ისმინეთ ყრმათა სწავლაჲ მამისაჲ და ერჩდით ცნობად გულისხმის-ყოფასა.
რამეთუ ნიჭსა კეთილსა მოგანიჭებ თქუენ. შჯულსა ჩემსა ნუ დაივიწყებთ და დაუტეობთ.
რამეთუ შვილი ვიყავ მეცა მამისაჲ, მორჩილი, და საყუარელ წინაშე პირსა დედისასა,
რომელნი მსწავლიდეს მე და მეტყოდეს მე: და დასჯერდინ სიტყუაჲ ჩემი გულსა შენსა, და დაიცვენ მცნებანი და ნუ დაივიწყებ;
ნუცა უგულებელს-ჰყოფ სიტყუათა პირისა ჩემისათა;
ნუცა დაუტევებ მათ, და შეგეწინენ შენ; ეტრფიალე მათ, და დაგიცვეს შენ.
გარე-მოიზღუდენ იგინი, და აღგამაღლონ შენ; პატივ-ეც, რაჲთა შეგიწყნაროს შენ
და მოსცეს თავსა შენსა გჳრგჳნი მადლისაჲ და გჳრგჳნითა დიდებისაჲთა შეგამკოს შენ.
Page of ms. P: 135R ისმინე, შვილო, და შეიწყნარენ სიტყუანი ჩემნი, და განმრავლდენ წელნი ცხორებისა შენისანი, რაჲთა იყვნენ შენდა მრავალ გზა ცხორებისა.
რამეთუ გზანი ცხორებისანი გასწავენ შენ Page of ms. P: 135V და დაგაწესენ ალაგნი სიმართლისანი.
უკუეთუ ხჳდოდი, არა დაგეჴსნენ სლვანი შენნი; და ჰრბიოდი თუ, არა დაშურე.
ეკრძალე სწავლასა შენსა და ნუ დაუტეობ, არამედ დაჰმარხე იგი თავისა შენისა ცხორებად.
გზასა უღმრთოთასა ნუ ხუალ და ნუცა ჰბაძავ.
რომელსა ადგილსა განეწყობოდიან, ნუ მიხუალ მუნ, მოაქციენ მისგან და დაუტევენ იგი.
რამეთუ არა დაიძინიან, ვიდრე არა ბოროტი ქმნიან; მიღებულ არს ძილი მათი მათგან, და არა დაიძინიან,
რომელნი ეზიარებიან საჭმლითა უღმრთოებისაჲთა და ღჳნითა უსჯულოებისაჲთა დაითრვნიან.
ხოლო გზანი მართალთანი ვითარცა ნათელნი ბრწყინვენ, წინა-უძღოდიან და განანათლებდენ, ვიდრემდის წარემართოს დღჱ.
ხოლო გზანი უღმრთოთანი ბნელ არიან და არა ცნან, ვიდრემდის წარსცენ ფერჴი.
Page of ms. P: 75R შვილო, თქმულთა ჩემთა ეკრძალე და სიტყუათა ჩემთა მიეც გონებაჲ შენი.
რამეთუ არა მოგაკლდენ წყარონი შენნი და დაიმარხენ იგინი გულსა შენსა.
რამეთუ ცხორებაჲ არს, რომელთა პოონ იგი, და ყოვლისა ჴორციელისა ლხინებაჲ.
და ყოველი საცოჲ დაიმარხე გულსა შინა, რომლისაგან არიან გამოსავალნი ცხორე ბისანი.
მოისპე შენგან პარვაჲ ზაკული და ცრუნი ბაგენი განიშორენ შენგან.
თუალნი შენნი მართლ ახედვენ და წამნი შენნი სიმართლესა წამებედ.
მართალ ყვენ ალაგნი ფერჴთა შენთანი და გზანი შენნი წარიმართენ.
ნუ მიიქცევ მარჯუენით გინა თუ მარცხენით; მოაქციე ფერჴი შენი გზისაგან ბოროტისა.
რამეთუ გზანი იგი მარჯუენითნი იცნის უფალმან, ხოლო გულარძნილ არიან გზანი იგი მარცხენითნი.
და მან მართალ ყვნეს ალაგნი შენნი და სლვანი შენნი მშჳდობით წარგემართნენ.
