და იყო სიტყუაჲ უფლისაჲ ჩემდა მომართ, და თქუა;
ძეო კაცისაო, Page of ms. J: B81r ორნი/ დედანი იყვნეს, ასულნი ერთისა დედისანი.
და ისიძვიდეს ეგჳპტეს სიჭაბუკესა მათსა. მუნ დაეთხინეს ძუძუნი მათნი, და მუნ გარდაიჴადეს ქალწულებაჲ მათი.
და სახელნი მათნი ოოლლია უხუცესი, და ოოლლიბა დაჲ მისი, და იყვნეს იგინი ჩემდა, და შვნეს ძეებ და ასულებ; და სახელნი მათნი სამარიაჲ ოოლლია და იჱრუსალემი ოოლლიბა.
და ისიძვიდა ოოლლია ჩემ წინაშე, და მიადგა ტრფიალთა თჳსთა ასურასტანელთა მახლობელთა თჳსთა,
შემოსილთა ჳაკინთინონითა, წინამძღუართა და ერის-თავთა, ჭაპუკნი რჩეულნი, ყოველნი მჴედარნი აღმჴედრებულნი ცხენებსა.
და მისცა სიძვაჲ თჳსი მათ რჩეულთა ძეთა ასურთასა ყოველთა, და ყოველთა რომელთა თუალ-აგნა; და ყოვლითა გულის-თქუმითა თჳსითა შეიგინებოდა.
და სიძვაჲ იგი თჳსი ეგჳპტისაჲ არა დაუტევა, რამეთუ მის თანა წვებოდეს სიჭაბუკესა მისსა, და მათ ქალწულებაჲ მისი გარდაიჴადეს, და ყვეს სიძვაჲ მათი მის თანა.
ამისთჳს მივეც იგი ჴელთა ტრფიალთა მისთასა, ჴელთა ასურასტანელთასა, რომელთაცა თუალ-აგნა.
მათ გამოაცხადეს სარცხჳნელი მისი, ძენი და ასულნი მისნი წარიყვან<ნ>ეს, და თჳთ იგი მახჳლითა მოკლეს; და იქმნა იგი სასიტყუელ დედათა შორის, და შურის-გებაჲ ყვეს მის ზედა ასულთა მისთა მიმართ.
და იხილა დამან მისმან ოოლლიბა, და განრყუნა ზედა-დართვაჲ თჳსი უფროჲს მისსა, და სიძვაჲ თჳსი უფროჲს სიძვისა დისა თჳსისა.
ძეთა ასურასტანელთა მიექცა, მთავართა <და> ერის-თავთა მახლობელთა თჳსთა, შემოსილთა სამკაულითა, მჴედართა აღმჴედრებულთა ცხენთა ზედა, ჭაბუკნი რჩეულნი Page of ms. J: B81v ყოველნი.
და ვიხილე რამეთუ შეგინებულ არიან, გზაჲ ერთი/ ორთაჲვე.
და შესძინა სიძვასა თჳსსა ზედა, და იხილნა კაცნი გამოხატულნი კედელსა, ხატნი გამოწერილნი ხატვით,
რომელთა ემოსა ჭრელებული წელთა მათთა, და ფარშამაგები ღებული თავთა მათთა. პირები ყოველთაჲ მსგავსი მსგავსად ძეთა ქალდეველთა ქუეყანისა მამულისა მათისაჲ.
და თუალ-აგნა მათ ხილვითა თუალთა მისთაჲთა, და მიავლინნა მოციქულნი მათა ქუეყანად ქალდეველთა.
და მოვიდეს მისა ძენი ბაბილონისანი საწოლად მოდგურთა, და შეაგინეს იგი სიძვითა მისითა, და შეიბილწა მათ შორის, და არა განეშორა სული მისი მათგან.
