TITUS
Biblia Udica, Versio Nizhensis: Vetus Testamentum
Part No. 56
Previous part

Chapter: 16 

Goraxi, Daṭani saal Avirami Q̣ONƷ́UĠOY äleyinä č̣eysun
Goraxi, Dat'ani saal Avirami Q'ONČUĞOY əleyinə c'eysun


Verse: 1  Link to rat Levin nätiǯä, Ḳohaṭi nävä, Yicariyal ġar bakala Goraxen Ruveni näsiläxun bakala Eliavi ġarmux Daṭan q̇a Aviramaxun saal P̣eleṭi ġar Onaxun äyitä sabi
   Levin nəticə, K'ohat'i nəvə, Yiśariyal ğar bakala Goraxen Ruveni nəsiləxun bakala Eliavi ğarmux Dat'an q'a Aviramaxun saal P'elet'i ğar Onaxun əyitə sabi

Verse: 2  Link to rat Moiseyi äleyinäṭun e͑qeci. Šoṭoġoy täräf azuḳaxun ṗä͑bać älli tane buy, ičal bito c̣ila, kala amdarxoney.
   Moiseyi əleyinət'un ěqeśi. Şot'oğoy tərəf azuk'axun p'ə̌baç̌ əlli tane buy, içal bito s'ila, kala amdarxoney.

Verse: 3  Link to rat Šorox gireci Moiseyi q̇a Aaroni ṭo͑ġo͑l hari piṭun: "Bäse efiyo! Me azuḳi boš sayǯä vä͑n tää, yan bito ə͑velyan, Q̣ONƷ́UXAL beš bitoṭay ṭo͑ġo͑le! Ama vä͑n vä͑x bitoṭuxun avuzinnan hesabbsa".
   Şorox gireśi Moiseyi q'a Aaroni t'ǒğǒl hari pit'un: "Bəse efiyo! Me azuk'i boş saycə və̌n təə, yan bito ı̌velyan, Q'ONČUXAL beş bitot'ay t'ǒğǒle! Ama və̌n və̌x bitot'uxun avuzinnan hesabbsa".

Verse: 4  Link to rat Moiseyen me äyitmoġo ibaki ćooq̇a pasṭeci.
   Moiseyen me əyitmoğo ibaki ç̌ooq'a past'eśi.

Verse: 5  Link to rat Oša Goraxa q̇a šoṭay täräf bakalṭoġo pine: "Äyč̣ä savaxṭan Q̣ONƷ́UĠON Ičeynaḳ č̣äḳṗiṭu, ə͑vel bakalṭu, Iz bakala gala baci Ičuxun äyitṗes bakalṭu aḳesṭale. Šu č̣äḳḳalesa šoval Iču ə͑śalayinšakes bakale.
   Oşa Goraxa q'a şot'ay tərəf bakalt'oğo pine: "Əyc'ə savaxt'an Q'ONČUĞON İçeynak' c'ək'p'it'u, ı̌vel bakalt'u, İz bakala gala baśi İçuxun əyitp'es bakalt'u ak'est'ale. Şu c'ək'k'alesa şoval İçu ı̌šalayinşakes bakale.

Verse: 6  Link to rat Vä͑n isä buxur boḳospseynaḳ bakala q̇avurxo exṭanan,
   Və̌n isə buxur bok'ospseynak' bakala q'avurxo ext'anan,

Verse: 7  Link to rat šoṭoġoy boš äyč̣ä boḳala c̣ile loxol šaaṭ adeġala oyurxo laxi Q̣ONƷ́UĠOY be͑ś č̣ekinan. Q̣ONƷ́UĠON šu č̣äḳḳalesa, šoval ə͑vel hesab bakale. Bäse ene efiyo, ay leviyox!"
   şot'oğoy boş əyc'ə bok'ala s'ile loxol şaat' adeğala oyurxo laxi Q'ONČUĞOY běš c'ekinan. Q'ONČUĞON şu c'ək'k'alesa, şoval ı̌vel hesab bakale. Bəse ene efiyo, ay leviyox!"

Verse: 8  Link to rat Moiseyen Goraxa pine: "Leviyox, \ ibakanan ḳäz nex!
   Moiseyen Goraxa pine: "Leviyox, \ ibakanan k'əz nex!

