და იყო ჩემდა მომართ სიტყუაჲ უფლისაჲ, და თქუა.
და შენ, ძეო კაცისაო, არა ჰსაჯოა ქალაქი ესე მოსისხლე, და უჩუენენ მას ყოველნი უშჯულოებანი მისნი.
და არქუ მას, იტყჳს ადონაჲ უფალი; ჵ ქალაქო მოსისხლეო, რომელმან დასთხიენ სისხლნი შორის შენსა, რაჲთა მოიწიოს ჟამი შენი, და ჰყოფდი Page of ms. J: B79v შენ განზრახვასა გულისასა თავისა თჳსისათჳს შეგ/ინებად შენ<და>
სისხლითა მათითა, რომელნი დასთხიენ, და დაეცი, და გულის-სიტყჳთა შენითა, რომელსა ჰყოფდი მათ შინა შეიგინებოდე. და მოიახლენ ყოველნი დღენი შენნი, და მოიყვანენ ჟამნი წელთა შენთანი. ამისთჳს მიგეც შენ საყუედრელად წარმართთა, და საკიცხელად ყოველსა სოფლებსა,
მახლობელთა შენთა, და რომელნი შორს არიან შენგან, და გემღერდენ შენ არა-წმიდაო, სახელოვანო, და სავსეო მრავლითა უშჯულოებითა.
აჰა ესერა მთავარნი სახლისა ისრაჱლისანი კაცად-კაცადი ნათესავისა თჳსისა თანა შეიგინებოდა შენ შორის, რაჲთა დასთხიო<ნ> სისხლი.
მამისა და დედისათჳს ძჳრსა იტყოდეს შენ შორის, და მწირისა მიმართ სიცრუვით ვიდოდეს შენ შორის. ქურივსა და ობოლსა ჰმძლავრობდეს შენ შორის.
და სიწმიდეთა ჩემთა შეურაცხ-ჰყოფდეს, და შაბათთა ჩემთასა შეაგინებდეს შენ შორის.
კაცნი ავაზაკნი იყვნეს შენ შორის, რომელნი დასთხევდეს სისხლსა, და მთათა ზედა ჭამდეს შენ შორის, არა-წმიდებასა იქმოდეს შენ შორის.
სარცხჳნესლა მამისასა გამოაცხადებდეს შენ შორის, და არა-წმიდებასა შინა დედაკაცსა დაამდაბლებდეს შენ შორის.
კაცად-კაცადი ცოლსა მოყუსისა თჳსისასა უშჯულოებდეს შენ შორის, და თითოეული სძალსა თჳსსა შეაგინებდეს უშჯულოებით, და კაცად-კაცადი დასა თჳსსა, ასულსა მამისა თჳსისასა, დაამდაბლებდეს შენ შორის.
ქრთამსა მიიღებდეს შენ შორის, რაჲთა დასთხევდენ სისხლსა. ვახშსა და აღნადგინებსა მოიღებდეს შენ შორის. და აღვასრულო აღსასრული უკეთურებისა შენისაჲ მძლავრობით; ხოლო მე დამივიწყე შენ, იტყჳს ადონა უფალი.
უკუეთუ დაგცე ჴელი ჩემი შენ ზედა, რომლისათჳს აღგისრულებიეს, და რომლისათჳს გიყოფიეს, და სისხლთა მათთჳს, რომელ ყოფილ არიან შენ შორის.
უკუეთუ Page of ms. J: B80r დადგომით და დამი/დგეს გული შენი, ანუ თუ დამითმონ ჴელთა შენთა მათ დღეთა შინა, რომელთა ვყო მე შენ შორის. მე უფალი ვიტყოდე და ვყო.
და განგაბნიო შენ წარმართთა შორის, და მიმოგთესო შენ სოფლებსა შორის, და მოაკლდენ არა-წმიდებანი შენგან.
და დავიმკჳ<დ>რო შენ შორის წინაშე თუალთა წარმართთასა, და სცნათ რამეთუ მე ვარ უფალი უფალი.
