TITUS
Biblia Udica, Versio Nizhensis: Novum Testamentum
Part No. 99
Previous part

Chapter: 5 

Me dünyänä q̇alib hariyo
Me dünyənə q'alib hariyo


Verse: 1    Isusi Xrisṭos * baksuna ve͑bakalo Buxaʒ́uġoxune. Bava čureġalṭin Šoṭoxun bakiṭuval čuresa.
   İsusi Xrist'os * baksuna věbakalo Buxačuğoxune. Bava çureğalt'in Şot'oxun bakit'uval çuresa.

Verse: 2    Beši Buxaʒ́uġoxun bakiṭoġo čuresuna isä moṭinyan aḳesṭa: Buxaʒ́uġo čuryansa, Šoṭay ämirxoval ämälyanbsa.
   Beşi Buxačuğoxun bakit'oğo çuresuna isə mot'inyan ak'est'a: Buxačuğo çuryansa, Şot'ay əmirxoval əməlyanbsa.

Verse: 3    Axəri Buxaʒ́uġo čuresun Šoṭay ämirxo ämälbsun upsune. Šoṭay ämirxo ämälbsun isä čätin tene,
   Axıri Buxačuğo çuresun Şot'ay əmirxo əməlbsun upsune. Şot'ay əmirxo əməlbsun isə çətin tene,

Verse: 4    šoṭaynaḳ ki, Buxaʒ́uġoxun bakalṭoġon me dünyäni šärä q̇alibe eysa. Yax me q̇alib eysuna q̇azayinšesṭalo isä beši ve͑luġe.
   şot'aynak' ki, Buxačuğoxun bakalt'oğon me dünyəni şərə q'alibe eysa. Yax me q'alib eysuna q'azayinşest'alo isə beşi věluğe.

Verse: 5    P̣oy me dünyänä q̇alib eġalo šuva? Sayǯä Isusi Buxaʒ́uġoy Ġar baksuna ve͑ bakalo!
   P'oy me dünyənə q'alib eğalo şuva? Saycə İsusi Buxačuğoy Ğar baksuna vě bakalo!



Buxaʒ́uġoy Ġara čalxesṭala xib šahid
Buxačuğoy Ğara çalxest'ala xib şahid


Verse: 6    Xenen ḳunuḳbaki saal Iz ṗiya cipi ṗuriyo Isus Xrisṭose. Šoṭay eysun sayǯä ḳunuḳbaksunen tää, Iz ṗi barsṭunene baki. Urufe moṭo šahidluġbalo, šoṭaynaḳ ki, Uruf - serine.
   Xenen k'unuk'baki saal İz p'iya śipi p'uriyo İsus Xrist'ose. Şot'ay eysun saycə k'unuk'baksunen təə, İz p'i barst'unene baki. Urufe mot'o şahidluğbalo, şot'aynak' ki, Uruf - serine.

Verse: 7    Metärluġen, xib šahide bu:
   Metərluğen, xib şahide bu:

Verse: 8    Uruf, xe saal ṗi. Moṭoġoy xibarayal šahidluġ sane.
   Uruf, xe saal p'i. Mot'oğoy xibarayal şahidluğ sane.

Verse: 9    Yan amdarxoy šahidluġa q̇abulyanbsa, ama Buxaʒ́uġoy šahidluġ moṭoxun üsṭüne, šoṭaynaḳ ki, šahidluġbalo Buxaʒ́uxe. Axəri Šoṭin Ičine Iz Ġare \ barada šahidluġbsa.
   Yan amdarxoy şahidluğa q'abulyanbsa, ama Buxačuğoy şahidluğ mot'oxun üst'üne, şot'aynak' ki, şahidluğbalo Buxačuxe. Axıri Şot'in İçine İz Ğare \ barada şahidluğbsa.

Verse: 10    Buxaʒ́uġoy Ġara ve͑luġ bakala amdaren me šahidluġa iz üḳe boše efsa. Ama Buxaʒ́uġo nu ve͑bakalṭin Šoṭo äfčiduġale č̣evḳsa, šoṭaynaḳ ki, Buxaʒ́uġon Ičin Iz Ġare barada bi šahidluġa tene ve͑baksa.
   Buxačuğoy Ğara věluğ bakala amdaren me şahidluğa iz ük'e boşe efsa. Ama Buxačuğo nu věbakalt'in Şot'o əfçiduğale c'evk'sa, şot'aynak' ki, Buxačuğon İçin İz Ğare barada bi şahidluğa tene věbaksa.

Verse: 11    Šahidluġ isä mone: Buxaʒ́uġon yax hämišäluġ yäšäyinše tade, me yäšäyinšal Šoṭay Ġaraxune eysa.
   Şahidluğ isə mone: Buxačuğon yax həmişəluğ yəşəyinşe tade, me yəşəyinşal Şot'ay Ğaraxune eysa.

