და დაშთე მარტოჲ და ქუეყანად დაჰმდაბლდე. და მოუჴდენ შჳდნი დედანი კაცსა ერთსა და ეტყოდიან. პური ჩუენი ვჭამოთ, და სამოსელი ჩუენი შევიმოსოთ, გარნა სახელი შენი წოდებულ იყავნ ჩუენ ზედა, და მომისპე ყუედრებაჲ ჩუენი.
მას დღესა შინა გამოაბრწყინოს ღმერთმან ზრახვათა დიდებით Page of ms. J: A38v ქუეყანასა ზედა/ აღმაღლებად და დიდებად ნეშტი იგი ისრაჱლისაჲ.
და იყოს ნეშტი იგი ისრაჱლისაჲ სიონს შინა, და ნეშტი იჱრუსალემს წმიდა ეწოდოს, რომელნი დაწერილ არიან ცხორებად იჱრუსალემს.
რამეთუ გამოჰრცხას უფალმან მწინკული იგი ძეთა და ასულთა სიონისთაჲ, და სისხლი იჱრუსალემისაჲ განწმიდოს შორის მისსა სულითა საშჯელისაჲთა და სულითა შემწუველითა.
და მოვიდეს და იყოს, ყოველი ადგილი მთისა სიონისაჲ და ყოველი ადგილი გარემო მისა. და აგრილობდეს ღრუბელი დღისი, და ვითარცა კუამლი ცეცხლისაჲ და ბრწყინვალებაჲ ნათლისაჲ ღამჱ, და ყოვლითა დიდებითა აგრილობდეს.
და იყოს საგრილი სიცხისაგან დასაფარველ, და საყუდელ სიცხისაგან და წჳმისა.
