იუდა, იესუ ქრისტჱსი მონაჲ, ძმაჲ იაკობისი, თქუენ, ღმრთისა მიერ მამისა შეყუარებულთა და ქრისტე იესუს მიერ დამარხულთა,
წყალობაჲ თქუენ თანა და მშჳდობაჲ და სიყუარული განმრავლდინ!
საყუარელნო, ყოველივე სწრაფაჲ ვყავ მიწერად თქუენდა ზოგადისა მის ცხორებისა ჩუენისათჳს. ჯერ-მიჩნდა მიწერად თქუენდა. გლოცავ, იღუწიდით მას ზედა, რომელი-იგი ერთვე მიეცა წმიდათა სარწმუნოებაჲ.
რამეთუ შემო-ვინმე-ვიდის კაცნი, რომელნი მაშინვე პირველ წერილ იყუნეს ამას საშჯელსა, უღმრთონი, რომელნი მადლსა ღმრთისა ჩუენისასა გარდააქცევენ არაწმიდებად და მხოლოსა მფლობელსა და უფალსა Manuscript page: 126v ჩუენსა იესუ ქრისტესა უვარ-ჰყოფენ.
მოჴსენებაჲ თქუენი მნებავს, დაღათუ იცით ყოველი, რამეთუ ღმერთმან ერთ გზის ეგჳპტით ერი იგი იჴსნა, ხოლო მეორედ ურჩნი იგი წარწყმიდნა.
ანგელოზნი რომელთა არა დაიმარხეს თჳსი იგი სამთავროჲ, არამედ დაუტევეს სამკჳდრებელი მათი, საშჯელად დიდისა დღისა საკრველებითა მით სამარადისოჲთა წყუდიადსა ქუეშე დაჰმარხნა,
ვითარცა სოდომაჲ და გომორაჲ და გარემოჲს მათსა ქალაქები იგი; ეგრევე სახედ მათსა ისიძვიდეს და მიდევნებულ იყუნეს შედგომად ჴორცსა უცხოსა, წინა სხენან სახედ ცეცხლისა საუკუნისა, საშჯელი მიუღებიეს.
ეგრევე მსგავსად ესენი საჩუენებელსა იხილვენ, ჴორცთა შეაბილწებენ, უფლებასა შეურაცხ-ჰყოფენ და დიდებასა Manuscript page: 127r ჰგმობენ.
ოდეს-იგი მიქაელ მთავარანგელოზი ეშმაკსა მას ეშჯოდა, ეტყოდა მოსეს ჴორცთათჳს, ვერ იკადრა საშჯელი გმობისაჲ მოწევნად მის ზედა, არამედ ჰრქუა: შეგრისხენ შენ უფალმან.
ხოლო ესენი, რომელ-იგი არა იციან გონებით, ვითარცა პირუტყუთა საცხოვართა, მათ შინა განიხრწნებიან.
ვაჲ მათა, რამეთუ გზასა მას კაენისსა ვლენან და საცთურსა მას ბალაამის სასყიდელსა აერივნეს და ცილობითა მით კორჱსითა წარწყმდეს.
ესენი არიან, რომელნი სიყუარულთა მათ თქუენთა შებილწებულნი თანა-შეგცხრებიან და უშიშად თავთა თჳსთა მწყსიან. ღრუბელნი ურწყულნი ქარისაგან მიმოტაცებულნი, ხენი ზამთრისანი უნაყოფონი ორ გზის მომწყდარნი ძირით მოფხურილნი,
ღელვანი განძჳნებულისა ზღჳსანი, Manuscript page: 127v რომელნი პერად აღმოაფქურევენ თავისა თჳსისა სირცხჳლსა, ვარსკულავნი ცთომილნი, რომელთათჳს წყუდიადი იგი ბნელი საუკუნოდ დამარხულ არს.
წინაწარმეტყუელა მათთჳს მეშჳდემან ადამისითგან ენუქ და თქუა: აჰა ესერა, მოვიდა უფალი ბევრეულითა წმიდითა ანგელოზითა მისითა
ყოფად საშჯელისა ყოველთათჳს და მხილებად ყოველთა უღმრთოთა ყოველთათჳს საქმეთა უღმრთოებისა მათისათა, რომლითა შესცოდეს, ყოველთათჳს ფიცხელთა სიტყუათა, რომელთა იტყოდეს მისთჳს ცოდვილნი უღმრთონი.
ესენი არიან მდრტჳნველნი, მაბრალობელნი, გულის თქუმასა თავისა მათისა მავალნი და პირი მათი იტყჳს გარდარეულსა და თუალნი აღებენ წინაშე პირთა სარგებელისა მიზეზითა.
ხოლო თქუენ, საყუარელნო, Manuscript page: 128r მოიჴსენენით სიტყუანი იგი წინაჲსწარ თქუმულნი მოციქულთა მიერ უფლისა ჩუენისა იესუ ქრისტჱსთაჲ.
რამეთუ გეტყოდეს თქუენ, ვითარმედ უკუანაჲსკნელთა ჟამთა მო-ვინმე-ვიდენ მეკიცხეველნი მსგავსად გულის თქუმისა თჳსისა მავალნი უღმრთოებისასა
ესენი არიან, რომელნი გამოიშორიბენ თავთა თჳსთა, მშუმინვიერნი, რომელთა სულ არა აქუს.
ხოლო თქუენ, საყუარელნო, აღაშჱნებდით თავთა თქუენთა წმიდითა მაგით სარწმუნოებითა თქუენითა და სულითა წმიდითა ილოცივდით.
თავნი თჳსნი სიყუარულითა ღმრთისაჲთა დაიმარხენით და მოელოდეთ წყალობასა უფლისა ჩუენისა იესუ ქრისტჱსსა ცხორებად საუკუნოდ.
და რომელთამე სწყალობდით შეორგულებულთა.
რომელთამე იჴსნიდით და ვითარცა ცეცხლისაგან გამოიტაცებდით, რომელნიმე გეწყალოდენ შიშით. გძულდინ ჴორცთაგან შეგინებულიცა იგი სამოსელი.
ხოლო რომელი-იგი შემძლებელ არს დამარხვად თქუენდა შეუცოდებელად და დადგინებად წინაშე დიდებისა მისისა უბიწონი სიხარულით.
მხოლოსა ღმერთსა მაცხოვარსა ჩუენსა ქრისტე იესუჲს მიერ უფლისა ჩუენისა, დიდებაჲ და სიმდიდრჱ, სიმტკიცჱ და ჴელმწიფებაჲ უწინარეს ყოველთა საუკუნეთა და აწ და ყოველთა მიმართ ჟამთა უკუნითი უკუნისამდე. ა~ნ.