*Fariseyxoy arane Niḳodim c̣iyen iudeyxoy kalaṭoġoxun soġone buy.
Šo üše Isusi ṭo͑ġo͑l hari pine: "Ravvi, avayan ki, Hun Buxaʒ́uġon yaq̇abi sa määlimnu. Šoṭaynaḳ ki, Buxaʒ́uxsuz šuḳḳalen Vi aḳesṭi möǯüzälü niśanxo aḳesṭes batenekoy".
Isusen šoṭo ǯoġabe tadi: "Serina, serinaz va nex: sal sa amdaren täzädän nanaxun nu bakayin, *Buxaʒ́uġoy padčaġluġa čalxes tene bakon".
Niḳodimen Šoṭoxun xavare haq̇i: "Yäšlu sa amdar hetäre täzädän nanaxun bakes bakon? Šo ṗä͑mǯi käräm iz nanay tapane baci saal nanaxun bakes banekon ki?"
Isusen ǯoġabe tadi: "Serina, serinaz va nex: amdaren xenaxun saal Urufaxun täzä yäšäyinš nu haq̇ayin, * *Buxaʒ́uġoy padčaġluġa bayes tene bakon.
Amdaraxun bakalo amdare, \ Urufaxun bakalo uruf.
Va Bezi "täzädän nanaxun bakalanan" upsuna mat ma manda.
Mušen iz čureġala galane fune, šoṭay säsä inbaksa, ama mayin hari maya taysuna ten avabaksa. Urufaxun täzä yäšäyinš haq̇i amdaral metäre".
Niḳodimen "ke äšur hetäre bakes bakon?" pi xavare haq̇i.
Isusen šoṭo ǯoġabe tadi: "Hun Israila čalxeci määlimnu. Moṭoġo avatenu ki?
Serina, serinaz va nex: yan beši avabakalṭuyan exlätpsa, beši aḳiṭuyan šahidluġbsa, ama vä͑n beši šahidluġbsuna tenan q̇abulbsa.
Bezi me dünyänin äšurxoxun exlätṗiṭoġo ve͑ tenansa, göynul bakala äšurxoxun exlätṗayiz hetär ve͑ bakalnan?
Göynuxun ciri *Amdari Ġaraxun bašq̇a šuḳḳal göynul laci tene, * sayǯä *Amdari Ġare ṭeṭiya bake.
Moiseyen čöle diziḳä ala e͑qevḳi ḳinäḳ * *Amdari Ġaral Buxaʒ́uġoy kiin ala e͑qecine buq̇on ki,
Šoṭo ve͑ bakala här sunṭin hämišäluġ yäšäyinš haq̇ane.
Šoṭaynaḳ ki, Buxaʒ́uġon dünyänä ṭetäre čureci ki, Iz täk sa Ġarane tadi; tanedi ki, Šoṭo ve͑ bakalo maq̇an ṗuri, ama hämišäluġ yäšäyinšq̇an haq̇i.
Buxaʒ́uġon Iz Ġara me dünyäneynaḳ pis q̇ärar č̣evkseynaḳ \ tää, šoṭo čarḳesṭeynaḳe yaq̇abi.
Šoṭin Iču ve͑ bakalṭaynaḳ pis q̇ärar tene č̣evḳal, ve͑ nu bakalṭaynaḳ isä ene pis q̇ärar tadecene, šoṭaynaḳ ki, šo Buxaʒ́uġoy täk sa Ġara ve͑ tene baki.
Tadeci q̇ärareynaḳ säbäb mone baki: dünyäne Isus išiġ ḳinäḳe hari, ama amdarxon bayinq̇luġa išiġaxun geleṭun čureci, šoṭaynaḳ ki, ičoġoy ämälxo šäre.
Pisluġ balṭin išiġa nifrätebon, iz ämälxo aḳmaq̇anci pi išiġi täräf tene taġon.
Serina ämälbalo isä išiġane č̣eġon ki, izi Buxaʒ́uġoy c̣iyal bi ämälxo aḳeġane
Koṭoxun oša Isus q̇a Iz šagirdxo Iudeyin oćalaṭun taci. Isus sa hema vaxṭ šoṭoġoxun ṭeṭiya mandi amdarxo xena badi *ḳunuḳebsay.
Ioanenal Salima ə͑śa bakala Aynonane xena badi *ḳunuḳbsay, ṭeṭiya gele xenoy. Amdarxo hari xena baci *ḳunuḳṭunbaksay.
(Ioana hälä zindana teṭun badey.) *
Me vädine Ioani šagirdxoy q̇a q̇eräz sa iudeyluni arane pak baksuni barada höǯäte biti.
Šagirdxon Ioani ṭo͑ġo͑l hari piṭun: "Ravvi, Iordan oqe be͑ġ č̣eġalač täräf vaxun sagala baki amdar vi eyexe? Hun Šoṭay barada šahidluġenbey. Mone, Šoṭinal \ *ḳunuḳebsa, bitoval Šoṭay ṭo͑ġo͑le taysa".
Ioanen ǯoġabe tadi: "Amdara Buxaʒ́uġoxun nu tadeġayin, šoṭin hiḳḳal bes tene bakon.
Bezi "Zu Xrisṭos tezu, ama Šoṭoxun be͑śez yaq̇abake" pi me äyitä vä͑n šahidnan. *
Bin šiyasa, bäy šone. Ama bäye yaq̇a be͑ġi u͑mu͑x-säsäl bakala xašṗanal bäye säsä ibakaṭan gele mu͑qe baksa. Bezi häysäṭin mu͑qluġal hametäre bex č̣eysa.
Šo kala, zu isä mic̣iḳ bakalazu".
Göynuxun Eġalo bitoṭuxun üsṭüne. Oćali ćoyexun bakalo isä oćali ćoyel bakalane, hamal me dünyäni amdar ḳinäḳ exlätṗalane. Ama göynuxun Eġalo bitoṭuxun üsṭüne.
Šoṭin ḳä aḳi-ibakenesa, šoṭoġoy baradane šahidluġbon, ama Šoṭay šahidluġa šuḳḳalen tene q̇abulbsa.
Ṭe šahidluġa q̇abulbala amdaren isä Buxaʒ́uġoy seri baksuna täsṭiġebsa.
Buxaʒ́uġon yaq̇abi Amdaren Buxaʒ́uġoy äyitäne nex, Buxaʒ́uġonal Iz Urufa Šoṭo bol-bole tasṭa.
Bavan Iz Ġara čuresa, här šeya Šoṭay kiyele tadi. *
Ġara ve͑ bakalṭin hämišäluġ yäšäyinše haq̇i baksa, Ġara ṭo͑o͑xbalṭin isä yäšäyinš tene aḳal, šoṭaynaḳ ki, Buxaʒ́uġoy äǯuġ šoṭay loxole mansṭa.
