Page of ms. P: 137V ხოლო სულიერთა მათთჳს, ძმანო, არა მნებავს უმეცრებაჲ თქუენი.
უწყი, რამეთუ ვიდრე იგი წარმართღა იყვენით, კერპთა მიმართ უჴმოთა ვითარცა შეუდეგით, და მიმოყვანებულ იყვენით.
ამისთჳს გაუწყებ თქუენ: არავინ სულითა ღმრთისაჲთა იტყოდის და თქუას: შეჩუენებულ იესუ; და არავის ჴელ-ეწიფების თქუმად: უფალი იესუ, გარნა სულითა წმიდითა.
განყოფანი მადლთანი არიან, ხოლო იგივე სული არს.
განყოფანი მსახურებათანი არიან, და იგივე თავადი უფალი არს.
განყოფანი შეწევნათანი არიან, და იგივე თავადი უფალი არს, რომელი შეიქმს ყოველსა ყოველთა მიმართ.
და კაცად-კაცადსა მიცემულ არს გამოცხადებაჲ იგი სულისაჲ უმჯობჱსისაჲ.
რომელსამე -- მიცემულ არს სიტყუაჲ სიბრძნისაჲ; რომელსამე -- სიტყუაჲ მეცნიერებისაჲ მითვე სულითა;
რომელსამე -- სარწმუნოებაჲ მისვე სულისაგან; რომელსამე -- მადლი კურნებათაჲ მისვე სულისაგან;
რომელსამე -- შეწევნანი ძალთანი, რომელსამე -- წინაწარმეტყუელებაჲ, რომელსამე -- განკითხვაჲ სულისაჲ, რომელსამე -- თესლად-თესლადი ენათაჲ, რომელსამე -- თარგმანებაჲ ენათაჲ.
ამას შეეწევის ერთი და იგივე სული, განუყოფს კაცად-კაცადსა თითოეულად, ვითარცა ჰნებავს.
ვითარცა-იგი გუამი ერთ არს, და მრავალი ასოჲ აქუს, და ყოველი იგი ასოები მრავალ ღათუ არს, ერთ გუამ არს, ეგრეცა ქრისტჱ.
ერთითა სულითა ჩუენ ყოველთა ერთისა მიმართ გუამისა ნათელ-ვიღეთ, გინა თუ ჰურიათა, გინა თუ წარმართთა, გინა თუ მონათა, გინა თუ აზნაურთა; ყოველთა ერთისა მიმართ სუ\ლისა Page of ms. P: 138R გჳსუამს.
და რამეთუ გუამი იგი არა არს ერთ ასო, არამედ მრავალ.
Page of ms. P: 96R და თუ ევნებინ ერთსა ასოსა, მის თანა ევნებინ ყოველთა ასოთა; და თუ იდიდებინ ერთი ასოჲ, მის თანა იდიდებიედ ყოველნი ასონი.
თქუენ ხართ ჴორცნი ქრისტჱსნი და ასონი ასოთა მისთაგანნი.
და რომელნიმე დაადგინნა ღმერთმან ეკლესიათა: პირველად მოციქულნი, მეორედ -- წინაწარმეტყუელნი, მესამედ -- მოძღუარნი, Page of ms. P: 96V მერმე -- ძალნი, მაშინღა მადლნი კურნებათანი, შეწევნანი ღუაწლთანი, თელად-თესლადი ენათაჲ.
ნუუკუე ყოველნი მოციქულ იყვნენა? ანუ ყოველნი ნუ წინაწარმეტყუელ იყვნენა? ანუ ყოველნი ნუ მოძღუარ იყვნენა? ანუ ყოველნი ნუ ძალ იყვნენა?
ანუ ყოველთა ნუ მადლი აქუნდეს კურნებათაჲ? ანუ ყოველნი ნუ გამოსთარგმანებდენ?
გშურდინ მადლი იგი უფროჲსი, და მერმე უმეტჱსი გზაჲ გიჩუენო თქუენ.
