TITUS
Otfrid von Weissenburg, Evangelienbuch
Part No. 34
Previous part

Chapter: 1  
p. 42r    

Manuscript page: 42r 
I. IN PRINCIPIO ERAT VERBUM.


Verse: 1     Er allen wóroltkreftin   \   joh éngilo giscéftin,
Verse: 2     so rúmo ouh so in áhton   \   mán ni mag gidráhton;
Verse: 3     Er sé joh hímil wurti   \   joh érda ouh so hérti,
Verse: 4     ouh wíht in thiu gifúarit,   \   thaz sịụ éllu thriu rúarit:
Verse: 5     So was io wórt wonanti   \   er állen zitin wórolti;
Verse: 6     thaz wír nu sehen óffan,   \   thaz was thanne úngiscafan.
Verse: 7     Er alleru ánagifti   \   theru drúhtines giscéfti,
Verse: 8     so wés iz mit gilústi   \   in theru drúhtines brústi.
Verse: 9     Iz was mit drúhtine sar   \   (ni brást imos ío thar),
Verse: 10     joh ist ouh drúhtin ubar ál,   \   wanta ér iz fon hérzen gibar.
Verse: 11     Then ánagin ni fúarit,   \   ouh énti ni birúarit,
Verse: 12     joh quam fon hímile óbana   \   (waz mág ih sagen thánana?).
Verse: 13     Er máno ríhti thia náht,   \   joh wurti ouh súnna so glát,
Verse: 14     ódo ouh hímil, so er gibót,   \   mit stérron gimálot:
Verse: 15     So was er io mit ímo sar,   \   mit imo wóraht er iz thar;
Verse: 16     so wás ses io gidátun,   \   sie iz allaz sáman rietun.
Verse: 17     Er ther hímil umbi   \   sus émmizigen wúrbi,
Verse: 18     odo wólkan ouh in nóti   \   then liutin régonoti:
Verse: 19     So was er io mit ímo sar,   \   mit imo wóraht er iz thar;
Verse: 20     so wás ses io gidátun,   \   sie iz allaz sáman rietun.


p. 42v    


Manuscript page: 42v 
Verse: 21     Tho er déta thaz sih zárpta   \   ther hímil sus io wárpta,
Verse: 22     thaz fúndament zi hóufe,   \   thar thiu érda ligit úfe:
Verse: 23     So wás er io mit ímo sar,   \   mit imo wóraht er iz thar;
Verse: 24     so wás ses io gidátun,   \   sie iz allaz sáman rietun;
Verse: 25     Ouh hímilrichi hóhaz   \   joh páradys so scónaz,
Verse: 26     éngilon joh mánne   \   thiu zuei zi búenne:
Verse: 27     So was er io mit ímo sar,   \   mit imo wóraht er iz thar;
Verse: 28     so wás ses io gidátun,   \   sie iz allaz sáman rietun.
Verse: 29     So er thára iz tho gifíarta,   \   er thesa wórolt ziarta,
Verse: 30     thar ménnisgon gistátti,   \   er thíonost sínaz dáti:
Verse: 31     So was er io mit ímo sar,   \   mit imo wóraht er iz thar;
Verse: 32     so wás ses io gidátun,   \   sie iz allaz sáman rietun.
Verse: 33     Sin wórt iz al giméinta,   \   sus mánagfalto déilta
Verse: 34     al io in thésa wisun   \   thuruh sinan éinegan sun.
Verse: 35     So waz so hímil fuarit,   \   joh érdun ouh birúarit,
Verse: 36     joh in séwe ubar ál:   \   got détaz thuruh ínan al;
Verse: 37     Thés nist wiht in wórolti,   \   thaz got ana ínan worahti,
Verse: 38     thaz drúhtin io gidáti   \   ána sin giráti.
Verse: 39     Iz ward állaz io sár,   \   sosọ er iz gibót thar,
Verse: 40     joh man iz állaz sar gisáh,   \   sos er iz érist gisprah.
Verse: 41     Tház thar nu gidán ist,   \   thaz was io in góte sos iz ist,


p. 43r    


Manuscript page: 43r 
Verse: 42     was gịáhtot io zi gúate   \   in themo éwinigen múate;
Verse: 43     Iz was in imo io quégkaz   \   joh filu líbhaftaz,
Verse: 44     wíalih ouh joh wánne   \   er iz wolti iróugen manne.
Verse: 45     Thaz lib was líoht gerno   \   súntigero mánno,
Verse: 46     zi thíu thaz sie iz intfíangin   \   int írri ni gíangin.
Verse: 47     In fínsteremo iz scínit,   \   thie súntigon rínit;
Verse: 48     sint thie mán al firdán,   \   ni múgun iz bifáhan.
Verse: 49     Sie bifíang iz alla fárt,   \   thoh síes ni wurtun ánawart,
Verse: 50     so iz blíntan man birínit,   \   then súnna biscínit.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.