და იყო სიტყუაჲ უფლისაჲ ჩემდამო, და თქუა.
და შენ, ძეო კაცისაო, თქუ; ამას იტყჳს უფალი უფალი ქუეყანასა ისრაჱლისასა, აღსასრული მოიწევის ოთხთა ზედა ფრთეთა ქუეყანისათა,
მოიწევის აღსასრული შენ ზედა,
დამკჳდრებულსა მაგას ქუეყანისასა. მოიწევის ჟამი, მოახლებულ არს დღჱ არა შფოთით არცა სალმობით.
აწ ახლოდ მოვჰფინო რისხვაჲ ჩემი შენ ზედა, და აღვასრულო გულის-წყრომაჲ ჩემი შენ შორის, და გსაჯო შენ გზათა შენთა, და მოგცნე შენ ზედა ყოველნი საძაგელებანი შენნი.
არა გერიდოს თუალი ჩემი, არცა შეგიწყალო შენ. რამეთუ გზანი შენნი შენ ზედა მოგცნე, და საძაგელებანი შენნი შორის შენსა იყვნენ, და სცნა რამეთუ მე ვარ უფალი, რომელი ეჰგუემ.
აწ აღსასრული მოიწევის შენდა, და მოვავლინო მე შენ ზედა, და შური ვიძიო მე გზათა შენთა, და მოგცნე შენ ზედა საძაგელებანი შენნი.
არა გერიდოს თუალი ჩემი, არცა შეგიწყალო შენ, რამეთუ გზანი შენნი შენ ზედა მოგცნე, და საძაგელებანი შენნი შენ შორის იყვნენ, და სცნა რამეთუ მე ვარ უფალი.
რამეთუ ამას იტყჳს უფალი.
აჰა ესერა დასასრული მოიწევის. აჰა ესერა დღჱ უფლისაჲ, და კუერთხი ყუავის; გინებაჲ აღდგომილ არს.
და შევმუსრო სიმტკიცე უშჯულოჲსაჲ, და არა შფოთით, არცა წრაფით;
მოიწევის ჟამი. აჰა ესერა დღჱ, რომელი მოიგებდეს, ნუ უხარინ, და რომელი Page of ms. J: B62v განჰყიდდეს, ნუ გოდებნ,/
რამეთუ რომელი მოიგებდეს განმსყიდელისა მის არღარა მიიქცეს, და კაცმან თუალთა მისთა წინაშე ცხორებაჲ, თჳსი ვერ დაიპყრას.
დაჰბერეთ ნესტუსა, და საჯეთ საშჯელი ყოველითურთ,
ბრძოლაჲ და მახჳლი გარეშჱ, სიკუდილი და სიყმილი შინაგან. რომელი ველსა გარე იყოს, მახჳლითა აღესრულოს, ხოლო რომელნი ქალაქსა შინა იყვნენ, სიყმილითა და სიკუდილითა მოესრულნენ.
და გან-თუ-ერნენ განრინებულნი მათგანნი, და იყვნენ მთათა შინა, ყოველნი მოვწყჳდნე, კაცად-კაცადი სიცრუვესა შინა მათსა.
ყოველნი ჴელნი დაჴსნდენ, და ყოველნი ბარკალნი შეიგინნენ სინედლითა.
და შეიმოსონ ძაძაჲ, და დაფარნეს იგინი დასულებამან, და ყოველსა პირსა სირცხჳლი მათ ზედა, და ყოველსა თავსა სიმტიერჱ.
ვეცხლი მათი განიბნიოს უბანთა ზედა, და ოქროჲ მათი შეურაცხ-იყოს. სულნი მათნი ვერ განძღენ, და მუცელნი მათნი ვერ აღივსნენ, რამეთუ ტანჯვაჲ სიცრუვეთა მათთაჲ შეეყო მათ.
რჩეულნი სამკაულთა მათთანი ამპარტავანებად დასხნეს იგინი, და ხატნი საძაგელთა მათთანი ქმნნეს მათგან. ამისთჳს მივაგე იგი მათ არა-წმიდებისათჳს, და მივსცნე იგინი არა-წმიდებასა,
და მივსცნე იგინი ჴელთა უცხოთასა მიმოსატაცებელად, და ბილწთა ქუეყანისათა ტყუედ, რაჲთა შეაბილწნენ იგინი.
და გარე-მივიქციო პირი ჩემი მათგან, და შეაბილწნენ მიხედვანი ჩემნი. და შევიდოდიან მას უმცველოდ, და შეაგინნენ იგინი მათ,
და ქმნენ შეგინებულ, რამეთუ ქუეყანაჲ აღივსო სისხლითა საშჯელისაჲთა, და ქალაქი სავსე არს უშჯულოებითა.
და გარე-წარვაქციო სიმრავლჱ ძლიერებისა მათისაჲ, და შეიგინოს სიწმიდჱ მათი.
ლხინებაჲ მოვიდეს, და ეძიებდეს მშჳდობასა, და არა იყოს,
და ჰამბავი ჰამბავსა ზედა იყოს, ვაჲ ვასა ზედა იყოს, და იძიებოდის Page of ms. J: B63r ხილვაჲ წინაწარმეტყუელისაგან, და შჯული/ წარწყმდეს მღდელისაგან, და ზრახვაჲ მოხუცებულთაგან.
მთავარმან შეიმოსოს განრყუნილებაჲ, და ჴელისაგან ერისა ქუეყანისა დაჴსნდენ. გზათა-ებრ მათთა უყო მათ, და საშჯელითა მათითა შური ვიძიო მათგან, და ცნან რამეთუ მე ვარ უფალი.;