Verse: 9  Link to rat Israillluġoy Buxaʒ́uġon vä͑x azuḳi bošṭan č̣äḳṗi Iču ə͑śane bi, vä͑x ə͑vel čadəri äšurxosṭa kömäybi azuḳi c̣iyen Iču q̇ulluġbseynaḳe laxi.
   İsraillluğoy Buxačuğon və̌x azuk'i boşt'an c'ək'p'i İçu ı̌šane bi, və̌x ı̌vel çadıri əşurxost'a köməybi azuk'i s'iyen İçu q'ulluğbseynak'e laxi.

Verse: 10  Link to rat Q̣ONƷ́UĠON vä͑x, leviġo, Iču ə͑śane bi, ama vä͑n isääl be͑yinśluġbsunanan tamaxbsa!
   Q'ONČUĞON və̌x, leviğo, İçu ı̌šane bi, ama və̌n isəəl běyinšluğbsunanan tamaxbsa!

Verse: 11  Link to rat Hunal, me vaxun hariyoroxal, vä͑n bito Aaroni tää, Q̣ONƷ́UĠOY äleyinänän e͑qesa. Aaron šuva ki?"
   Hunal, me vaxun hariyoroxal, və̌n bito Aaroni təə, Q'ONČUĞOY əleyinənən ěqesa. Aaron şuva ki?"

Verse: 12  Link to rat Oša Moiseyen Eliavi ġarmux Daṭana q̇a Aviramane ḳalpesṭi, ama šoṭoġon piṭun: "Yan teyan eġal!
   Oşa Moiseyen Eliavi ğarmux Dat'ana q'a Aviramane k'alpest'i, ama şot'oğon pit'un: "Yan teyan eğal!

Verse: 13  Link to rat Yax ṭe muć̣anaq̇ q̇a uć̣ barala ölkinäxun č̣evḳi amc̣i oćala ḳac̣eseynaḳ ečeriyo male, hälä sa beš kalo baksunal čurensa?
   Yax t'e muč'anaq' q'a uč' barala ölkinəxun c'evk'i ams'i oç̌ala k'as'eseynak' eçeriyo male, hələ sa beş kalo baksunal çurensa?

Verse: 14  Link to rat Isääl yax muć̣anaq̇ q̇a uć̣ barala oćala ten tašṭa, q̇oruġxo, ṭulluġxo ten tasṭa, ošaal fikirenbsa ki, amdarxoy pulmux ḳać̣ine? Teyan eġal!"
   İsəəl yax muč'anaq' q'a uč' barala oç̌ala ten taşt'a, q'oruğxo, t'ulluğxo ten tast'a, oşaal fikirenbsa ki, amdarxoy pulmux k'ač'ine? Teyan eğal!"

Verse: 15  Link to rat Ṭe vädä Moiseyen gele äǯuġläyinšäki Q̣ONƷ́UĠO pine: "Koṭoġon tadala payurxo q̇abulmaba! Koṭoġoxun sa elemal tez exṭi, koṭoġo sal sa pisluġ tezbe".
   T'e vədə Moiseyen gele əcuğləyinşəki Q'ONČUĞO pine: "Kot'oğon tadala payurxo q'abulmaba! Kot'oğoxun sa elemal tez ext'i, kot'oğo sal sa pisluğ tezbe".

Verse: 16  Link to rat Moiseyen Goraxa pine: "Hun q̇a me vi täräf bakalorox isä äyč̣ä Q̣ONƷ́UĠOY be͑ś č̣ekinan - hun, korox saal Aaron.
   Moiseyen Goraxa pine: "Hun q'a me vi tərəf bakalorox isə əyc'ə Q'ONČUĞOY běš c'ekinan - hun, korox saal Aaron.

Verse: 17  Link to rat Barta härṭin iz buxur boḳospseynaḳ bakala q̇aval exṭeq̇an. Bito sagala ṗä͑bać älli dänä q̇av. Šoṭoġoy boš šaaṭ adeġala oyurxo laxi Q̣ONƷ́UĠOYNAḲ ečanan".
   Barta hərt'in iz buxur bok'ospseynak' bakala q'aval ext'eq'an. Bito sagala p'ə̌baç̌ əlli dənə q'av. Şot'oğoy boş şaat' adeğala oyurxo laxi Q'ONČUĞOYNAK' eçanan".

Verse: 18  Link to rat Metärluġen, šoṭoġon ičoġoy buxur boḳospseynaḳ bakala q̇avurxo exṭi Moiseyaxun q̇a Aaronaxun sagala ə͑vel čadəri baġala gane be͑ś čurṭunpi. Ṭe q̇avurxoy boš boḳala c̣ile loxol šaaṭ adeġala oyurxoṭun laxey.
   Metərluğen, şot'oğon içoğoy buxur bok'ospseynak' bakala q'avurxo ext'i Moiseyaxun q'a Aaronaxun sagala ı̌vel çadıri bağala gane běš çurt'unpi. T'e q'avurxoy boş bok'ala s'ile loxol şaat' adeğala oyurxot'un laxey.

Verse: 19  Link to rat Goraxen Moiseyi q̇a Aaroni äleyinä č̣eri iz täräf bakalṭoġo bitova ə͑vel čadəri baġala gane be͑ś topbiṭuxun oša, mone, dirisṭ azuḳen Q̣ONƷ́UĠOY tamtaraġane aḳi.
   Goraxen Moiseyi q'a Aaroni əleyinə c'eri iz tərəf bakalt'oğo bitova ı̌vel çadıri bağala gane běš topbit'uxun oşa, mone, dirist' azuk'en Q'ONČUĞOY tamtarağane ak'i.

Verse: 20  Link to rat Q̣ONƷ́UĠON Moiseya q̇a Aarona pine:
   Q'ONČUĞON Moiseya q'a Aarona pine:

Verse: 21  Link to rat "Ä͑xilbakanan me azuḳaxun, koṭoġo häysä äfčiboz".
   "Ə̌xilbakanan me azuk'axun, kot'oğo həysə əfçiboz".

Verse: 22  Link to rat Ama Moiseyen q̇a Aaronen ćooq̇a pasṭeci xoyinśṭunbi: "Ay Buxaʒ́ux! Ay iz boš näfäs bakalṭoġo bitova elmux tadala Buxaʒ́ux! Heṭaynaḳen sa amdaren äšṗesṭi günaxa görä dirisṭ azuḳan äǯoġo č̣evksa?"
   Ama Moiseyen q'a Aaronen ç̌ooq'a past'eśi xoyinšt'unbi: "Ay Buxačux! Ay iz boş nəfəs bakalt'oğo bitova elmux tadala Buxačux! Het'aynak'en sa amdaren əşp'est'i günaxa görə dirist' azuk'an əcoğo c'evksa?"

Verse: 23  Link to rat Ṭe vädä Q̣ONƷ́UĠON Moiseya pine:
   T'e vədə Q'ONČUĞON Moiseya pine:

Verse: 24  Link to rat "Israilluġo upa ki, Goraxi, Daṭani saal Avirami čadəraxun ä͑xilbakeq̇aṭun!"
   "İsrailluğo upa ki, Goraxi, Dat'ani saal Avirami çadıraxun ə̌xilbakeq'at'un!"

Verse: 25  Link to rat Moisey hayzeri israilluġoy aġsaq̇q̇alxoxun sagala Daṭani q̇a Avirami ṭo͑ġo͑le taci.
   Moisey hayzeri israilluğoy ağsaq'q'alxoxun sagala Dat'ani q'a Avirami t'ǒğǒle taśi.

Verse: 26  Link to rat Šoṭin azuḳa xavardarluġbi pine: "Me ičoġoy üḳ pisluġen buy amdarxoy čadərxoxun ä͑xilbakanan! Koṭoġoy sal sa šeyal kul ma duġanan, tene me amdarxoy günaxxo görä vä͑nal äfčibakalnan!"
   Şot'in azuk'a xavardarluğbi pine: "Me içoğoy ük' pisluğen buy amdarxoy çadırxoxun ə̌xilbakanan! Kot'oğoy sal sa şeyal kul ma duğanan, tene me amdarxoy günaxxo görə və̌nal əfçibakalnan!"

Verse: 27  Link to rat Amdarxoval Goraxi, Daṭani saal Avirami čadərxoxun ä͑xilṭunbaki. Daṭan saal Aviram isä č̣eri ičoġoy čupuxxoxun q̇a xuri-kala äyloġoxun sagala ičoġoy čadərxoy baġala gane be͑ś čurṭunpi.
   Amdarxoval Goraxi, Dat'ani saal Avirami çadırxoxun ə̌xilt'unbaki. Dat'an saal Aviram isə c'eri içoğoy çupuxxoxun q'a xuri-kala əyloğoxun sagala içoğoy çadırxoy bağala gane běš çurt'unpi.

Verse: 28  Link to rat Moiseyen pine: "Mone, zu bito me äšurxo bez beynä tää, ama \ Q̣ONƷ́UĠOY tapšuruġen bsuna metär avabakalnan:
   Moiseyen pine: "Mone, zu bito me əşurxo bez beynə təə, ama \ Q'ONČUĞOY tapşuruğen bsuna metər avabakalnan:

Verse: 29  Link to rat ägär me amdarxo ičoġoy aǯalen biyayṭun, ičoġoy bel eġala äšurxosṭal sa färg nu bakayin, ṭe vädä za Q̣ONƷ́UĠON tene yaq̇abe.
   əgər me amdarxo içoğoy acalen biyayt'un, içoğoy bel eğala əşurxost'al sa fərg nu bakayin, t'e vədə za Q'ONČUĞON tene yaq'abe.

Verse: 30  Link to rat Ama ägär oćal qə͑bakayin, koroxal dirisṭ-dirisṭ, ičoġoy bakal-nu bakalaxun sagala ṭiya baġayṭun, ägär Q̣ONƷ́UĠON koṭoġoynaḳ nu aḳeci metär sa bisun yaq̇abayin, ṭe vädä q̇amišakalnan ki, me amdarxo Q̣ONƷ́UĠOXUN tärs taciyoroxe".
   Ama əgər oç̌al qı̌bakayin, koroxal dirist'-dirist', içoğoy bakal-nu bakalaxun sagala t'iya bağayt'un, əgər Q'ONČUĞON kot'oğoynak' nu ak'eśi metər sa bisun yaq'abayin, t'e vədə q'amişakalnan ki, me amdarxo Q'ONČUĞOXUN tərs taśiyoroxe".

Verse: 31  Link to rat Moiseyen iz źomoxun axərənǯi äyitä č̣evksun q̇a hametär baksun sane baki. Ṭe amdarxoy turin oq̇a bakala oćal qə͑nebaki,
   Moiseyen iz ǰomoxun axırınci əyitə c'evksun q'a hametər baksun sane baki. T'e amdarxoy turin oq'a bakala oç̌al qı̌nebaki,

Verse: 32  Link to rat šoroxal bito - Goraxi täräf bakalṭoġoy külfätä šu bunesa - ičoġoy bakal-nu bakalaxun sagala oćali oq̇aṭun taci.
   şoroxal bito - Goraxi tərəf bakalt'oğoy külfətə şu bunesa - içoğoy bakal-nu bakalaxun sagala oç̌ali oq'at'un taśi.

Verse: 33  Link to rat Šorox dirisṭ-dirisṭṭun oćalaxeci. Oćalen šoṭoġo ičoġoy bakal-nu bakalaxun sagala ṭetäre q̇uč̣ṗi ki, ičoġoy gaal tene mandi.
   Şorox dirist'-dirist't'un oç̌alaxeśi. Oç̌alen şot'oğo içoğoy bakal-nu bakalaxun sagala t'etəre q'uc'p'i ki, içoğoy gaal tene mandi.

Verse: 34  Link to rat Ṭiya bakala amdarxo bito šoṭoġoy haraya ibaki ṭiṭunṭeri, šoṭo görä ki, ičoġoyal oćali oq̇a taysunaxun q̇ə͑ṭunbsay.
   T'iya bakala amdarxo bito şot'oğoy haraya ibaki t'it'unt'eri, şot'o görə ki, içoğoyal oç̌ali oq'a taysunaxun q'ı̌t'unbsay.

Verse: 35  Link to rat Buxuri q̇avurxoy boš šaaṭ adeġala oyurxo boḳosṗi amdarxoy loxol isä Q̣ONƷ́UĠON aruxe yaq̇abi, ṗä͑bać älli tanal bito boḳi barṭundi.
   Buxuri q'avurxoy boş şaat' adeğala oyurxo bok'osp'i amdarxoy loxol isə Q'ONČUĞON aruxe yaq'abi, p'ə̌baç̌ əlli tanal bito bok'i bart'undi.

Verse: 36  Link to rat Q̣ONƷ́UĠON Moiseya pine:
   Q'ONČUĞON Moiseya pine:

Verse: 37  Link to rat "Be͑yinś Aaroni ġar Eleazara upa ki, boḳuni bošṭan q̇avurxo girbi šoṭoġoy boš bakala c̣ilurxo amc̣ibi ä͑xilq̇an boseri, šoṭo görä ki, ṭe q̇avurxo ə͑vele.
   "Běyinš Aaroni ğar Eleazara upa ki, bok'uni boşt'an q'avurxo girbi şot'oğoy boş bakala s'ilurxo ams'ibi ə̌xilq'an boseri, şot'o görə ki, t'e q'avurxo ı̌vele.

Verse: 38  Link to rat Mo ičoġoy elmoġoy toyen bakala günax äšṗesṭiṭoġoy q̇avurxone. Barta ṭe q̇avurxo ṭapi ṭä͑ṗä͑ḳbi q̇urban ečala gane ṭo͑ġurxoq̇aṭun buṭḳi. Šoṭoġo Q̣ONƷ́UĠOYNAḲṬUN ečerey, šorox ene ə͑vele. Israilluġoynaḳ isä mo eyex badala sa niśan bakale".
   Mo içoğoy elmoğoy toyen bakala günax əşp'est'it'oğoy q'avurxone. Barta t'e q'avurxo t'api t'ə̌p'ə̌k'bi q'urban eçala gane t'ǒğurxoq'at'un but'k'i. Şot'oğo Q'ONČUĞOYNAK'T'UN eçerey, şorox ene ı̌vele. İsrailluğoynak' isə mo eyex badala sa nišan bakale".

Verse: 39  Link to rat Eleazarenal boḳuni bošṭan mise buxuri q̇avurxo girebi, šoṭoġo ṭapi ṭä͑ṗä͑ḳṗiṭuxun ošal q̇urban ečala gane ṭo͑ġurxoṭun buṭḳi.
   Eleazarenal bok'uni boşt'an mise buxuri q'avurxo girebi, şot'oğo t'api t'ə̌p'ə̌k'p'it'uxun oşal q'urban eçala gane t'ǒğurxot'un but'k'i.

Verse: 40  Link to rat Hametär, Q̣ONƷ́UĠON Moiseya, Moiseyenal Eleazara pi ḳinäḳ baneki. Israilluġon isä me mise loxol här be͑ġaṭan, ičoġoy eyexṭun basṭay ki, Aaroni näsiläxun bakalṭoġoxun bašq̇a šinesa Q̣ONƷ́UĠOY be͑ś buxur boḳospsun čureġayin, iz axər Goraxi q̇a šoṭay täräf bakiṭoġoylariḳ bakale.
   Hametər, Q'ONČUĞON Moiseya, Moiseyenal Eleazara pi k'inək' baneki. İsrailluğon isə me mise loxol hər běğat'an, içoğoy eyext'un bast'ay ki, Aaroni nəsiləxun bakalt'oğoxun başq'a şinesa Q'ONČUĞOY běš buxur bok'ospsun çureğayin, iz axır Goraxi q'a şot'ay tərəf bakit'oğoylarik' bakale.



Moiseyi q̇a Aaroni azuḳi günaxa baġəšlayinšesṭun
Moiseyi q'a Aaroni azuk'i günaxa bağışlayinşest'un


Verse: 41  Link to rat Äyč̣indäri israilluyox ṗurum gireci Moiseyaxun q̇a Aaronaxun ṭoṭopsaṭun burqi. Šoṭoġon "Q̣ONƷ́UĠOY amdarxo vä͑nnan bespi" nexṭuniy.
   Əyc'indəri israilluyox p'urum gireśi Moiseyaxun q'a Aaronaxun t'ot'opsat'un burqi. Şot'oğon "Q'ONČUĞOY amdarxo və̌nnan bespi" next'uniy.

Verse: 42  Link to rat Ama šorox topbaki Moiseyi q̇a Aaroni be͑ś č̣eyseynaḳ ə͑vel čadərač taġaṭan, čadəra bürdän asoyene haq̇i. Šoṭoġon Q̣ONƷ́UĠOY tamtaraġaṭun aḳi.
   Ama şorox topbaki Moiseyi q'a Aaroni běš c'eyseynak' ı̌vel çadıraç tağat'an, çadıra bürdən asoyene haq'i. Şot'oğon Q'ONČUĞOY tamtarağat'un ak'i.

Verse: 43  Link to rat Moisey q̇a Aaron ə͑vel čadəra ə͑śalayinšṭunbaki,
   Moisey q'a Aaron ı̌vel çadıra ı̌šalayinşt'unbaki,

Verse: 44  Link to rat Q̣ONƷ́UĠONAL Moiseya pine:
   Q'ONČUĞONAL Moiseya pine:

Verse: 45  Link to rat "Me azuḳaxun ä͑xilbakanan, šoṭo görä ki, häysä koṭoġo bitova äfčiboz!" Šoṭin metär uḳala ḳinäḳ Moisey q̇a Aaron ćooq̇a oćala pasṭunci.
   "Me azuk'axun ə̌xilbakanan, şot'o görə ki, həysə kot'oğo bitova əfçiboz!" Şot'in metər uk'ala k'inək' Moisey q'a Aaron ç̌ooq'a oç̌ala past'unśi.

Verse: 46  Link to rat Moiseyen Aarona pine: "Vi buxuri \ q̇ava exṭi iz boš q̇urban ečala ganuxun c̣il laxa, oša iz loxol šaaṭ adeġala oyurxoval laxi azuḳi ṭo͑ġo͑l taki. Metär Q̣onʒ́uġon šoṭoġo baġəšlayinši bakale. Mone, Q̣ONƷ́UĠON Iz äǯoġo azuḳi loxol cipi šoṭoġoynaḳ ḳac̣esuna ene yaq̇abene".
   Moiseyen Aarona pine: "Vi buxuri \ q'ava ext'i iz boş q'urban eçala ganuxun s'il laxa, oşa iz loxol şaat' adeğala oyurxoval laxi azuk'i t'ǒğǒl taki. Metər Q'ončuğon şot'oğo bağışlayinşi bakale. Mone, Q'ONČUĞON İz əcoğo azuk'i loxol śipi şot'oğoynak' k'as'esuna ene yaq'abene".

Verse: 47  Link to rat Aaronenal Moiseyen iču pi ḳinäḳ buxuri q̇ava exṭi ǯamaati ṭo͑ġo͑le taci. Šo eġaṭan amdarxo ḳac̣esa burqeney, ama šoṭin q̇urban ečala ganuxun exṭi c̣ile loxol šaaṭ adeġala oyurxo boḳosebi, šoṭoġoy günaxxoval baġəšlayinšesṭine baki.
   Aaronenal Moiseyen içu pi k'inək' buxuri q'ava ext'i camaati t'ǒğǒle taśi. Şo eğat'an amdarxo k'as'esa burqeney, ama şot'in q'urban eçala ganuxun ext'i s'ile loxol şaat' adeğala oyurxo bok'osebi, şot'oğoy günaxxoval bağışlayinşest'ine baki.

Verse: 48  Link to rat Šo ṗuriṭoġoy q̇a dirisṭṭoġoy arane čurpi ḳac̣esuna enefi.
   Şo p'urit'oğoy q'a dirist't'oğoy arane çurpi k'as'esuna enefi.

Verse: 49  Link to rat Goraxa görä ṗuriṭoġo nu hesabbayin isä biṗec̣c̣e hazar vu͑ġbać tane ṗurey.
   Goraxa görə p'urit'oğo nu hesabbayin isə bip'es's'e hazar vǔğbaç̌ tane p'urey.

Verse: 50  Link to rat Amdarxoy ḳac̣esun čurpiṭuxun oša Aaron azuḳi ṭo͑ġo͑l, ə͑vel čadəri baġala gane be͑śe qaybaki.
   Amdarxoy k'as'esun çurpit'uxun oşa Aaron azuk'i t'ǒğǒl, ı̌vel çadıri bağala gane běše qaybaki.



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.