TITUS
Biblia Udica, Versio Nizhensis: Vetus Testamentum
Part No. 160
Previous part

Chapter: 80 

80-ǯi ω͑vel mä͑ġ
80-ci Ǐvel mə̌ğ



Farḳalxoy däsṭin kalaṭaynaḳ. Asafi "Ge͑śe vard ḳinäḳ gözäl bakala iräziluġ" uḳala faren mä͑ġe͑ġala ω͑vel mä͑ġ.
Fark'alxoy dəst'in kalat'aynak'. Asafi "Gěše vard k'inək' gözəl bakala irəziluğ" uk'ala faren mə̌ğěğala Ǐvel mə̌ğ.


Verse: 1    Ibaka yax, ay Israileynaḳ sa Čoban baki
   İbaka yax, ay İsraileynak' sa Çoban baki
    Iosifi näsilä Iz sürünä be͑ġala ḳinäḳ be͑ġalo!
    İosifi nəsilə İz sürünə běğala k'inək' běğalo!
    Išiġ saka, ay angelxoy arane Arciyo,
    İşiğ saka, ay angelxoy arane Arśiyo,

Verse: 2    Aḳesṭa Vi zora Efraimaxun, Binyaminaxun saal Menaššenaxun baki tayfoġo.
   Ak'est'a Vi zora Efraimaxun, Binyaminaxun saal Menaşşenaxun baki tayfoğo.
    Eki čarḳesṭa yax!
    Eki çark'est'a yax!

Verse: 3    Ay Buxaʒ́ux, yax süfṭin ḳinäḳ bäxṭävär ba,
   Ay Buxačux, yax süft'in k'inək' bəxt'əvər ba,
    Barta Vi üḳel basḳi čarḳeces baken yan!
    Barta Vi ük'el bask'i çark'eśes baken yan!

Verse: 4    Ay Q̣ošuni Q̣ONƷ́UX bakala Buxaʒ́ux,
   Ay Q'oşuni Q'ONČUX bakala Buxačux,
    Hälä heq̇ädär Vi azuḳi xoyinśa nu ibaksuna laxi äǯuxläyinšakalnu Hun?
    Hələ heq'ədər Vi azuk'i xoyinša nu ibaksuna laxi əcuxləyinşakalnu Hun?

Verse: 5    Beš piin neġenen boševḳi Hun yax śumen boševḳala ḳinäḳ,
   Beş piin neğenen boşevk'i Hun yax šumen boşevk'ala k'inək',
    Neġen q̇uč̣pesṭi yax bol-bol.
    Neğen q'uc'pest'i yax bol-bol.

Verse: 6    Härrämine bakala azuḳxone suna bafṭi beš oćalxo görä,
   Hərrəmine bakala azuk'xone suna baft'i beş oç̌alxo görə,
    Axśumi gayan baki yan düšmänxoynaḳ.
    Axšumi gayan baki yan düşmənxoynak'.

Verse: 7    Ay Q̣ošuni Q̣onʒ́ux bakala Buxaʒ́ux, yax süfṭin ḳinäḳ bäxṭävär ba,
   Ay Q'oşuni Q'ončux bakala Buxačux, yax süft'in k'inək' bəxt'əvər ba,
    Barta Vi üḳel basḳi čarḳeces baken yan!
    Barta Vi ük'el bask'i çark'eśes baken yan!

Verse: 8    Misiräxunen ečeri yax Hun,
   Misirəxunen eçeri yax Hun,
    Azuḳxo šäṗeci sa č̣aṗe ṭinḳ ḳinäḳ binṭi yax me oćala.
    Azuk'xo şəp'eśi sa c'ap'e t'ink' k'inək' bint'i yax me oç̌ala.

Verse: 9    Me č̣aṗe ganun tämizbi häzirbi,
   Me c'ap'e ganun təmizbi həzirbi,
    Šoṭinal tum saḳi avuzebaki me ölkinä.
    Şot'inal tum sak'i avuzebaki me ölkinə.

Verse: 10    Buruxmoġoy loxole xoži saki šoṭin,
   Buruxmoğoy loxole xoji saki şot'in,
    Kakala xodurxone iz taymoġon buṭḳi.
    Kakala xodurxone iz taymoğon but'k'i.

Verse: 11    Šoṭay taymux taci ṭe bel bakala dänizäne ṗaṗi,
   Şot'ay taymux taśi t'e bel bakala dənizəne p'ap'i,
    Iz č̣iḳurxo Yevfrat oqe ṭo͑ġo͑le hari č̣eri.
    İz c'ik'urxo Yevfrat oqe t'ǒğǒle hari c'eri.

Verse: 12    Heṭaynaḳen Hun me ṭulluġi härrämine bakala čäpärä carpi?
   Het'aynak'en Hun me t'ulluği hərrəmine bakala çəpərə śarpi?
    Isääl här č̣ovakalṭin iz kula boxodi šoṭay meyvinäxun čuneksa!
    İsəəl hər c'ovakalt'in iz kula boxodi şot'ay meyvinəxun çuneksa!

Verse: 13    Mone, čölnä bo͑q̇ene šiṭe šoṭay tuma,
   Mone, çölnə bǒq'ene şit'e şot'ay tuma,
    Ä͑qnä heyvanxone ḳarame šoṭay taymoġo.
    Ə̌qnə heyvanxone k'arame şot'ay taymoğo.

Verse: 14    Ay Q̣ošuni Q̣onʒ́ux bakala Buxaʒ́ux, beš loxol be͑ġa ṗurum!
   Ay Q'oşuni Q'ončux bakala Buxačux, beş loxol běğa p'urum!
    Aḳa yax Vi bakala ganuxun,
    Ak'a yax Vi bakala ganuxun,
    Vi kula zaṗmapa me č̣aṗe loxolxun.
    Vi kula zap'mapa me c'ap'e loxolxun.

Verse: 15    Vi kiin lasaki me ṭulluġa,
   Vi kiin lasaki me t'ulluğa,
    Vi be͑ġi kalabi me ǯalġina efa.
    Vi běği kalabi me calğina efa.

Verse: 16    Mone, ḳac̣ṗi boḳosṭunbi Vi biṭi č̣aṗa düšmänxon,
   Mone, k'as'p'i bok'ost'unbi Vi bit'i c'ap'a düşmənxon,
    Vi äǯuġon biq̇i yaq̇abi ǯazinane zaṗe Vi azuḳen.
    Vi əcuğon biq'i yaq'abi cazinane zap'e Vi azuk'en.

Verse: 17    Ma zapa Vi kula Vi č̣äḳṗiṭay loxolxun,
   Ma zapa Vi kula Vi c'ək'p'it'ay loxolxun,
    Vi kiin zorbabi me azuḳi loxolxun ma exṭa Vi kula.
    Vi kiin zorbabi me azuk'i loxolxun ma ext'a Vi kula.

Verse: 18    Ćo teyan taradon yan Vaxun!
   Ç̌o teyan taradon yan Vaxun!
    Alaba yax biti ganuxun, barta Vi c̣iya duġi afərəḳen yan!
    Alaba yax biti ganuxun, barta Vi s'iya duği afırık'en yan!

Verse: 19    Ay Q̣ošuni Q̣ONƷ́UX bakala Buxaʒ́ux,
   Ay Q'oşuni Q'ONČUX bakala Buxačux,
    Yax süfṭin ḳinäḳ bäxṭävär ba,
    Yax süft'in k'inək' bəxt'əvər ba,
    Barta Vi üḳel basḳi čarḳeces baken yan!
    Barta Vi ük'el bask'i çark'eśes baken yan!



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.