და იყო სიტყუაჲ უფლისაჲ ჩემდა მომართ, და თქუა.
ძეო კაცისაო, აჰა ესერა მექმნა მე სახლი ისრაჱლისაჲ აღრეულ, ყოველნი ვითარცა რვალი და რკინაჲ და ტყჳვი და ბრპენი შორის ვეცხლსა აღრეულ არნ.
ამისთჳს არქუ მათ; ამას იტყჳს ადონა უფალი; ამისთჳს რამეთუ იქმნენით ერთბამად აღრეულ, ამისთჳს მე შეგიყვანნე თქუენ შორის იჱრუსალემსა.
ვითარცა იგი შეიღიან რვალი და რკინაჲ და ტყჳვი <და ბრპენი> და ვეცხლი შორის საჴუმილსა გამობერვად იგი ცეცხლსა, და გამოდნობად, ეგრე შეგიყვანნე თქუენ რისხვითა ჩემითა, და შეგკრიბნე, და გამოვადნენე თქუენ.
და მოვჰბერო თქუენ ზედა ცეცხლითა რისხვისა ჩემისაჲთა, და გამოსდნეთ შორის მისსა.
ვითარცა გამოდნის ვეცხლი შორის ბრძმედთა, ეგრეთ გამოსდნეთ შორის მისსა, და ჰსცნათ, რამეთუ მე ვარ უფალი, და მივჰფინო რისხვაჲ ჩემი თქუენ ზედა.
და იყო სიტყუაჲ უფლისაჲ ჩემდა მომართ, და თქუა;
ძეო კაცისაო, არქუ მას, შენ ხარ ქუეყანაჲ უწჳმებელი, და არცა ცუარი იყო შენ ზედა დღესა რისხვისასა.
რომლისა წინამძღუარნი მისნი, ვითარცა ლომნი მყჳრალნი შორის მისსა, იტაცებდეს ნატაცებსა. სულთა კაცთასა შეჰშჭამდეს მძლავრობით, და სასყიდელსა მოიღებდეს. ქურივნი შენნი განმრავლდეს შენ შორის.
მღდელთა შენთა შეურაცხ-ყვეს შჯული ჩემი, და შეაგინებდეს სიწმიდეთა ჩემთა. შორის წმიდასა და შეგინებულსა არა განაშორებდეს, და შორის გამორჩეულსა და განურჩეველსა არა განაყენებდეს, და შაბათთა ჩემთაგან დაიფარვიდეს Page of ms. J: B80v თუალთა მათთა, და შევიგინებოდე შორის მათსა./
და მთავარნი მისნი შორის მისსა, ვითარცა მგელნი იტაცებდეს ნატაცებსა დათხევად სისხლისა, რაჲთა ანგაჰრობასა ანგაჰრობდენ.
და წინაწარმეტყუელნი მათნი ალბუნებდეს მათ, და დაეცნენ მხედველნი იგი ამაოჲსანი, რომელნი იმისნიდეს ტყუვილსა, და იტყოდეს; ამას იტყჳს უფალი, და უფალი არა ეტყოდა მათ.
ერსა ქუეყანისასა გამოსწურავთ სიცრუვით, და მოიტაცებთ ნატაცებსა. დავრდომილსა და გლახაკსა ჰმძ<ლ>ავრობთ, და მწირისა მიმართ არა იქცევით მართლ.
და ვეძიებდ მათ შორის კაცსა, რომელიმცა ვიდოდა მართლ, მდგომარე წინაშე ჩემსა ყოვლითურთ ჟამსა ქუეყანისასა, რაჲთამცა სრულიად არა აღიჴოცა იგი, და არა ვპოვე.
და მივჰფინე მათ ზედა გულის-წყრომაჲ ცეცხლითა რისხვისა ჩემისაჲთა აღსრულებად; გზანი მათნი თავთა მათთა ზედა მივაგე მათ, იტყჳს უფალი უფალი.;
