TITUS
Otfrid von Weissenburg, Evangelienbuch
Part No. 36
Previous part

Chapter: 3  
p. 44r    

III. RECAPITULATIO SIGNORUM IN NATIVITATE CHRISTI.


Verse: 1     Er quam uns súlih hera héim,   \   thes nist lóugna nihéin,
Verse: 2     thaz duent búah festi;   \   nu níazet mit gilústi.
Verse: 3     Tharána sint giscríbene   \   úrkundon mánage,
Verse: 4     drúta síne in alawár,   \   sélbo maht thu iz lésan thar;
Verse: 5     Wúntar filu mánagaz,   \   thaz wir iz bithénken thes thiu báz,
Verse: 6     thaz ward állaz mari,   \   theiz únfarholan wari.
Verse: 7     Wio mag sin méra wuntar,   \   thanne in théru ist thiu nan bár,
Verse: 8     thaz sí ist ekord éina   \   múater inti thíarna?
Verse: 9     Ni wárd sị io in gibúrti,   \   thiu io súlih wurti,
Verse: 10     in érdu noh in hímile,   \   thiu íamer sia irbílide.
Verse: 11     Maht lésan wio iz wúrti   \   zi theru drúhtines gibúrti,
Verse: 12     thaz éngil mit giwúrtin   \   iz kundta sar then hírtin;
Verse: 13     Joh theiz ni wás ouh bóralang   \   thaz hériskaf mit ímo sang;
Verse: 14     wio éngilo ménigi   \   fúar thar al ingégini.


p. 44v    


Manuscript page: 44v 
Verse: 15     Thie hírta irhúabun sih sár,   \   joh fúntun sie thaz kínd thar;
Verse: 16     gisíuni iz ni duálta,   \   so ther éngil in gizálta.
Verse: 17     Thie mági quamun gáhun,   \   thaz kíndilin sie sáhun,
Verse: 18     sie bráhtun imo in hánton   \   drésọ ir iro lánton.
Verse: 19     Sie quamun fílu ferro,   \   iz zéigota in ther stérro;
Verse: 20     wio mág thaz sin firlóugnit,   \   thaz hímil theru wóroltị ougit?
Verse: 21     Er kúndtạ uns thaz in alanót,   \   thaz ánderẹ uns ni zéinont,
Verse: 22     thaz góuma mann es námi;   \   bi thiu was er séltsani.
Verse: 23     Symeón ther gúato   \   joh Ánna quam gimúato,
Verse: 24     sie giangun kúsgo ingegin úz   \   thár zi themo gótes hus;
Verse: 25     Sie kúndtun thar then líutin,   \   thóh si es tho ni rúahtin,
Verse: 26     thaz ín was queman hérasun   \   ther gotes éinigo sun.
Verse: 27     Ther evangélio ouh giwúag,   \   wio man thiu kíndilin irsluag,
Verse: 28     wio kúrt in was thes líbes fríst,   \   tho siu irstúrbun thuruh Kríst.
Verse: 29     Maht lésan ouh hiar fórna,   \   wio er kóson bigonda
Verse: 30     wíslichen wórton   \   mit then éwarton.
Verse: 31     Thiu wórt thiu wurtun mári,   \   thoh er tho kínd wari;
Verse: 32     theru múater ságeta er ouh tho tház,   \   theiz állaz sines fáter was.
Verse: 33     Thie líuti irquamun hárto   \   Johánnis selbes wórto;
Verse: 34     ther lántliut al githágeta   \   thar er fon ímo sageta.
Verse: 35     Sie wúrtun ál giruarit,   \   in múate gidrúabit,


p. 45r    


Manuscript page: 45r 
Verse: 36     wánt er deta mári,   \   thaz druhtin quéman wari.
Verse: 37     Thaz sie zi ímo ouh gíangin,   \   sín ni missifíangin,
Verse: 38     then fíngar thénita er ouh sár,   \   quad: "thérer ist iz, thaz ist wár;
Verse: 39     Thérer ist iuer héili   \   joh sálida giméini;
Verse: 40     sit io wákar filu frúa,   \   joh thara gihábet iuih zua!"
Verse: 41     Ni wárd io ubar wóroltring   \   uns giwíssara thing,
Verse: 42     thaz iz ío sus wari   \   in érdu so mári.
Verse: 43     Thoh thisu wúntar ellu   \   wárin filu stíllu,
Verse: 44     ther búachari iz firlíazi   \   inti scríban ni híazi:
Verse: 45     Thaz ther fáter ougta,   \   thar man then sún doufta,
Verse: 46     thaz éina wari uns núzzi,   \   hábetin wir thie wízzi.
Verse: 47     In thiu wari uns ál ginuagi,   \   iz drági uns ni bilúagi,
Verse: 48     fon hérzen iz ni intfúarti   \   thiu unser úbarmuati.
Verse: 49     Sin selbes stímma sprah uns tház,   \   theiz sun sin éinogo was;
Verse: 50     wir eigun síne lera,   \   waz éiskon wir es méra?
Verse: 51     Ther selbo héilogo geist,   \   er óugta iz aftar ímo meist;
Verse: 52     er quam in ínan thaz man sáh,   \   tho ther fáter zi imo sprah.
Verse: 53     Nu ist drúhtin Krist gidóufit,   \   thiu súnta in uns bisóufit;
Verse: 54     thaz unsih ío sangta,   \   er ál iz thar irdrángta;
Verse: 55     Nu gárawemes unsih álle   \   zi themo féhtanne,
Verse: 56     ingegin widarwínnon   \   so skúlun wir unsih wárnon.


p. 45v    


Manuscript page: 45v 
Verse: 57     Thaz íst uns hiar gibílidot,   \   in Kríste girédinot:
Verse: 58     gibádost thu tharínne,   \   er widar thír io winne.
Verse: 59     Er fuar in éinoti,   \   ni déta er iz bi nóti;
Verse: 60     thar kórata sin sar hárto   \   ther selbo wídarwerto.
Verse: 61     Thaz dét er, thaz thu iz wéssis,   \   thih thára ingegin rústis,
Verse: 62     want er híar in libe   \   thin áhtit io zi nide.
Verse: 63     Bi thiu ílemes io gigáhon   \   zi then drúhtines ginádon,
Verse: 64     er unse wéga irwente   \   fon themo fíante;
Verse: 65     Er únsih ni bisoufe   \   áfter themo dóufe,
Verse: 66     joh íagilih biwénke,   \   thaz ér nan ni firsénke;
Verse: 67     Thes gináda uns scírmen,   \   joh wir nan ouh irbarmen,
Verse: 68     ther nan sélbo ubarwánt,   \   so thu thir hiar nu lesan scalt.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.