Page of ms. P: 2r შვილო ჩემო, შე-თუ-ეყოფვოდი შენ მონებად უფალსა, განმზადე თავი შენი ყოვლისაგან განსაცდელისა.
და წრფელ ყავ გული შენი და ნუ მოსწრაფე ხარ ჟამსა მას, რომელსა შეგემთხჳოს შენ განსაცდელი.
მიეახლე უფალსა და ნუ განეშორები, რაჲთა აღმაღლდე აღსასრულსა მას შენსა.
ყოველივე, რაჲცა მოვიდეს შენ ზედა, დაითმინე და სალმობათაგან დამდაბლებისა შენისათა სულგრძელ იყავ.
რამეთუ ცეცხლითა გამოიცადის ოქროჲ, ეგრევე კაცი შერაცხილი საჴუმილითა მით სიმდაბლისაჲთა.
გრწმენინ იგი და შეგიწყნაროს შენ და განიგნე გზანი შენნი და ესევდ მას.
მოშიშნი უფლისანი მოელოდედ წყალობასა უფლისასა და ნუ გარდაიქცევით, Page of ms. P: 2v რაჲთა არა დაეცნეთ.
მოშიშთა უფლისათა ჰრწმენინ იგი, რაჲთა არა დააკლდეს სასყიდელი მათი.
მოშიშნი უფლისანი მოელოდეთ კეთილსა უფლისაგან და სიხარულსა და წყალობასა, რამეთუ ნიჭი უფლისაჲ საუკუნე არს და სიხარულით არს მოსაგებელი მისი.
მიხედეთ პირველთა მათ ნათესავთა და იგულეთ, ვის ჰრწმენა ღმერთი და ჰრცხუენა.
ანუ ვინ დაადგრა შიშსა მისსა და მან დააგდო იგი?
მოწყალე და მწყალობელ არს უფალი, სულგრძელ, დიდად მოწყალე, მიუტევნის ცოდვანი და აცხოვნნის ჟამსა ჭირისასა მოსავნი მისნი.
