Page of ms. P: 227V მოხუცებული რჩეულსა დედოფალსა და შვილთა მისთა, რომელნი მიყუარან ჭეშმარიტებით, არა ხოლო მე, არამედ ყოველთა. რომელთა შეიყუარეს ჭეშმარიტებაჲ
ჭეშმარიტებითა მით, რომელი დამკჳდრებულ არს ჩუენ შორის და ჩუენ თანა იყო[ს] უკუნისამდე.
იყავნ ჩუენ თანა მადლი, მშჳდობაჲ, წყალობაჲ ღმრთისა მიერ მამისა და ქრისტე იესუს მიერ, ძისა მისისა, ჭეშმარიტებითა და სიყუარულითა.
განვიხარე ფრიად, რამეთუ ვპოვე შვილთაგან შენთა, რომელნი ვლენან ჭეშმარიტებით, ვითარცა-ეგე მცნებაჲ მოვიღეთ მამისაგან.
აწ გიკითხავ შენ, დედოფალო, არა ვითარ მცნებასა ახალსა მივსწერ შენდა, არამედ რომელი მაქუნდა დასაბამითგან, რაჲთა ვიყუარებოდით ურთიერთას.
და ესე არს სიყუარული, რაჲთა ვიდოდით მცნებათაებრ მისთა Page of ms. P: 228R და ესე არს მცნებაჲ მისი, რაჲთა, ვითარცა-იგი გესმა დასაბამითგან, მას შინა ხჳდოდით {1}
Page of ms. P: 229R ეკრძალენით თავთა თქუენთა, რაჲთა არა წარსწყმიდოთ, რაჲ-იგი ჰქმენით, არამედ სასყიდელი სავსებით მოიღოთ.
ყოველი წინამძღუარი, რომელი არა ეგოს მოძღურებასა ზედა ქრისტჱსსა, Page of ms. P: 229V მის თანა ღმერთი არა არს, ხოლო რომელი ეგოს მოძღურებასა ზედა ქრისტჱსსა, მის თანა ძჱცა და მამაჲცა არს.
რომელი მოვიდოდის თქუენდა და ესე მოძღურებაჲ არა აქუნდეს, ნუ შეიწყნარებთ მას სახიდ და ნუცა მოიკითხავთ.
რომელმან მოიკითხოს იგი, ეზიაროს საქმეთა მისთა ბოროტთა.
მრავალი მეგულვა მიწერად თქუენდა, არამედ არა ვინებე ქარტითა და მელნითა, რამეთუ ვესავ მოსლვად თქუენდა პირისპირ სიტყუად, რაჲთა სიხარული იგი ჩუენი იყოს სავსებით.
გიკითხვენ შენ შვილნი დისა შენისა რჩეულისანი.
