ითხოვდით უფლისაგან წჳმასა ჟამსა თჳსსა მსთუასა და მცხუედსა; უფალმან ყო საუცარი, და წჳმაჲ ზამთრისაჲ მოსცეს მათ თითოეულსა მწუანვილი ველსა ზედა;
რამეთუ გამომეტყუელნი იგი იტყოდეს შრომასა, და მისანნი ხილვასა ტყუვილისასა, <და> საჩუენებელსა ნაცილსა იტყოდეს, და ამაოსა ნუგეშინის-სცემდეს; ამისთჳს განჴმეს, რამეთუ არა იყოს კურნება.
მწყემსთა ზედა განრისხნა გულის-წყრომაჲ ჩემი, და ტარიგთა მათ მივხედო, და მოხედვა ყოს უფალმან ღმერთმან ყოვლისა-მპყრობელმან სამწყსოსა თჳსსა სახლსა იუდაჲსსა, და დააწესნეს იგინი ვითარცა ცხენნი შუენიერნი მისნი ბრძოლ<ა>სა შინა.
მისგან მოიხილა, და მისგან დააწესა, და მისგან მშჳლდი გულის-წყრომისაჲ; მისგან გამოვიდეს ყოველი გამომხილველი მასვე ზედა./ Page of ms. J: A28r
და იყვნენ ვითარცა მბრძოლნი რომელნი დასთრგუნვედ თიჴასა გზასა ზედა ბრძოლასა შინა, და განეწყვნენ, რამეთუ უფალი მათ თანა არს, და ჰრცხუენეს აღმჴედრებულთა ჰუნეთა ზედა.
და განვაძლიერო სახლი იუდაჲსი, და სახლი იოსებისი ვიჴსნე, და დავაშჱნნე იგინი, რამეთუ შევიყუარენ იგინი, და იყვნენ ეგრე ვითარცა სახედ არა გარე-მივექეც მათ <გან>, რამეთუ მე ვარ უფალი ღმერთი მათი, და ვისმინო მათი.
და იყვნენ ვითარცა მბრძოლნი ეფრემისნი, და უხაროდის გულთა მათთა ვითარცა ღჳნითა, და შვილთა მათთა იხილონ, და იხარებდენ, და უხაროდის გულთა მათთა უფლისა მიმართ.
ვაუწყო მათ, და შევიწყნარნე იგინი, რამეთუ ვიჴსნნე იგინი, და განმრავლდენ ვითარცა იგი იყვნეს მრავალ.
და განვსთესნე იგინი ერსა შორის, და შორიელთა მომიჴსენონ მე. განზარდნენ შვილნი მათნი, და მოიქცენ;
და მოვაქცინე იგინი ქუეყანით ეგჳპტით, და ასურეთით შევიწყნარნე იგინი, და გალაადელთა და ლიბანედ შევიყვანნე იგინი, და არა ვინ დაშთეს მათგანი არცა ერთი.
და განვიდენ ზღუასა მას იწროსა, და განაჴნენ ზღუასა ზედა ღელვანი, და განჴმენ ყოველნი სიღრმენი მდინარეთანი, და მოეღოს მათ <გან> გინებაჲ ასურასტანელთაჲ, და კუერთხი ეგჳპტისაჲ მოესპოს მათ.
და განვაძლიერნე იგინი უფლითა ღმრთითა მათითა, და სახელითა მისითა იქადოდიან. ამას იტყჳს უფალი.:
