TITUS
Biblia Udica, Versio Nizhensis: Vetus Testamentum
Part No. 90
Previous part

Chapter: 10 

10-ǯi ω͑vel mä͑ġ *
10-ci Ǐvel mə̌ğ *


Verse: 1    Ay Q̣ONƷ́UX, heṭaynaḳnu ä͑xil?
   Ay Q'ONČUX, het'aynak'nu ə̌xil?
    Heṭaynaḳ ṭar ġine Va ten aḳesṭa?
    Het'aynak' t'ar ğine Va ten ak'est'a?

Verse: 2    Mone, pis amdar šuḳḳalaxun zaptenesa,
   Mone, pis amdar şuk'k'alaxun zaptenesa,
    Faġəra pul tadi išiġ tene tasṭa.
    Fağıra pul tadi işiğ tene tast'a.
    Barta iz laxi täloġo ičq̇an bafṭi!
    Barta iz laxi təloğo içq'an baft'i!

Verse: 3    Pis amdar iz üḳexun č̣ovakalṭoġoxun färäxläyinšebaksa,
   Pis amdar iz ük'exun c'ovakalt'oğoxun fərəxləyinşebaksa,
    Q̣ONƷ́UĠO tene čalxsa, sayǯä iz q̇azanǯaxune fikirbsa.
    Q'ONČUĞO tene çalxsa, saycə iz q'azancaxune fikirbsa.

Verse: 4    Iču ala biq̇i Buxaʒ́uġoxun ä͑xile bisṭa,
   İçu ala biq'i Buxačuğoxun ə̌xile bist'a,
    "Butene Šo" pi sal iz fikire etenešṭa!
    "Butene Şo" pi sal iz fikire eteneşt'a!

Verse: 5    Metärṭoġoy äšurxo hämišä šaaṭe taysa,
   Metərt'oğoy əşurxo həmişə şaat'e taysa,
    Vi ǯazinen ičoġo biq̇sunaxun q̇ə͑teṭunbsa,
    Vi cazinen içoğo biq'sunaxun q'ı̌tet'unbsa,
    Ičoġoy düšmänxoval hiḳḳali galaṭun laxsa.
    İçoğoy düşmənxoval hik'k'ali galat'un laxsa.

Verse: 6    Iz üḳe boš "zaynaḳ q̇ə͑ butene,
   İz ük'e boş "zaynak' q'ı̌ butene,
    Bälä zaxun ä͑xile taraḳon" nexe.
    Bələ zaxun ə̌xile tarak'on" nexe.

Verse: 7    Iz źomoxun sayǯä q̇arġiš, äfči saal bič̣luġe baron,
   İz ǰomoxun saycə q'arğiş, əfçi saal bic'luğe baron,
    Iz muzexun šär q̇a bälä ečala äyitmuxe č̣eġon.
    İz muzexun şər q'a bələ eçala əyitmuxe c'eğon.

Verse: 8    Ayizmoġo, q̇alasuz määlnoġo täläne laxsa,
   Ayizmoğo, q'alasuz məəlnoğo tələne laxsa,
    Taxsərsuzṭu busmiši
    Taxsırsuzt'u busmişi
    Šoṭo č̣äṗḳin gala besebsa.
    Şot'o c'əp'k'in gala besebsa.

Verse: 9    Šoṭin sa šir ḳinäḳ pusq̇una čurpi yaq̇ebe͑ġsa,
   Şot'in sa şir k'inək' pusq'una çurpi yaq'eběğsa,
    Zäyifṭay loxol ćupseynaḳe häzirläyinšaksa.
    Zəyift'ay loxol ç̌upseynak'e həzirləyinşaksa.
    Biq̇iṭuxun ošal exṭi tanešṭa.
    Biq'it'uxun oşal ext'i taneşt'a.

Verse: 10    Axəri zäyifṭay zor aytenesa,
   Axıri zəyift'ay zor aytenesa,
    Pisṭay turin oq̇a ćaxćuxeci tanesa!
    Pist'ay turin oq'a ç̌axç̌uxeśi tanesa!

Verse: 11    Iz üḳ šären buy bakalṭinal metäre nex:
   İz ük' şəren buy bakalt'inal metəre nex:
    "Buxaʒ́uġon Iz ćoya taradene, ateneksa,
    "Buxačuğon İz ç̌oya taradene, ateneksa,
    Isä damaxune Iz eyexun č̣evḳe".
    İsə damaxune İz eyexun c'evk'e".

Verse: 12    Hayza, ay Q̣ONƷ́UX, Vi Šu baksuna aḳesṭa, ay Buxaʒ́ux!
   Hayza, ay Q'ONČUX, Vi Şu baksuna ak'est'a, ay Buxačux!
    Faġərxo eyexun ma č̣evḳa!
    Fağırxo eyexun ma c'evk'a!

Verse: 13    Heṭaynaḳq̇an pisṭin Buxaʒ́uġo źamdi?
   Het'aynak'q'an pist'in Buxačuğo ǰamdi?
    Heṭaynaḳq̇an Iz üḳe boš "za ḳä bese bakon" pi?
    Het'aynak'q'an İz ük'e boş "za k'ə bese bakon" pi?

Verse: 14    Ama Hun me zülümä q̇a äzyätä anksa,
   Ama Hun me zülümə q'a əzyətə anksa,
    Šuḳḳal Vi kiyexun tene čarḳal.
    Şuk'k'al Vi kiyexun tene çark'al.
    Faġərxoy umudin ganu Hun!
    Fağırxoy umudin ganu Hun!
    Yetimxoy kiyexun biq̇alonu Hun!
    Yetimxoy kiyexun biq'alonu Hun!

Verse: 15    Barta pis amdar biti xoreceq̇an.
   Barta pis amdar biti xoreśeq'an.
    Šär bakalṭu teṭär ġina bada ki,
    Şər bakalt'u tet'ər ğina bada ki,
    Iz bi pisluġxoy sayǯo ǯazasuz maq̇an mandi!
    İz bi pisluğxoy sayco cazasuz maq'an mandi!

Verse: 16    Q̣ONƷ́UX hämišäluġ bakala Padčaġe!
   Q'ONČUX həmişəluğ bakala Padçağe!
    Buxaʒ́uġo nu čalxalṭoġoynaḳ Šoṭay oćala ga butene,
    Buxačuğo nu çalxalt'oğoynak' Şot'ay oç̌ala ga butene,
    Äfčibakalṭun šorox!
    Əfçibakalt'un şorox!

Verse: 17    Ay Q̣ONƷ́UX, Hun faġərxoy xoyinśa ṗanpsa,
   Ay Q'ONČUX, Hun fağırxoy xoyinša p'anpsa,
    Šoṭoġo üḳen tasṭa, Vi pul šoṭoġoy loxole.
    Şot'oğo ük'en tast'a, Vi pul şot'oğoy loxole.

Verse: 18    Faġərxoy q̇a yetimxoy bać̣ane čurpa,
   Fağırxoy q'a yetimxoy bač'ane çurpa,
    Barta me dünyänexun bakalṭoġon šoṭoġo zülüm tades maq̇aṭun baki!
    Barta me dünyənexun bakalt'oğon şot'oğo zülüm tades maq'at'un baki!



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.