განგაძო შენ, და გეწიოს, და შენ ვერ განერე, და რაოდენნი განერნენ, მახჳლსა მიეცნენ.
შენ სთესო, და ვერ განჰლეწო; შენ გამოსწურო ზეთი, და არა იცხო ზეთი, და დასწნიხო ღჳნოჲ, და არა სუა ღჳნოჲ; და განირყუნეს შჯულიერებაჲ ერისა ჩემისაჲ.
და ყოველი საქმჱ სახლისა აქაბისი, და ხჳდოდეთ თქუენ ზრახვათა მათთა-ებრ, რაჲთა მიგცე შენ განსარყუნელად, <და> რომელ დამკჳდრებულ არიან მას შინა სასტჳნველად, და ყუედრებაჲ ერთაჲ მოიღოთ.: .:
