გოგის ზედა. და იყო სიტყუაჲ უფლისაჲ ჩემდა მომართ, და თქუა.
ძეო კაცისაო, განიმტკიცე პირი შენი გოგის ზედა, ქუეყანასა მაგოგისსა, მთავრისა Page of ms. J: B99v მის როს, მოსოქ და თობელისა; და წინაწარმეტყუელებდ/ მის ზედა.
და არქუ მას, ამას იტყჳს ადონაჲ უფალი; აჰა ესერა მე შენ ზედა, გოგ, მთავრისა როს, მოსოქ და თობელისა,
და შეგკრიბო შენ და ყოველი ძალი შენი, ცხენები და მჴედრები შეჭურვილნი ყოველნი ჯაჭჳთა, კრებულნი მრავალნი ფარებითა და ჩაფხუტებითა და მახჳლითა;
სპარსნი და ეთიოპელნი და ლჳბიელნი, ყოველნი თორნითა და ჩაფხუტებითა;
გომერ და ყოველნი გარემონი მისნი, სახლი თჳრგამაჲსი დასასრულითგან ჩრდილოჲსაჲთ, და გარემონი მისნი ყოველნი, და ნათესავნი მრავალნი შენ თანა.
განემზადე და განჰმზადე თავი შენი, შენ და კრებული შენი ყოველი, რომელნი შეკრებულ არიან შენ თანა, და მეყავ მე წინაჲსწარ დამარხულ.
დღითგან მრავალით განემზადოს, და უკუანაჲსკნელთა წელთა შენთა მოვიდეს და მოიწიოს ქუეყანასა მას გარე-მიქცეულსა მახჳლისაგან, შეკრებულთა ნათესავთაგან მრავალთა ქუეყანად ისრაჱლისა, რომელ იგი იქმნა ყოვლად ოჴერ. და ესე წარმართთაგან გამოვიდა, და დაემკჳდრნენ ყოველნივე მშჳდობით.
და აღმოხჳდე ვითარცა წჳმაჲ, და მოიწიო ვითარცა ღრუბელი დაფარვად ქუეყანისა, და იყო შენ და ყოველნი შენთანანი და ნათესავნი მრავალნი შენ თანა.
ამას იტყჳს ადონაჲ უფალი; და იყოს მას დღესა შინა, აღმოვიდენ სიტყუანი გულსა შენსა, და განიზრახო განზრახვაჲ ბოროტი.
და სთქუა; აღვიდე ქუეყანასა მას განგდებულსა, და მოვიდე დაყუდებულთა ზედა ყუდროებით, და დამკჳდრებულთა მშჳდობით, ყოველთა დამკჳდრებულთა ქუეყანისათა, სადა იგი არა არიან ზღუდენი, არცა მოქლონნი, არცა კარები არს მათი.
წარმოღებით წარმოვიღო, და წარმოვტყუენო ტყუჱ მათი მოქცევად ჴელი ჩემი ქუეყანასა მოოჴრებულსა, რომელი დაეშჱნა, და Page of ms. J: B100r ნათესავთა შეკრებულთა თესლთაგან მრავალთა/ რომელთა უყოფიეს მონაგები, და დამკჳდრებულ არიან უპესა ქუეყანისასა.
საბა და დედან და ვაჭარნი კარქეღონელნი და ყოველმან დაბნებმან მათმან გრქუან შენ, უკუეთუ ავრის ყოფად მოხუალ შენ, და ტყუენვად ნატყუენავისა შეიკრიბე კრებული შენი მიღებად ვეცხლისა და ოქროჲსა, მიღებად მონაგებისა, და ტყუენვად ნატყუენავისა.
ამისთჳს სწინაწარმეტყუელებდ, ძეო კაცისაო, და არქუ გოგს, ამას იტყჳს ადონაჲ უფალი; ანუ არა მას დღესა შინა, რაჟამს დაემკჳდროს ერი ჩემი ისრაჱლი მშჳდობით, აღსდგე შენ.
და მოხჳდე ადგილით შენით დასასრულით ჩრდილოჲსაჲთ და ნათესავნი მრავალნი შენ თანა, აღმოვიდენ ჰუნებითა, ყოველი კრებული დიდი და ერი მრავალი.
და აღმოხჳდე ერსა ჩემსა ზედა ისრაჱლსა ვითარცა ღრუბელი დაფარვად ქუეყანისა. უკუანაჲსკნელთა დღეთა იყოს, და აღმოგიყვანო შენ ქუეყანასა ჩემსა, და მიცნან მე ყოველთა თესლთა, რაჟამს ვიდიდო მე შენ ზედა წინაშე მათსა.
ამას იტყჳს უფალი უფალი გოგს; შენ ხარ, რომლისათჳს ვიტყოდე უწინარჱს დღეთა მათ პირველთა ჴელითა მონათა ჩემთა წინაწარმეტყუელთა ისრაჱლისათაჲთა, მათ დღეთა შინა და წელთა აღმოყვანებასა მას შენსა მათ ზედა.
და იყოს მას დღესა შინა, დღესა მას რომელსა მოვიდეს გოგ ქუეყანასა ისრაჱლისასა, იტყჳს ადონაჲ უფალი. აღმოვიდეს გულის-წყრომაჲ ჩემი,
და შური ჩემი ცეცხლითა რისხვისა ჩემისაჲთა, და ვიტყოდე რამეთუ მას დღესა შინა იყოს ძრვაჲ დიდი ქუეყანასა ისრაჱლისასა.
და შეიძრნენ პირისაგან უფლისა თევზნი ზღჳსანი, და მფრინველნი ცისანი, და მჴეცნი ველისანი, და ყოველნი ქუე-წარმავალნი ქუეყანისანი, და ყოველნი კაცნი პირსა ზედა ქუეყანისასა. განსთქდენ მთანი, და დაეცნან ჴევნი, და ყოველი ზღუდჱ ქუეყანასა დაემჴუას.
და მოუწოდი მას ზედა ყოველსა შიშსა მახჳლისასა, იტყჳს უფალი. Page of ms. J: B100v მახჳლი კაცისაჲ ძმასა ზედა თჳსსა იყოს./
და ვსაჯო იგი სიკუდილითა და სისხლითა და წჳმითა რღუნისაჲთა და ქვითა სეტყჳსაჲთა, და ცეცხლი და წუმწუბი ვაწჳმო მის ზედა და ყოველთა ზედა მისთანათა და ნათესავთა ზედა მრავალთა.
და განვდიდნე და ვიდიდო, და განვწმიდნე და გამოვეცხადო წინაშე თესლთა მრავალთა, და ცნან რამეთუ მე ვარ უფალი უფალი.;
