Page of ms. P: 320v ამისთჳს ამას იტყჳს უფალი საბაოთ: ნუ გეშინინ, ერო ჩემო, რომელნი დამკჳდრებულ ხართ სიონს, ასურასტნელთათჳს, რამეთუ კუერთხითა გცე შენ; და გუემაჲ მოვაწიო შენ ზედა, Page of ms. P: 321r ხილვად გზაჲ ეგჳპტისაჲ.
მერმეთა მცირედ დასცხრეს რისხვაჲ ჩემი შენთჳს, რამეთუ გულისწყრომაჲ ჩემი რისხვასა მათსა.
და აღადგინოს ღმერთმან მათ ზედა ტანჯვაჲ წყლულებისა მისებრ მადიამისა ადგილსა ჭირისასა, ხოლო გულისწყრომაჲ მისი გზასა მას ზღჳთკერძოსა ეგჳპტით მიმართ.
და იყოს, მას დღესა შინა მოგეღოს უღელი მისი ქედისაგან შენისა და შიში მისი შენგან, და განირყუნეს უღელი მისი მჴართაგან შენთა,
რამეთუ მოიწიოს ქალაქად ანგედ და თანაწარვლოს მაგედონი და მაქმასს დადვას საჭურველი თჳსი.
და წარვლოს ჴელი იგი და მიიწიოს გაბაონდ და იქცეოდის; შიშმან შეიპყრას ქალაქი საულისი.
ივლტოდის ასული გალიმისი, ესმეს ლაიზს, ესმეს ანათოთს,
განჰკრთეს მედებაჲ და მკჳდრნი მისნი,
ჰლოცვიდენ დღისი, გზასა დადგრომად ევედრებოდიან ჴელითა ასულისა სიონისაჲთა [მთანი] და ბორცუნი, რომელნი იყვნენ იერუსალჱმს.
და, აჰა, ესერა, უფალი საბაოთ შეაძრწუნებს დაბადებულთა ძრიელებითურთ, და მაღალნი იგი გინებით შეიმუსრნენ, და განსაცხრომელნი იგი დამდაბლდენ,
და დაეცნენ მაღალნი იგი მახჳლითა, ხოლო ლიბანი სიმაღლითურთ დაეცეს.