და გამოაჩინა სიძვაჲ თჳსი, და განაცხადა სარცხჳნელი თჳსი, და განეშორა სული ჩემი მისგან, ვითარცა იგი განეშორა სული მისი მათგან, და გამოაჩინა სიძვაჲ თჳსი და განაცხადა სარცხჳნელი თჳსი და განეშორა სული ჩემი დისა მისისაგან, ვითარცა იგი განეშორა სული ჩემი დავითისა მამისა მისისაგან.
და განამრავლენ სიძვანი შენნი მოჴსენებად დღეთა სიჭაბუკისა შენისათაჲ, რომელთა ისიძევდ ქუეყანასა ეგჳპტისასა.
და მიექეც შენ ქალდეველთა, რომელთაჲ ვითარცა ვირთაჲ არს სხეულები მათი, და ქუქუნი ცხენთანი ვითარცა ქუქუნი მათნი.
და მიხედენ უშჯულოებასა სიჭაბუკისა შენისასა, რომელსა იგი იქმოდე ეგჳპტეს სავანესა შენსა, სადა იგი ძუძუნი სიჭაბუკისა შენისანი დაეცნეს.
ამისთჳს, ოოლლიბა, ესრე იტყჳს უფალი უფალი; აჰა ესერა მე აღვადგინნე შენ ზედა ტრფიალნი შენნი, რომელთა განეშოვრა სული შენი, და მოგადგინნე იგინი შენ ზედა გარემო.
ძენი ბაბილონისანი და ყოველნი ქალდეველნი, ფაკუელნი და სეკუელნი, და ყოველნი ძენი ასურასტანისანი, და მათ თანა ჭაბუკნი რჩეულნი წინამძღუარნი <და> ერის-თავნი, და ყოველნი მთავარნი და სახელოვანნი აღმჴედრებულნი ცხენებსა.
ყოველნი მოვიდენ შენ ზედა ჩრდილოჲთ, ეტლები და ეტლის-თუალები კრებულისა თანა ერთაჲსა; ფარები და ჩელთები და მოგადგინონ Page of ms. J: B82r მც<ვ>ელნი გარემო შენსა. და მოვსცე წინაშე პირსა მათსა/ საშჯელი, და შურ-იგონ შენ ზედა საშჯელითა მათითა,
და მოგცე შური ჩემი შენ ზედა, და ყონ შენ თანა რისხვითა გულის-წყრომისა ჩემისაჲთა. ცხჳრნი შენნი და ყურნი შენნი მოგკუეთნენ, და ნეშტნი შენნი მახჳლითა დაამჴუნენ, ძენი შენნი და ასულნი შენნი წარიყვანნენ, და ნეშტი შენი ცეცხლმან შეჭამოს.
და განგძარცონ შენ სამოსელი შენი, და წარიღონ ჭურჭერი სიქადულისა შენისაჲ.
და გარე-მოვაქციო უმსახურებელბაჲ შენი შენგან, და სიძვაჲ შენი ქუეყანით ეგჳპტით, და ვერ მიადგნე თუალნი შენნი, და ეგჳპტჱ არღარა მოიჴსენო მერმე.
რამეთუ ამას იტყჳს უფალი, აჰა ესერა მე მიგცე შენ ჴელთა მოძულეთა შენთასა, რომელთაგან განეშორა სული შენი.
და ყონ შენ თანა სიძულილით, და წარიღონ ყოველი ნაშრომი შენი და ყოველი რუდუნებული შენი, და იყო შენ შიშუელ და სარცხჳნელ, და გამოცხადნეს სარცხჳნელი სიძვისა შენისაჲ და უღმრთოებისა შენისაჲ, სიძვამან შენმან
გიყო შენ ესე, რამეთუ ისიძევდ კუალსა წარმართთასა, და შეიბილწებოდე ზრახვითა მათითა.
და გზასა დისა შენისასა ხჳდოდე, და მიგცე სასუმელი მისი ჴელსა შენსა.
ამას იტყჳს ადონაჲ უფალი; სასუმელი დისა შენისაჲ შეჰსუა ღრმაჲ, და ვრცელი გარდამრჱ აღსრულებად სიმთრვალისა.
