TITUS
Nevm.dzlisp.
Part No. 16
Previous part

Canon: b  
Ode: ug.  
ძლისპირნი და ღმრთისმშობლისანი
უგალობდითსა ჴმაჲ ბ


Hymn number: 22(1)  
Hymn type: h     ზღჳსა ღელვათა მძჳნვარეთა წიაღ-ხდეს დაულტობელად Ms. page: 10r   ისრაელნი პირველად ძლიერებითა Page of ed.: 887  მარჯუენისა ღმრთისაჲთა და სიღრმეთა მათ დაფარნეს მეგჳპტელნი და საფლავ ექმნნეს წყალნი ბანაკსა მათსა.
Hymn type: t     მოდრიკნა ცანი და გარდამოჴდა შენდა, ყოლად უსძლოო, ცხორების მომცემელი ქრისტე, ძე ღმრთისაჲ, პირველ ჟამთა შობილი, რომლისა მიმართ ვედრებად ნუ დასცხრები ჴსნად ჩუენდა ყოვლისაგან განსაცდელისა.

Hymn number: 23(2)  
Hymn type: h     განაპო სიღრმე ზღჳსაჲ ბრძანებით და ჴმელად განიყვანნა რჩეულნი, ხოლო მას შინა დაანთქნა მტერნი მათნი ძლიერმან ძალითა ბრძოლასა უფალმან, რამეთუ დიდებულ არს.
Hymn type: t     მეუფისა საუნჯე ხარი შენ, დედოფალო დაბადებულთაო, რომელმან იტჳრთე მარგალიტი წმიდაჲ, განმამდიდრებელი ყოვლისა სოფლისაჲ, რომელი დიდებულ არს.

Hymn number: 24(3)  
Hymn type: h     ღელვათა დაანთქა პირველად ფარაო ეტლებითურთ და აღჭურვილი ძლიერად სპარაზენით სიტყუამან მამისამან, Ms. page: 10v   რომელი განჴორციელდა ჩუენ ცოდვილთათჳს, რომელსა უგალობთ: უფალო დიდებულო, დიდებულ ხარ.
Hymn type: t     უზეშთაეს ხარ, ყოლად წმიდაო, ყოველთა დაბადებულთა, ხილულთა და უხილავთა, ღმრთისმშობელო, რამეთუ შემოქმედი მათი მუცლისა შენისაგან განჴორციელდა, ვითარცა ინება ცხორებისათჳს სულთა ჩუენთაჲსა.

Hymn number: 25(4)  
Hymn type: h     ყოველი ერი უგალობდეთ უფალსა მძლესა გალობისასა, რომელმან ქმნა საკჳრველი საკჳრველებათაჲ ზღუასა მას მეწამულსა.
Hymn type: t     შენ, უბიწოო, წმიდაო დედოფალო, ღმრთისმშობელო მარიამ, მეოხ გუეყავ ჩუენ, მვედრებელთა შენთა, შენგან შობილისა მიმართ.

Page of ed.: 888 
Hymn number: 26(5)  
Hymn type: h     უგალობდეთ უფალსა გალობითა, საკჳრველთ-მოქმედსა, რომელმან იჴსნა ერი მონებისაგან მტერთაჲსა და უფსკრულისა, რამეთუ დიდებულ არს.
Hymn type: t     უგალობდეთ უფალსა, რომელმანცა უცხოჲ სასწაული გჳჩუენა მორწმუნეთა: შობაჲ თჳსი ქალწულისაგან და დაცვაჲ წმიდად შემდგომად შობისა ქალწულად.

Hymn number: 27(6)  
Hymn type: h     მოვედით, ერნო, უგალობდეთ გალობითა ქრისტესა, რომელმან სასწაულითა ერი თჳსი იჴსნა ეგჳპტელთა მონებისაგან ძლევისა გალობითა, რამეთუ დიდებულ არს.
Hymn type: t     ვინ შემძლებელ არს მითხრობად ჯერისაებრ, მარიამ, მუცლად-ღებასა შენსა, ღმრთისმშობელო ქალწულო, რამეთუ ღმერთი ჴორცითა შენ მიერ გამოუჩნდა კაცთა ნათესავსა.

Hymn number: 28(7)  
Hymn type: h     უგალობდეთ უფალსა, რომელმან წარუმართა გზაჲ პირველად ზღუასა შინა ერსა თჳსსა და ფარაო დაანთქა მჴედრებითურთ ძლევისა გალობითა, რამეთუ დიდებულ არს.
Hymn type: t     შენ, მხოლოო კურთხეულო, სამკჳდრებელო სიწმიდისაო, უბიწოო, მწიკულევალთაგან ვნებათა სულისა ჩემისათა განმწმიდე და მითხოე ძისა შენისაგან წყალობაჲ.

Hymn number: 29(8)  
Hymn type: h     რომელმან განაჴმო ზღუაჲ მღელვარე უვალი წამისყოფითა თჳსითა შემაძრწუნებელითა და ღირს-ყო ერი თჳსი ისრაელი მავალად მას, ვითარცა ენება, ღმერთსა დიდებულსა, გალობით უგალობდეთ.
Hymn type: t     რომელმან ღმრთისმშობელ ყო ქალწული, მომცემელი ნათესავსა ადამეანთასა და მადლთა მისთა უხუებით და მის მიერ სრულ ყო თხოვაჲ მვედრებელთა მისთაჲ, ღმერთსა დიდებულსა გალობით უ[გალობდეთ].

Hymn number: 30(9)  
Hymn type: h     ბუნებაჲ წყლისა მდინარისაჲ შეჰყინდა Page of ed.: 889  და შეკრბა კუალად-ქცევითა და სიღრმე ზღჳსა მეწამულისაჲ განვლო ისრაელმან Ms. page: 11r.   ფერჴითა დაულტობელითა და განჰმზადა მისაგებელად უფლისა გალობაჲ სულიერი.
Hymn type: t     უსხეულოთა განწყობილებაჲ გადიდებს, ქერაბინთა უზეშთაესო, მტჳრთველო დამბადებელისაო, ქალწულო წმიდაო, მშობელო სიტყჳსა ღმრთისაო, და ჩუენ, მორწმუნენი, მათ თანა დაუცხრომელად თაყუანის-გცემთ შენ.



Ode: moix.  
მოიხილესა


Hymn number: 31(1)  
Hymn type: h     ცაჲ და ქუეყანაჲ გულისჴმის-ყოფით ქრისტესა ადიდებდით აწ, რომელმან იორდანესა განაახლნა დღეს ნათესავი კაცთაჲ ურჩებით დაძუელებული.
Hymn type: t     ერთარსებაო, სამგუამოვნებით ცნობილო მორწმუნეთაგან, ერთღმრთეებით დიდებულო, დაგჳცვენ ჩუენ, მგალობელნი შენნი, აღზრდილნი სარწმუნოებით.

Hymn number: 32(2)  
Hymn type: h     ვიხილეთ ჩუენ ქრისტე ხატითა ჩუენითა, რომელ არს ხატი ღმრთისა უხილავისაჲ და აღვიარებთ ორად ბუნებად, ღმერთად და კაცად, სახიერებით საკჳრველთ-მოქმედსა ღმერთსა ჩუენსა და მქუსველსა ცათა და ქუეყანისასა.
Hymn type: t     სოფლისა სასოო, მჴსნელისა დედაო, უცხოდ მუცლად-იღე შენ ცათა მეუფჱ, რომელი თაყუანის-იცემების მამისა თანა სულით წმიდითურთ და აწ ჩუენ აღგძრავთ შენ მეოხებად, რაჲთა მოგუანიჭოს ჩუენ დიდი წყალობაჲ.



Ode: gandzl.  
განძლიერდასა


Hymn number: 33(1)  
Hymn type: h     განჴსნილნი ძუელთა კრულებათა ჩუენთაგან და ჴსნილნი მჴეცთა შუვა მძჳნვარეთაგან, მხიარულებით აღებითა პირთაჲთა სიტყუასა ღმერთსა სიტყჳთა ჴმიანითა Page of ed.: 890  სარწმუნოებით და ქებით ვადიდებდეთ.
Hymn type: t     რომელმან გჳშევ თჳნიერ ქორწილსა სერაბინთა და ქერაბინთა უფალი და უვნებელად დაადგერ ქალწულადვე, მიჴსნენ მონანი შენნი ბოროტისაგან, რამეთუ გაქუს მადლი მეოხებად ჩუენდა.

Hymn number: 34(2)  
Hymn type: h     რომელმან მოსცა ძლევაჲ მეფესა ჩუენსა უფალმან და აღამაღლა რქაჲ ცხებულისაჲ და ადიდა ეკლესიაჲ მართლმადიდებლობასა შინა, ამას უღაღადებდეთ დღეს: არავინ არს წმიდაჲ, ვითარ ღმერთი ჩუენი.
Hymn type: t     დედაჲ ნათლისაჲ შემწედ აღვიაროთ, მორწმუნენო, და ლმობიერად შეუვრდეთ მას და მისგან შობილისაგან მითხოოს ჩუენ დიდი წყალობაჲ, რომელსა უღაღადებთ დღეს: არავინ არს წმიდაჲ ვითარ ღმერთი ჩუენი.

