Page of ms. J: B117r წელსა მესამესა მეფობასა იოაკიმისსა მეფესა იუდაჲსსა მოვიდა ნაბუქოდონოსორ მეფჱ ბაბილონისაჲ იჱრუსალემდ, და გარე-მოადგა მას.
და მისცა უფალმან იოაკიმ მეფჱ იუდაჲსი ჴელსა მისსა, და ზოგისაგანი ჭურჭრისაჲ სახლისა უფლისაჲ, და მოიღეს იგი ქუეყანად სენაარისად, და სახლსა ღმრთისა თჳსისასა ზედა და ჭურჭერი იგი შეიღო სახლსა ღმრთისა თჳსისასა.
და ჰრქუა მეფემან ასტოფანეს საჭურის<თ>-მთავარსა თჳსსა შეყვანებად ძეთაგან ნატყუენავისა ისრაჱლისათაჲ და ნათესავისაგან სამეუფოჲსა,
ნატყუენავთაგა<ნ>ნი ჭაბუკნი, რომელთა თანა არა იყოს ბიწი, და კეთილნი ფრიად, და გულის-ჴმის-მყოფელნი ყოველსა სიბრძნესა, რომელთა იცოდიან მეცნიერებაჲ, და განმზრახველნი გონიერებისანი, რომელთა თანა იყოს ძალი დგომად სახლსა შინა მეფისასა, რაჲთა ისწაონ წიგნი და ენაჲ ქალდეველთაჲ.
და განუწესა მათ როჭიკი დღისაჲ დღესა ტაბლისაგან თჳსისა, და ღჳნისაგან სასუმელისა თჳსისა, რაჲთა იზარდებოდიან იგინი სამ წელ. და ამისა შემდგომად რაჲთა დგენ იგინი წინაშე მეფისა. Page of ms. J: B117v
და იყვნეს მათ შორის ძეთა იუდაჲსთა დანიელ ანანია აზარია მისაელ.
და დასდვა მათ საჭურის<თ>-მთავარმან მან სახელები, დანიელს ბალტასარ, ანანიას სედრაქ, აზარიას მისაქ, მისაელს აბედნაგო.
და დაიდვა დანიელ გულსა თჳსსა, რაჲთა არა შეიგინოს ტაბლისა მისგან სამეუფოჲსა, და ღჳნითა მით სასუმელისა მისისაჲთა, და ევედრა საჭურისთ-მთავარსა მას რაჲთა არა შეიგინოს.
და მოსცა ღმერთმან დანიელს მოწყალებაჲ და შეწყნარებაჲ წინაშე საჭურის<თ>-მთავრისა მის,
და ჰრქუა საჭურის<თ>-მთავარმან მან დანიელს, მეშინის მე უფლისა ჩემისა მეფისა, რომელმან დაგაწესა თქუენ ზედა საზრდელი თქუენი და სასუმელი, ნუ უკუე იხილნეს პირნი თქუენნი უმწუხარეს პირთა ყრმათა მათ, რომელნი თქუენნი ჰასაკით სწორნი არიან, და დაისაჯოს თავი ჩემი სიკუდიდ მეფისაგან.
და ჰრქუა <დანიელ> ამელსადასს, რომელი იგი დაედგინა საჭურისთ-მთავარსა მას დანიელეთ ზედა ანანია და აზარია და მისავლეთ ზედა;
გამომცადენ მონანი შენნი ათსა ოდენ დღესა, და მომცემდედ ჩუენ თესლთაგან ქუეყანისათა და ვჭამდეთ, და წყალსა ვსუმიდეთ.
და გამოცადენ წინაშე შენსა პირნი ჩუენნი და პირნი მათ ყრმათანი, რომელნი ჭამენ ტაბლისა <გან> სამეუფოჲსა, და ვითარცა იხილო, ეგრეცა ყავ მონათა შენთა თანა.
და ისმინა მათი, და გამოიცადნა იგინი ათ დღჱ ოდენ;
და შემდგომად აღსრულებისა მის ათთა დღეთაჲსა, იყვნეს პირნი მათნი უკეთჱს და უძლიერჱს ჴორცითა უფროჲს ყრმათასა მათ, რომელნი ჭამდეს ტაბლისა მისგან სამეუფოჲსა.
და მიერითგან მოუღებდა ამელსად საზრდელსა მას მათსა და ღჳნოსა მას სასუმელსა, და მისცემდა მათ თესლსა.
და ყრმათა ამათ ოთხთა მოსცა ღმერთმან გულის-ჴმის-ყოფა ჲ და გონიერებაჲ ყოვლისა მწიგნობრობისა და სიბრძნისაჲ, და დანიელ გულის-ჴმა-ჰყოფდა ყოველსა და ჩუვნებათა./ Page of ms. J: B118r
შემდგომად აღსრულებისა მათ დღეთაჲსა თქუა მეფემან შეყვანებაჲ მათი მის წინაშე, და შეიყვანნა იგინი საჭურის<თ>-მთავარმან მან წინაშე ნაბუქოდონოსორისა.
და ეტყოდა მათ მეფჱ, და არა ვინ იპოვა მათ ყოველთაგანი მსგავსი და სწორი დანიელისა ანანია, <აზარია და მისაელისი>, და დგეს ესენი წინაშე მეფისა.
და ყოველსა სიბრძნესა და სიტყუასა და მეცნიერებასა, რომელსა ეძიებდა მეფჱ მათგან, პოვნა იგინი ათ წილ უფროჲს ყოველთა მსახრვალთა და მოგუთა, რომელნი იყვნეს ქუეშჱ სამეუფოსა მისსა.
და იყო დანიელ ვიდრე პირველად წლადმდე კჳროს მეფისა სპარსთაჲსა.
