Page of ms. L: _ Page of ms. P: 242v და იყო, წელიწადსა მას, რომელსა მოკუდა ოზია მეფჱ, ვიხილე მე უფალი, მჯდამარჱ საყდართა ზედა მაღალთა და აღმატებულთა. და სავსე იყო ტაძარი იგი დიდებითა მისითა.
და სერაბინნი Page of ms. P: 243r დგეს გარემოჲს მისსა, და ესხა ექუს ფრთჱ ერთსა და ექუს ფრთჱ ერთსა; ორითა მით იფარვიდეს პირთა, ორითა მით იფარვიდეს ფერჴთა, ორითა მით ფრინვიდეს.
ღაღადებდეს და იტყოდეს: წმიდა არს, წმიდა არს, წმიდა არს უფალი საბაოთ; სავსე არიან ცანი და ქუეყანაჲ დიდებითა მისითა.
და აღმაღლდა კრეტსაბმელი იგი ჴმითა მით, რომლითა ღაღადებდეს; და ტაძარი იგი აღივსო საკჳრველებითა.
და ვთქუ: ეჰა, უბადრუკსა ამას! რამეთუ კაცი ვარ და არაწმიდანი, ბაგენი მქონან და შორის არაწმიდადმეტყუელისა ერისა დამკჳდრებულ ვარ და მეფჱ უფალი თუალითა ვიხილე.
და მოივლინა ჩემდა ერთი სერაბინთაგანი და ჴელთა მისთა აქუნდა ნაკუერცხალი, რომელიმე მარწუხითა მოიღო საკურთხეველისაგან
და შემახო პირსა ჩემსა და მრქუა მე: აჰა, ესერა, შეგახო ბაგეთა შენთა და მოგისპ[ნე] ურჩულოებანი და ცოდვანი შენნი.
და მესმა ჴმაჲ უფლისაჲ, ვითარ-იგი იტყოდა: ვინ მივავლინო ანუ ვინ მივიდეს ერისა მის? და ვთქუ: აჰა, ესერა, ვარ, და მიმავლინე მე.
და მრქუა მე უფალმან: წარვედ და არქუ ერსა მას: სმენით გესმოდის და არა გულისხმა-ყოთ, ხედვით ხედვიდეთ და ვერ იხილოთ,
რამეთუ განზრქნა გული ერისაჲ მის; ყურთა მათთა ესმოდა და არა გულლისხმა-ყვეს; თუალითა მათითა ხედვიდეს და დაიწუხნეს; რაჲთა ხედვით ხედვიდენ და არა იხილონ; და სმენით ესმოდის და არა ისმინონ ანუ გულისხმა-ყონ გულითა მათითა მოქცევად სინანულისა, და მე განვკურნნე იგინი.