და დაჴსნითა აღივსო, სასუმელი დისა შენისაჲ სამარიაჲსაჲ, სასუმელი განრყუნილებისაჲ.
შესუ იგი, და დღესასწაულნი მისნი <და> თთჳს-თავნი მოვაქცინე, რამეთუ მე უფალი ვიტყოდე, იტყჳს ადონაჲ უფალი.
ამისთჳს რამეთუ დამივიწყე მე, და ზურგი შემაქციე მე, და შენცა მიიღე უღმრთოებისა შენისათჳს და სიძვათა შენთათჳს.
და მრქუა მე უფალმან; ძეო კაცისაო, არა ჰსაჯოა ოოლლიაჲ და ოოლლიბაჲ, და უთხრა მათ უშჯულოებაჲ მათი.
რამეთუ იმრუშებდეს, და სისხლი ჴელთა შინა მათთა, განზრახვითა მათითა იმრუშებდეს, და შვილნი მათნი Page of ms. J: B82v რომელნი მიშვნეს მე, განჰყვანდეს იგინი/ ცეცხლსა.
ვიდრე ესეცა მიყვეს მე; სიწმიდე ჩემი შეაგინეს, შაბათნი ჩემნი საძაგელ ქმნნეს.
დაკლვითა მით შვილთა მათთაჲთა კერპთა მათთა, და შევიდოდეს სიწმიდეთა ჩემთა, რაჲთა შეაგინონ იგი, რამეთუ ესრეთ ჰყოფდეს შორის სახლსა ჩემსა.
და რამეთუ კაცთა მათ მომავალთა შოვრით, რომელთა იგი მოციქულთა მიუვლინებდეს მათ, და მოსლვასა ოდენ მათსა იბანებოდე, და იგრემლებდ თუალთა შენთა, და იმკვებოდე სამკაულითა.
და დაჰშჯდი ცხედარსა ზედა დაგებულსა, და ტაბლაჲ აღგებული წინაშე შენსა, და საკუმეველი ჩემი და ზეთი ჩემი, და იხარებდეს მით.
და ჴმითა აღრეულითა განცხრებოდეს, და კაცთა სიმრავლისაგან კაცთაჲსა მოსრულთა უდაბნოჲთ, შეასხმიდეს სავლტესა ჴელთა მათთა, და გჳრგჳნსა სიქადულისასა თავსა მათსა.
და ვთქუ; ანუ არა ამათ შინა იმრუშებენ, და საქმისა-ებრ მეძვისა ისიძვა მან.
და შევ<ი>დოდეს მისა, ვითარცა იგი შევლენედ დედაკაცისა მეძვისა, ეგრე შევიდოდეს ოოლლიაჲსა და ოოლლიბაჲსა, რაჲთა იქმოდიან უშჯულოებასა.
და კაცთა ამათ მართალთა შურ-იგონ მისგან შურის-გებითა მომრუშისაჲთა, შურის-გებითა სისხლთაჲთა, რამეთუ მომრუშენი არიან, და სისხლი ჴელთა შინა მათთა.
ამას იტყჳს უფალი უფალი; აღმოიყვანე მათ ზედა ერი, და მოეც მას შეძრწუნებაჲ და მიმოტაცებაჲ.
და ქვაჲ დაჰკრიბე მათ ქვისა დაკრებაჲ ერისაჲ, და დაჰგუმერდი მათ მახჳლითა მათითა. ძენი მათნი და ასულნი მათნი მოწყჳდნენ, და სახლები მათი დაწუან ცეცხლითა.
და მოვაქციო უღმრთოებაჲ ქუეყანით, და განისწავლ<ნ>ენ ყოველნი დედანი, და არღარა ყონ უღმრთოებისაებრ მათისა.
და მოგეცნენ უღმრთოებანი თქუენნი თქუენ ზედა, და ცოდვანი განზრახვათა თქუენთანი მიიხუნეთ, და სცნათ რამეთუ მე ვარ უფალი.; Page of ms. J: B83r
