TITUS
Biblia Udica, Versio Nizhensis: Vetus Testamentum
Part No. 156
Previous part

Chapter: 76 

76-ǯi ω͑vel mä͑ġ
76-ci Ǐvel mə̌ğ



Farḳalxoy däsṭin kalaṭaynaḳ. Simlä äṭṭäǯxoy faren mä͑ġe͑ġala Asafi ω͑vel mä͑ġ.
Fark'alxoy dəst'in kalat'aynak'. Simlə ət't'əcxoy faren mə̌ğěğala Asafi Ǐvel mə̌ğ.


Verse: 1    Čalxesa Iudeyina Buxaʒ́ux,
   Çalxesa İudeyina Buxačux,
    Kala c̣iye q̇onʒ́uxe Šo Israila.
    Kala s'iye q'ončuxe Şo İsraila.

Verse: 2    Salemane Šoṭay bakala ga,
   Salemane Şot'ay bakala ga,
    Sionane mäsḳän sake Šoṭin. *
    Sionane məsk'ən sake Şot'in. *

Verse: 3    Ṭeṭiyane düšmäni bosala oxurxo xoxṗi,
   T'et'iyane düşməni bosala oxurxo xoxp'i,
    Q̣ələnǯxo q̇a q̇alxanxo - davina äšṗesṭala bito silaxxone äfčibi.
    Q'ılıncxo q'a q'alxanxo - davina əşp'est'ala bito silaxxone əfçibi.

Verse: 4    Vi tamtaraġen išiġe saksa, ay Buxaʒ́ux,
   Vi tamtarağen işiğe saksa, ay Buxačux,
    Ä͑qnä heyvanxon buy alloy burux hiḳḳale Vi kalaluġi be͑ś!
    Ə̌qnə heyvanxon buy alloy burux hik'k'ale Vi kalaluği běš!

Verse: 5    Hetär q̇oččaġxone äfčibaki,
   Hetər q'oççağxone əfçibaki,
    Pula q̇ič̣ṗi taṭunci me dünyänexun šorox,
    Pula q'ic'p'i tat'unśi me dünyənexun şorox,
    Sayǯäṭin iz ḳäšinal alabes tene baki šoṭoġoy!
    Saycət'in iz k'əşinal alabes tene baki şot'oğoy!

Verse: 6    Ay Iaḳovi Buxaʒ́ux, üḳe q̇ə͑ badala Vi harayaxun
   Ay İak'ovi Buxačux, ük'e q'ı̌ badala Vi harayaxun
    Davin arabooxe e͑kaxun sagala tarapi.
    Davin arabooxe ěkaxun sagala tarapi.

Verse: 7    Hägigiyal q̇ə͑balane Vaxun!
   Həgigiyal q'ı̌balane Vaxun!
    Vi äǯuġon biq̇aṭan šuva Vi divanbsunaxun čarḳeces bakon?
    Vi əcuğon biq'at'an şuva Vi divanbsunaxun çark'eśes bakon?

Verse: 8-9    Göynuxunen divanbi q̇ärar č̣evḳi Hun, ay Buxaʒ́ux,
   Göynuxunen divanbi q'ərar c'evk'i Hun, ay Buxačux,
    Bito koruġi boš bakalṭoġon čarḳesṭi.
    Bito koruği boş bakalt'oğon çark'est'i.
    Hayzeri Vi divanbsun ḳä baksuna aḳesṭaṭan
    Hayzeri Vi divanbsun k'ə baksuna ak'est'at'an
    Me dünyäne bakalṭoġoy säse boṭbaki!
    Me dünyəne bakalt'oğoy səse bot'baki!

Verse: 10    Hörmäti q̇onʒ́ux baksunane aḳesṭi Vi äǯuġon biq̇sunen,
   Hörməti q'ončux baksunane ak'est'i Vi əcuğon biq'sunen,
    Dirisṭ mandiṭoġonal ičoġoy bula alabes teṭun baki.
    Dirist' mandit'oğonal içoğoy bula alabes tet'un baki.

Verse: 11    Efi Buxaʒ́ux bakala Q̣ONƷ́UĠO elasṗi niyätṗanan,
   Efi Buxačux bakala Q'ONČUĞO elasp'i niyətp'anan,
    Äyit tadiṭoġoval bex ṗaṗesṗanan,
    Əyit tadit'oğoval bex p'ap'esp'anan,
    Iz kalaluġen amdarxo Q̣ə͑ya Badalṭaynaḳ payurxo ečanan,
    İz kalaluğen amdarxo Q'ı̌ya Badalt'aynak' payurxo eçanan,
    Ay härrämine bakala azuḳxo.
    Ay hərrəmine bakala azuk'xo.

Verse: 12    Kalaluġbalxoy pulane haq̇sa Šoṭin,
   Kalaluğbalxoy pulane haq'sa Şot'in,
    Dünyäne bakala padčaġxone q̇ə͑ya basṭa!
    Dünyəne bakala padçağxone q'ı̌ya bast'a!



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.