Page of ms. P: 321r უფალო ღმერთო ჩუენო, გადიდებთ შენ, უგალობთ სახელსა შენსა, რომელმან ჰქმნენ საკჳრველნი საქმენი; ზრახვაჲ დასაბამისაჲ ჭეშმარიტ
იყავნ, უფალო, რამეთუ დასცენ ქალაქნი მიწად, ქალაქნი ძრიელნი; დაცემად იგი საფუძველითგან უღმრთოთა, ქალაქი საუკუნოჲ არა აღეშჱნოს.
ამსთჳს გაკურთხევდეს შენ ერი გლახაკი, და ქალაქნი კაცთა დაჭირვებულთანი გაკურთხევდენ შენ,
Page of ms. P: 321v რამეთუ ექმენ ყოველსა ქალაქსა მდაბალსა შემწე და სულმოკლეთა _ ნაკლულევანებისაგან მფარველ, კაცთაგან უკეთურთა იჴსნენ იგინი,
მფარველ წყურიელთა და სულმოკლეთა კაცთა დაწუნებულთა, რამეთუ კაცნი სულმოკლენი წყურილითა სიონს შინა კაცთა მათ უღმრთოთა, რომელთა მიმცენ ჩუენ.
და უყოს უფალმან საბაოთ ყოველთა წარმართთა; მთასა ამას ზედა სიონსა [სუმიდენ] ღჳნოსა, იცხებდენ ნელსაცხებელსა.
და მოეცნენ მთასა ამას. მოცემით მოეცეს ესე ყოველი წარმართთა, რამეთუ ზრახვაჲ ესე ყოველთა მიმართ წარმართთა შთანთქა.
სიკუდილმან შეუძლო და კუალად მოსპო ღმერთმან ყოველი ცრუჲ ყოვლისაგან პირისა, ყუედრებაჲ ერისა თჳსისაჲ, რამეთუ პირი უფლისაჲ იტყოდა.
და თქუა მას დღესა შინა: აჰა, ღმერთი ჩუენი, რომელსა ჩუენ ვესევდით, და ვიხარებდით მაცხოარებითა მისითა.
