TITUS
Otfrid von Weissenburg, Evangelienbuch
Part No. 35
Previous part

Chapter: 2  
p. 43r    

II. FUIT HOMO MISSUS A DEO.


Verse: 1     Tho sánta got giwáran   \   gómon filu máran,
Verse: 2     mán mit uns giméinan,   \   sinan drút einan.
Verse: 3     Iz was ther hiar fórna   \   thie líuti brédigota
Verse: 4     joh sinero wórto   \   sie ráfsta thar so hárto;
Verse: 5     Zi thémo ouh thịẹ éwarton   \   thie iro bóton santun:
Verse: 6     iz ungidán ni bileip,   \   sosọ ih hiar fórna giscreip.
Verse: 7     Ér quam untar wóroltthiot,   \   thaz er in kúndti thaz líoht,
Verse: 8     joh gizálta in sar tház,   \   thiu sálida untar ín was.
Verse: 9     Er lérta thie líuti,   \   thaz mánnilih gilóubti,
Verse: 10     thaz íagilih instúanti   \   thes sélben liohtes gúati.
Verse: 11     Ni was ér thaz líoht, ih sagen thir éin,   \   thaz thar then líutin irskéin,


p. 43v    


Manuscript page: 43v 
Verse: 12     suntar quam, sie mánoti   \   joh thánana in giságeti.
Verse: 13     Thaz líoht ist filu wár thing,   \   inlíuhtit thesan wóroltring
Verse: 14     joh ménnisgon ouh álle,   \   ther hera in wórolt sinne.
Verse: 15     Ih ságen thir wer thaz líoht ist,   \   thaz thu ịz báz wízist,
Verse: 16     joh zéllu iz hiar gimúato:   \   ist drúhtin Krist ther gúato.
Verse: 17     Ér quam in giríhti   \   in thesa wóroltslihti,
Verse: 18     in thiz lánt breita,   \   ál sosọ er giméinta.
Verse: 19     Theist algiwís, nalas wán,   \   theiz thuruh ínan ist gidán;
Verse: 20     thaz was nu wóroltscanta,   \   tház sinan nirkánta.
Verse: 21     Er quám sos er skólta,   \   joh wísota tho ẹr wólta,
Verse: 22     in éigan joh in érbi,   \   thaz lag al úmbitherbi.
Verse: 23     Thie sine lántsidilon,   \   sie dátun, so ih thir rédinon:
Verse: 24     ni wás ther nan intfíangi,   \   in gilóuba gigiangi;
Verse: 25     Zi gilóubu sih giwánti,   \   thaz ínan ouh irkánti,
Verse: 26     odo inan éreti ubar ál,   \   so man gotes sún skal.
Verse: 27     Thie ínan thoh irkántun   \   joh múates sih biwántun --
Verse: 28     giéretạ er se in thén sind,   \   tház sie warin gótes kind.
Verse: 29     Ni quámun sie fon blúate   \   noh fon fléislichemo múate;
Verse: 30     sie wárun er firlórane,   \   nu sint fon góte erbórane.
Verse: 31     In búachon ist nu fúntan:   \   thaz wort theist mán wortan,
Verse: 32     iz ward héra in worolt fúns   \   joh nu búit in úns;


p. 44r    


Manuscript page: 44r 
Verse: 33     Wir sáhun sinaz ríchi   \   joh sina gúallichi,
Verse: 34     thaz was scóni al so frám,   \   so sélben gotes súne zam.
Verse: 35     Ist sin gúati ubar ál,   \   so in kinde zéizemo scál,
Verse: 36     then fater éinigan in nót   \   drútlicho mínnot;
Verse: 37     Follan gótes ensti   \   (sélb sọ iz man giwúnsgti!),
Verse: 38     wáres inti gúates *   \   joh drúhtines gimúates.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.