Hymn number: 35(3)  
Hymn type: h     აღყუავილნა შროშნის სახედ მოსლვითა შენითა, ქრისტე, რომელ არს ბერწი წარმართთა ეკლესიაჲ და იქმნა შვილ-მრავალ, რომელსა შინა განაძლიერენ გულნი ჩუენნი.
Hymn type: t     გუნდნი იგი ზეცისანი განაკჳრნა შობამან შენმან, ყოლად უბიწოო, და Ms. page: 11v   გულნი კაცთანი შეაძრწუნნა, ამისთჳსცა ღმრთისმშობელად აღგიარებთ შენ.

Hymn number: 36(4)  
Hymn type: h     განმაძლიერენ მოსავნი შენნი, უფალო, რომელმან ჯუარითა მოჰკალ ცოდვაჲ შენი და დაჰნერგე შიში შენი გულთა შინა ჩუენთა შენ, კაცთ-მოყუარე.
Hymn type: t     განანათლნა, მარიამ, შობმან შენმან, კიდენი ცისანი, უბიწოო ქალწულო, ამისთჳსცა ღირსად გნატრით და ღმრთისმშობელად ჩუენ აღგიარებთ შენ.

Hymn number: 37(5)  
Hymn type: h     განძლიერდა დღეს გული ჩემი უფლისა მიმართ, ამაღლდა რქაჲ ჩემი ღმრთისა მიერ, რომელი ჯუარს ეცუა ჩუენთჳს Page of ed.: 891  და სოფელი აღავსო სიხარულითა.
Hymn type: t     მუცლად-მღებელსა ზეცას ღმრთისა უდედოჲსასა, მშობელსა უმამოდ ქუეყანასა გალობით ვადიდებდეთ ჩუენ, ვითარცა ღმრთისმშობელ არს მხოლოჲ ქალწული.

Hymn number: 38(6)  
Hymn type: h     დამამტკიცე მე, უფალო ღმერთო ჩემო, რაჲთა არა იქადოს მტერმან ჩემმან ჩემ ზედა, შენ ხარ ღმერთი განმაძლიერებელი და შესავედრებელი ჩემი.
Hymn type: t     ეევედრე მას, რომელი ჰშევ, ღმრთისმშობელო, რაჲთა შემწე მეყოს ჩუენ, მადიდებელთა შენთა, შენ ხარ სასოჲ და სიქადული ჩუენი და შემდგომად ღმრთისა მფარველი.

Hymn number: 39(7)  
Hymn type: h     კლდესა ზედა სარწმუნოებისასა დამამტკიცე და განავრცე პირი შენი ზედა მტერთა ჩემთა და ახარე სულსა ჩემსა, რაჲთა ჴმა-ვყო შენდა მიმართ, მხოლოო: რამეთუ არავინ არს წმიდა შენსა გარეშე, ღმრთისა ჩუენისა.
Hymn type: t     შენ მხოლოჲ ქუეყანასა ზედა გამოჩნდი მიწევნად უზეშთაეს ბუნებათასა, ღმერთი, დაუტევნელი ყოველთაჲ, მუცლად-იღე და გამოგჳბრწყინვე, ამისთჳს ყოველნი ჭეშმარიტად ღმრთისმშობელად აღგიარებთ შენ.

Hymn number: 40(8)  
Hymn type: h     მფარველი ხარ უძლეველი შენ, ქრისტე, და სიმტკიცე შეურყეველი მოსავთა შენთაჲ, დაურჩელად დამიცვენ ჩუენ და დამამტკიცენ კლდესა მას ზედა სარწმუნოებისა შენისასა დამყარებულსა, შენ, ყოლად ძლიერო უფალო.
Hymn type: t     მზისა უბრწყინვალესი გჳჩუენე ჩუენ, განმანათლებელი სულისაჲ, ღმრთისა დედაო, რომელსა ევედრე ჩუენთჳს დაუცხრომელად, რაჲთა მიჴსნნეს ჩუენ ყოველთაგან მტერისა საბრჴეთა, მეოხებითა შენითა, სახარულევანო.


This text is part of the TITUS edition of Nevm.dzlisp..

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.