და იყო ჩემდამო სიტყუაჲ უფლისაჲ, და მრქუა;
ძეო კაცისაო, განიმტკიცე პირი შენი მთათა მიმართ ისრაჱლისათა, და წინაწარმეტყუელებდ მათ ზედა, და ჰრქუა;
მთანო ისრაჱლისანო, ისმინეთ სიტყუაჲ უფლისაჲ. ამას იტყჳს უფალი უფალი მთათა და ღელეთა, და ბორცუთა და ჴევნებსა, აჰა ესერა მე მოვჰჴადო თქუენ ზედა მახჳლი, და მოისრნენ მაღალნი თქუენნი.
და შეიმუსრნენ საკურთხეველნი თქუენნი და ბაგინები თქუენი, და დავსცნე წყლულნი თქუენნი წინაშე კერპთა თქუენთა.
და განვაბნინე ძუალნი თქუენნი გარემო საკურთხეველებსა თქუენსა,
ყოველთა შინა სამკჳდრებელთა თქუენთა. ქალაქნი მოოჴრდენ და მაღალნი იგი განირყუნენ, რაჲთა მოვსრა საკურთხე<ვე>ლები თქუენი, და შეიმუსროს კერპები თქუენი, და მოოჴრდეს ბაგინები თქუენი.
და დაეცნენ წყლულნი შორის თქუენსა, და სცნათ რამეთუ მე ვარ უფალი უფალი.
რაჟამს იყოს თქუენგანი განრინებული წარმარ<თ>თა შორის მახჳლისაგან ჩემისა, და განბნევასა მას თქუენსა სოფლებსა შორის.
და მომიჴსენონ მე განრინებულთა მათ თქუენთა წარმართთა შორის, სადა იგი წარიტყუენნეს მუნ, რამეთუ ვფუცე გულსა მას მათსა განდგომილსა ჩემგან, და თუალთა მათთა მსიძავთა შე<მ>დგომად კუალსა სლვათა მათთასა, და იცემდენ პირთა მათთა უკეთურებათა მათთათჳს, რომელი ქმნეს ყოველთა შინა საძაგელებათა მათთა.
და გულის-ჴმა-ყონ რამეთუ მე ვარ უფალი; უფალი ვიტყოდე.
ამას იტყჳს უფალი უფალი; დაიტყუელენ ჴელითა, და დაიბგერენ ფერჴითა, და თქუ; ვაშა ყოველთა ზედა საძაგელებათა სახლისა ისრაჱლისათა; მახჳლითა და სიკუდილითა და სიყმილითა დაეცნენ.
მახლობელი იგი სიკუდილითა Page of ms. J: B62r დაეცეს და შორიელი/ იგი სიკუდილითა აღესრულოს, და გარე-მოცეული იგი სიყმილითა მოისპოს, და აღვასრულო რისხვაჲ ჩემი მათ ზედა,
და სცნათ რამეთუ მე ვარ უფალი, რაჟამს იყვნენ წყლულნი თქუენნი შორის კერპთა თქუენთა გარემო საკურთხეველთა თქუენთა, ყოველთა ზედა ბორცუთა მაღალთა, და ყოველსა ქუეშჱ ხესა საგრილსა, სადა იგი მისცეს საყნოსელი სულნელებისაჲ კერპთა მათთა.
და განვირთხა ჴელი ჩემი მათ ზედა, და დავდვა ქუეყანაჲ განსარყუნელად და მოსასრველად, უდაბნოჲთგან დებლათაჲსაჲთ ყოვლისაგან სამკჳდრებელისა, და სცნათ რამეთუ მე ვარ უფალი.;
