კუალად ვიტყჳთ თავთა თჳსთა წამებად. ანუ გჳჴმსმე რაჲ, ვითარცა-იგი ვიეთმე საწამებელი წიგნი აქუს თქუენდა მიმართ და თქუენგან?
ხოლო წიგნი ჩუენდა თქუენ ხართ უფლისა მიერ, დაწერილ გულთა ჩუენთა, უწყებულ და აღმოკითხულ ყოველთა მიერ კაცთა.
შჩანთ, რამეთუ ხართ თქუენ წიგნ სამოციქულო ქრისტესა, რომელი იმსახურების ჩუენ მიერ, დაწერილი არა მელნითა, არამედ სულითა ღმრთისა ცხოველისაჲთა, არა ფიცართა ქვისათა, არამედ ფიცართა გულისა ჴორციელისათა.
ხოლო სასოებაჲ ესევითარი გუაქუს ქრისტჱს მიერ ღმრთისა;
არა თუ თავით თჳსით შემძლებელ ვართ შერაცხად რასამე ვითარცა ჩუენგან, არამედ შეძლებაჲ ჩუენი ღმრთისაგან არს,
რომელმან შემძლებელ მყვნა ჩუენ მსახურებად ახლისა აღთქუმისა.
Page of ms. P: 358V ხოლო სასოებაჲ ესევითარი გუაქუს ჩუენ ქრისტჱს მიერ ღმრთისა მიმართ;
არა თუ თავით თჳსით შემძლებელ ვართ შერაცხად რასამე ჩუენგან, არამედ შეძლებაჲ ჩუენი ღმრთისაგან არს.
რომელმან-იგი შემძლებელ მყვნა ჩუენ მსახურებად ახლისა შჯულისა, არა თუ წიგნითა, არამედ სულითა, რამეთუ წიგნმან მოაკუდინის, ხოლო სულმან აცხოვნის.
უკუეთუ მსახურებაჲ იგი სიკუდილისაჲ, წიგნთა გამოსახული ფიცართა შინა, იქმნა დიდებულ, ვითარმედ ვერ შემძლებელ იყვნეს თუალთა მიდგმად ძენი ისრაჱლისანი პირსა მოსესა დიდებითა მით პირისა მისისაჲთა, რომელი განქარვებად იყო,
რაოდენ მსახურებაჲ იგი სულისაჲ იყოს დიდებით?
უკუეთუ მსახურებად იგი დასჯისაჲ დიდება არს, რაოდენ უფროჲს აღემატოს მსახურებაჲ იგი სულისაჲ დიდებით.
რაჲთა რამეთუ არღა დიდებულ არს დიდებადი იგი ამით ჯერითა გარდარეულისა მისთჳს დიდებისა.
უკუეთუ განქარვებადი იგი დიდებით იყო, რაოდენ უფროჲს, რომელი ჰგიეს დიდებით.
რამეთუ მაქუს ჩუენ Page of ms. P: 359R ესევითარი სასოებაჲ, მრავალი განცხადებული ვიღუაწოთ.
და ვითარ-იგი მოსე საბურველი დაიბურის პირსა თჳსსა, რაჲთა არა ხედვიდენ ძენი ისრაჱლისანი დასასრულსა მას განქარვებისასა.
არამედ დაბრმეს გონებანი მათნი, ვიდრე დღენდელად დღედმდე იგივე საბურველი ძუელისა შჯულისაჲ ჰგიეს განუძუარცველად, რამეთუ ქრისტჱს მიერ განქარდების.
დღენდელად დღედმდე, რაჟამს აღმოიკითხვების მოსე, საბურველი გულსა მათსა ძეს.
ხოლო რაჟამს მოიქცის უფლისა, მოეძუარცის საბურველი იგი.
ხოლო უფალი სულ არს; სადა სული ღმრთისაჲ, მუნ აზნაურებაჲ არს.
ხოლო ჩუენ განცხადებულითა პირითა დიდებასა უფლისასა განვიცდით და მასვე ხატსა მივიცვალებით დიდებითი დიდებად, ვითარცა-იგი უფლისაგან სულად.
