და იყო მეათორმეტესა წელსა, და მე<ა>თორმეტესა თთუესა, ერთსა მის თჳსასა, იყო სიტყუაჲ უფლისაჲ ჩემდა მომართ, და თქუა.
ძეო კაცისაო, მოიღე გოდებაჲ [!] ფარაოს ზედა, მეფესა ეგჳპტისასა, და არქუ მას. ლომსა წარმართთასა ემსგავსე შენ, და ვითარცა ვეშაპსა, რომელი არს ზღუასა შინა, ურქენდი მდინარეთა შენთა; და აღამრღუევდ წყალთა ფერჴითა შენითა, და დასთრგუნევდ მდინარეთა შენთა.
ამას იტყჳს ადონაჲ უფალი; და გარე-მოგადგა შენ ბადჱ ერთა მრავალთაჲ, და აღმოგიყვანო შენ სამჭედურითა ჩემითა.
და განგართხა შენ ქუეყანასა ზედა, და ველნი განძდენ შენგან, და დაგასხა შენ ზედა ყოველი მფრინველი ცისაჲ, და განვაძღნე შენგან ყოველნი მჴეცნი ყოვლისა ქუეყანისანი.
და მივსცნე ჴორცნი შე<ნ>ნი მთათა ზედა, და აღვავსნე იგინი სისხლითა შენითა.
და მოირწყოს ქუეყანაჲ გამონადინებითა შენითა, სიმრავლისა მისგან შენისა მთათა გან; ჴევნები აღვავსო შენგან.
და დაგფარო შენ, რაჟამს დაშრტეს ცაჲ შენ ზედა, და დაბნელდენ ვარსკულავნი მისნი, მზჱ ღრუბლითა დავფარო, და მთოვარემან არა აჩუენოს ნათელი თჳსი.
ყოველნი რომელნი ნათობენ ცათა შინა დაბნელდენ შენ ზედა, და მოვსცე ბნელი ქუეყანასა შენსა, იტყჳს უფალი უფალი.
და განვარისხნე გულნი ერთა მრავალთანი, რაჟამს აღმოვიყვანო ტყუჱ შენი ნათესავთა მიმართ ქუეყანასა მას, რომელი არა იცოდე.
და შეწუხნენ შენ ზედა ნათესავნი მრავალნი, და მეფენი მათნი განკრთომით განჰკრთენ, ოდეს იგი ფრინვიდეს მახჳლი ჩემი წინაშე პირსა მათსა. მოელოდიან დაცაემასა თჳსსა მიერ დღითგან დაცემისა შენისაჲთ./ Page of ms. J: B92r
რამეთუ ამას იტყჳს ადონაჲ უფალი; მახჳლი მეფისა ბაბილოვნისაჲ მოიწიოს შენ ზედა.
მახჳლითა გმირთაჲთა დავამჴუა ძალი შენი, ბილწნი წარმართთაგან<ნ>ი ყოველნი, და წარწყმიდონ გინებაჲ ეგჳპტისაჲ, და შეიმუსროს ყოველი ძალი მისი.
წარვწყმიდო ყოველი საცხოვარი მისი წყალთაგან მრავალთა, და არღარა აღთქუეფოს იგი ფერჴმან კაცისამან, და კუალმან საცხოვრისამან არა დათრგუნოს იგი.
ესრეთ მაშინ დაყუნდენ წყალნი მათნი, და მდინარენი მათნი ვითარცა ზეთნი დიოდიან, იტყჳს ადონაჲ უფალი.
რაჟამს იგი მივსცე ეგჳპტჱ წარსაწყმედელად, და მოოჴრდეს ქუეყანაჲ სავსებითურთ თჳსით, რაჟამს მიმოვსთესნე ყოველნი მკჳდრნი მისნი, და ცნან რამეთუ მე ვარ უფალი.
გოდებაჲ არს, და ჰგოდებდით მას, და ასულნი წარმართთანი ჰგოდებდენ მას ეგჳპტესა, და ყოველსა ძალსა მისსა ჰგოდებდენ, იტყჳს უფალი უფალი.