Verse: 12    Ġara q̇abulbiṭay yäšäyinš bune, Buxaʒ́uġoy Ġara nu q̇abulbalṭay isä yäšäyinš butene
   Ğara q'abulbit'ay yəşəyinş bune, Buxačuğoy Ğara nu q'abulbalt'ay isə yəşəyinş butene



Hämišäluġ yäšäyinš
Həmişəluğ yəşəyinş


Verse: 13    Moṭoġo vä͑ynaḳ - Buxaʒ́uġoy Ġara q̇abulbiṭoġoynaḳez came ki, vä͑sṭa hämišäluġ yäšäyinš baksuna avabakanan.
   Mot'oğo və̌ynak' - Buxačuğoy Ğara q'abulbit'oğoynak'ez śame ki, və̌st'a həmişəluğ yəşəyinş baksuna avabakanan.

Verse: 14    Šoṭay be͑ś čurpi ḳänesa čuresuna beši üḳ bune, šoṭo görä ki avayan: beši Šoṭay iräziluġen afərəpi čureġalṭoġo inebaksa.
   Şot'ay běš çurpi k'ənesa çuresuna beşi ük' bune, şot'o görə ki avayan: beşi Şot'ay irəziluğen afırıpi çureğalt'oğo inebaksa.

Verse: 15    Šoṭay yax ibaksuna avayansa, beši afərəpi čureġalṭoġoy ene yax tadi baksunal avayan.
   Şot'ay yax ibaksuna avayansa, beşi afırıpi çureğalt'oğoy ene yax tadi baksunal avayan.

Verse: 16    Ägär vä͑xun sunṭin iz vičey günax äšṗesṭuna aḳayin, ama me günax šoṭo hämišäluġ yäšäyinšaxun ä͑xil sakes bakala günax tenesa, ṭe vičey čarḳeseynaḳ afərəpanan, Buxaʒ́uġonal šoṭoxun hämišäluġ yäšäyinšä kam tene bal. Ama izi ǯaza bisun bakala günaxal bune. Zu vä͑x metär günax äšṗesṭiṭaynaḳ afərəpsuna tez nex.
   Əgər və̌xun sunt'in iz viçey günax əşp'est'una ak'ayin, ama me günax şot'o həmişəluğ yəşəyinşaxun ə̌xil sakes bakala günax tenesa, t'e viçey çark'eseynak' afırıpanan, Buxačuğonal şot'oxun həmişəluğ yəşəyinşə kam tene bal. Ama izi caza bisun bakala günaxal bune. Zu və̌x metər günax əşp'est'it'aynak' afırıpsuna tez nex.

Verse: 17    Pis niyäten biq̇ala här äš günaxe, ama här günaxen yax Isusen tadi hämišäluġ yäšäyinšäxun ä͑xil sakes tene bakon.
   Pis niyəten biq'ala hər əş günaxe, ama hər günaxen yax İsusen tadi həmişəluğ yəşəyinşəxun ə̌xil sakes tene bakon.

Verse: 18    Avayan ki, Buxaʒ́uġoxun bakalṭin günaxa ičuxun ä͑xilebon. Axəri šoṭo Buxaʒ́uġoxun Bakiṭine q̇orišbsa, šär bakaloval šoṭo lafṭes tene baksa.
   Avayan ki, Buxačuğoxun bakalt'in günaxa içuxun ə̌xilebon. Axıri şot'o Buxačuğoxun Bakit'ine q'orişbsa, şər bakaloval şot'o laft'es tene baksa.

Verse: 19    Beši Buxaʒ́uġoy äylux baksuna, me dünyä isä šär bakalṭay kiin oq̇a baksuna avayan.
   Beşi Buxačuğoy əylux baksuna, me dünyə isə şər bakalt'ay kiin oq'a baksuna avayan.

Verse: 20    Buxaʒ́uġoy Ġaren hari beši pulmoġo qayepi, yanal Iču - Seri Bakalṭu čalyanxi. Isääl yan Šoṭay - Isus Xrisṭosi aḳesṭi yaq̇en taci yax Šoṭoxun sayan bsa. Šoṭo görä ki, seri bakala Buxaʒ́ux Šone, hämišäluġ yäšäyinšal Šoṭoxune eysa.
   Buxačuğoy Ğaren hari beşi pulmoğo qayepi, yanal İçu - Seri Bakalt'u çalyanxi. İsəəl yan Şot'ay - İsus Xrist'osi ak'est'i yaq'en taśi yax Şot'oxun sayan bsa. Şot'o görə ki, seri bakala Buxačux Şone, həmişəluğ yəşəyinşal Şot'oxune eysa.

Verse: 21    Ay bezi baloox, äfči buxaʒ́uxxoxun ä͑xil bakanan!
   Ay bezi baloox, əfçi buxačuxxoxun ə̌xil bakanan!





Next part


This text is part of the TITUS edition of Biblia Udica, Versio Nizhensis: Novum Testamentum.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.