Page of ms. P: 233R იუდა, იესუ ქრისტჱს მონაჲ ძმაჲ იაკობისი, თქუენ ღმრთისა მიერ დამარხულთა,
წყალობაჲ თქუენდა, მშჳდობაჲ და სიყუარული განმრავლდინ.
საყუარელნო, ყოველივე წრაფაჲ ვყავ მიწერად თქუენდა [ზოგადისა მისგან ცხორებისა ჩუენისა. ჯერ-მიჩნდა {1} მიწერად თქუენდა, გლოცავ, იღუწიდით მათ ზედა, რომელი ერთვე მიეცა წმიდათა სარწმუნოებაჲ. Page of ms. P: 233V
რამეთუ შემო-ვინმე-ვიდეს, რომელნი მაშინვე პირველ წერილ იყვნეს ამას სასჯელსა, უღმრთონი, რომელნი მადლსა ღმრთისა ჩუენისასა გარდააქცევენ არაწმიდებად და მხოლოსა უფალსა ჩუენსა იესუ ქრისტესა უარ-ჰყოფენ.
მოჴსენებაჲ თქუენი მნებავს, დაღაცათუ იცით ყოველი, რამეთუ ღმერთმან ერთ-გზის ერი იგი იჴსნა ეგჳპტით, ხოლო მეორედ ურჩნი იგი წარწყმიდნა.
ანგელოზნი, რომელთა არა დაიმარხეს სასამთავროჲ იგი თჳსი, არამედ დაუტევეს სამკჳდრებელი თჳსი, სასჯელად დიდისა დღისა საკრველითა მით სამარადისოჲთა წყუდიადსა შინა დაჰმარხნა,
ვითარცა სოდომაჲ და გომორაჲ და გარემო ქალაქები იგი, ეგრევე სახედ მათსა ისიძვიდეს და მიდევნებულ იყვნეს შედგომად ჴორცსა უცხოსა, წინა სხენან სახედ ცეცხლისა საუკუნისა, სასჯელი მიუღებიეს.
ეგრევე სახედ ესენი საჩუენებელს იხილვენ, ჴორცთა შეიბილწებენ, უფლებასა შეურაცხ-ჰყოფენ და დიდებასა ჰგმობენ.
ოდეს-იგი მიქაელ მთავარ-ანგელოზი ეშმაკსა ესჯოდა და ეტყოდა მოსეს ჴორცთათჳს, ვერ იკადრა სასჯელი გმობისაჲ მოწევნად მის ზედა, არამედ ჰრქუა: შეგრისხენინ შენ უფალმან!
ხოლო ესენი, რომელ-იგი არა იციან, ჰგმობენ, და რომელიგი იციან ბუნებით, ვითარცა პირუტყუთა საცხოართა, {1} მას შინა განიხრწნებიან.
ვაჲ მათ, რამეთუ გზასა მას კაენისსა ვლენან და საცთურსა მას ბალაამის[სა] {2} სასყიდელსა აღერინეს და ცილობითა მით კორესითა წარწყმდეს.
ესენი არიან, რომელნი სიყუარულთა თქუენთა შებილწებულნი თანა-\შეგცხრებიან Page of ms. P: 234R და უშიშრად თავთა თჳსთა მწყსიან. ღრუბელნი ურწყულნი, ქარისაგან მიმოტაცებულნი, ხენი ზამთრისანი უნაყოფონი, ორ-გზის მომწყუდარნი, ძირითურთ მოფხურილნი,
ღელვანი [ზღჳსანი] განძჳნებულნი, პერად აღმოაფქურევენ თავისა თჳსისა სირცხჳლსა, ვარსკულავნი ცთომილნი, რომელთათჳს წყუდიადი იგი ბნელისაჲ დამარხულ არს.
წინაწარმეტყუელა მათთჳს მეშჳდემან ადამისთაგან ენუქ და თქუა: აჰა ესერა მოვიდეს უფალი ბევრეულითა წმიდათა ანგელოზთა მისთაჲთა.
ყოფად სარჩელისა ყოველთათჳს და მხილებად ყოველთა უღმრთოთა ყოველთათჳს საქმეთა უღმრთოებისა მათისათა, რომელითა შესცოდეს, ყოველთა სიტყუათა ფიცხელთა. რომელითა ეტყოდეს მას ცოდვილნი უღმრთონი.
ესენი არიან მდრტჳნველნი, მაბრალებელნი, გულის-თქუმასა თავისა თჳსისასა მავალნი. და პირი მათი იტყჳს გარდარეულსა, და თუალთ-აღებენ წინაშე პირთა სარგებელისა მიზეზითა.
ხოლო თქუენ, საყუარელნო. მოიჴსენინით სიტყუანი იგი წინაჲსწარ {3} თქუმულნი მოციქულთა მიერ უფლისა ჩუენისა იესუ ქრისტჱსთაჲ;
რამეთუ გეტყოდეს თქუენ, ვითარმედ უკუანაჲსკნელთა ჟამთა მო-ვინმე-ვიდენ მეკიცხეველნი, მსგავსად გულის-თქუმისა თჳსისა მავალნი უღმრთოებასა.
ესენი არიან, რომელნი გამოიშორებენ თავთა თჳსთა, მშუმინვიერნი, რომელთა სულ არა აქუს.
ხოლო თქუენ, საყუარელნო, აღაშჱნებდით თავთა თჳსთა წმიდითა მაგით სარწმუნოებითა თ\ქუენითა Page of ms. P: 234V და სულითა წმიდითა ილოცევდით,
თავთა თჳსთა სიყუარული ღმრთისაჲ დაიმარხეთ და მოელოდეთ წყალობასა უფლისა ჩუენისა იესუ ქრისტჱსსა ცხორებად საუკუნოდ,
და რომელთამე სწყალობდით შეუორგულებელად.
და რომელთამე იჴსნიდით და ვითარცა ცეცხლისაგან გამოიტაცებდით, რომელნიმე გეწყალოდენ შიშით. გძულდინ ჴორცთაგან შეგინებული იგი სამოსელი.
ხოლო რომელი-იგი შემძლებელ არს დამარხვად თქუენდა შეუცოდებელად, დადგინებად წინაშე დიდებისა მისისა უბიწონი სიხარულით,
მხოლოსა ღმერთსა, მაცხოარსა {1} ჩუენსა, იესუ ქრისტჱს მიერ უფლისა ჩუენისა, დიდებაჲ და სიმდიდრჱ, სიმტკიცჱ და ჴელმწიფებაჲ, უწინარჱს ყოველთა საუკუნეთა, აწ და ყოველთა მიმართ ჟამთა უკუნითი უკუნისამდე, ამენ.