და იყო წელსა მას მეექუსესა, ხუთსა თთჳსასა, მე ვჯედ სახლსა შინა ჩემსა, და მოხუცებულნი ისრაჱლისანი სხდეს წინაშე ჩემსა. და იყო ჩემ ზედა ჴელი უფლისაჲ,
და ვიხილე და აჰა ესერა მსგავსებაჲ მამაკაცისაჲ, წელთა მისთაჲთგან და დამართ, ცეცხლ; და წელთა მისთაჲთგან და აღმართ, ვითარცა ხილვაჲ, ოქროჲ, და ვეცხლი, და რვალი რაჲ ერთად შედნობილ არნ, ეგრე იყო ფერითა.
და განირთხა მსგავსებაჲ ჴელისაჲ, და აღმიღო მე ვარჯითა თავისა ჩემისაჲთა, და აღმამაღლა მე სულმან მან შორის ცასა და შორის ქუეყანასა, და მომიყვანა მე იჱრუსალემდ ხილვითა ღმრთისაჲთა, წინაშე ბჭეთა ეზოჲსა მის, რომელი ხედავს ჩრდილოჲთ კერძო, სადა იგი იყო ძეგლი იგი მომგებელისაჲ.
და აჰა ესერა მუნ დიდებაჲ ღმრთისა ისრაჱლისაჲ ხილვისა მის-ებრ, რომელი ვიხილე ველსა მას.
და მრქუა მე; ძეო კაცისაო, აღიხილენ თუალნი შენნი ჩრდილოდ, და აღვიხილენ თუალნი ჩემნი ჩრდილოდ. და აჰა ესერა ჩრდილოჲთ მზისა აღმოსავალად კერძოსა მას ბჭესა.
და მრქუა მე; ძეო კაცისაო, იხილეა, რასა ესე ზმენ, უშჯულოებასა დიდსა იქმან ესენი აქა, რაჲთა განეშოვრნენ სიწმიდეთაგან ჩემთა, და მერმეცა იხილნენ ღავე უშჯულოებანი უფროჲსნი.
და შემიყვანა მე წინაშესა მას ბჭისასა ეზოჲსასა,
და მრქუა მე, ძეო კაცისაო, დათხარე, და დავთხარე, და აჰა ესერა კარი.
და მრქუა მე; შევედ და იხილენ უშჯულოებანი, რომელთა იქმან ესენი აქა,
და შევედ და ვიხილე, და აჰა ესერა ამაოებაჲ საძაგელებათაჲ, და ყოველი კერპები სახლისა ისრაჱლისაჲ გამოხატული მათ შინა გარემო. Page of ms. J: B63v
და სამეოც და ათნი კაცნი მოხუცებულთაგან სახლისა ისრაჱლისანი და იექონია, ძჱ საფანისი, შორის მათსა დგა წინაშე მათსა, და კაცად-კაცადსა მათსა სასაკუმევლჱ აქუნდა ჴელსა მათსა; და კუამლი იგი საკუმეველისაჲ აღვიდოდა.
და მრქუა მე უფალმან: იხილეა, ძეო კაცისაო, რასა ესე მოხუცებულნი სახლისა ისრაჱლისანი იქმან, თითოეული საწოლსა ფარულსა თჳსსა, რამეთუ თქუეს: არა ხედავს უფალი, და უტევა უფალმან ქუეყანაჲ.
და მრქუა მე; მერმეცა იხილნევე უშჯულოებანი უფროჲსნი, რომელთა იქმან ეგენი.
და შემიყვანა მე წინაშესა მას ბჭისასა სახლისა უფლისასა, რომელი ჰხედავს ჩრდილოდ, და აჰა ესერა მუნ დედანი სხდეს, და ჰგოდებდეს თამუზსა.
და მრქუა მე; იხილეა, ძეო კაცისაო; და კუალად იხილნე და სხუანი საქმენი უდიდესნი ამათსა .
და შემიყვანა მე ეზოსა სახლისა უფლისასა შინაგანსა, წინაშე საკარეთა ტაძრისა უფლისათა, შორის ელამსა და შორის საკურთხეველსა, ვითარ ოც ოდენ კაცნი. ზურგნი მათნი მიექცინეს ტაძრად უფლისა და პირნი მათნი წაღმართ, და ესენი თაყუანის-სცემდეს მზესა.
და მრქუა მე; იხილეა, ძეო კაცისაო; ნუ უკუჱ მცირე არსა ესე სახლისა იუდაჲსა ყოფად უშჯულოებისა, რომელსა ესე იქმან აქა; რამეთუ აღავსეს ქუეყანაჲ უშჯულოებითა, და აჰა ესერა ესენი ვითარცა შეურაცხის-მყოფელნი.
და მე უყო მათ გულის-წყრომით, არა ერიდოს თუალი ჩემი არცა შევიწყალო.;