და იყო მეათორმეტესა წელსა, პირველსა თთუესა, მეათხუთმეტესა მის თთჳსასა, იყო სიტყუაჲ უფლისაჲ ჩემდა მომართ, და თქუა.
ძეო კაცისაო, ჰგოდებდ ძალსა ეგჳპტისასა, და შთაიყვანნენ ასულნი მათნი წარმართთა მკუდარნი სიღრმესა ქუეყანისასა შთამავალთა თანა მღჳმისათა.
შორის წყლულთა მახჳლისათა დაეცნენ მის თანა, და დაიძინოს ყოველმან ძალმან მისმან.
და გრქუან შენ გმირთა მათ; სიღრმესა მღჳმისასა შთაჴედ; ვისა უმჯობჱს ხარ შენ. გარდაგუალე და დაიძინე წინადაუცუეთელთა თანა შორის წყლულთა მახჳლითა.
მუნ არს ასურ და ყოველნი კერბულნი მისნი, და ყოველნი წყლულნი მახჳლითა მუნ მიეცნეს,
და საცლავი მათი სიღრმესა ქუეყანისასა, და იყო კრებული მისი გარემო საფლავსა მისსა, და ყოველნი წყლულნი მისნი დაცემულნი მახჳლითა, რომელთა მიეცა შიში მათი ქუეყანასა ცხორებისასა.
მუნ ელამ Page of ms. J: B92v და ყოველი ძალი მისი გარემო საფლავსა მისსა,/ ყოველნი წყლულნი დაცემულნი მახჳლითა, რომელნი შთავიდეს წინადაუცუეთელნი სიღრმესა ქუეყანისასა, რომელთა მიეცა შიში მათ<ი> ქუეყანასა ცხორებისასა, და მოიღეს ტანჯვაჲ მათი შთამავალთა თანა მღჳმისათა.
შორის წყლულთა მახჳლითა,
მუნ მიეცნეს მოსოქ და ყოველი ძალი მათი; გარემო საფლავსა მათსა ყოველნი წყლულნი მათნი, ყოველნი წინადაუცუეთელნი <წყლულნი> მახჳლისაგან, რომელთა მოეცა შიში მათი ქუეყანასა ცხოვრებისასა.
და დაიძინეს გმირთა თანა დაცემულთა მახჳლითა საუკუნითგან, რომელნი შთავიდოდეს ჯოჯოხეთა საჭურველითა საბრძოლითა, და დაისხნეს მახჳლნი მათნი ქუეშჱ თავთა მათთა, და იქმნნეს უშჯულოებანი მათნი ძუალთა ზედა მათთა, რამეთუ აშინებდეს გმირთა ცხორებასა მათსა.
და შენ წინადაუცუეთელთა თანა დაიძინო წყლულთა თანა მახჳლითა,
მუნ მიეცნეს მთავარნი ასურისანი, რომელთა მისცეს ძალი მისი წყლულებად მახჳლისა, მათ წყლულებით დაიძინეს შთამავალთა თანა მღჳმისათა.
მუნ მთავარნი იგი ჩრდილოჲსანი ყოველნი ერისა მძღუარნი ასურისანი, რომელნი შთავიდოდეს წყლულნი, შიშითურთ მათით და ძალით დაიძინეს წინადაუცუეთელთა წყლულებითა მახჳლისაჲთა, და წარიღეს ტანჯვაჲ მათი შთამავალთა თანა მღჳმისათა.
იგინი იხილნეს ფარაო, და ნუგეშინის-იცეს ყოველსა ზედა ძალსა მათსა, იტყჳს ადონაჲ უფალი.
რამეთუ მივეც შიში მათი ქუეყანასა ცხორებისასა, და დაიძინო<ნ> შორის წინადაუცუეთელთა წყლულთა თანა მახჳლითა, ესრჱთ ფარაო და ყოველი სიმრავლჱ მისი, იტყჳს ადონაჲ უფალ.;
