TITUS
Otfrid von Weissenburg, Evangelienbuch
Part No. 37
Previous part

Chapter: 4  
p. 45v    

IV. DUCTUS EST JESUS IN DESERTUM.


Verse: 1     Giléitit ward tho druhtin Kríst   \   thar ein éinoti ist,
Verse: 2     in stéti filu wúaste   \   fon themo gótes geiste.
Verse: 3     Er fasteta únnoto   \   thar níun húnt zíto,
Verse: 4     séhszug ouh tharmíti in wár;   \   so rúarta nan tho húngar
Verse: 5     Tho sleih ther fárari   \   irfíndan wer er wári,
Verse: 6     thaz zi irsúachenne ubar ál,   \   sélber ther díufal.
Verse: 7     Er tháhta odowila tház,   \   thaz er ther dúriwart wás,
Verse: 8     er íngang therera wórolti   \   bisperrit sélbo habeti;


p. 46r    


Manuscript page: 46r 
Verse: 9     Er thar niheina stígilla   \   ni firliaz ouh únfirslagana;
Verse: 10     then íngang ouh ni ríne,   \   ni si ékordi thie síne,
Verse: 11     Thier in themo éristen man   \   mit sinen lúginon giwan,
Verse: 12     mit spénstin sies gibéitta,   \   joh zi áltere firléitta.
Verse: 13     War imo súlih man thihéin   \   so quami wísheiti héim,
Verse: 14     thia lúchun wolt er fíndan   \   joh gérno nan giwínnan!
Verse: 15     Er wolta in álawari,   \   thaz ér ouh sín wari;
Verse: 16     tho ni wárd imo ther sánd,   \   ouh wiht thar sínes ni fand.
Verse: 17     Wíoz io mohti wérdan,   \   thaz wólt er gerno irfíndan,
Verse: 18     thaz mán io so gizámi   \   in thesa wórolt quami;
Verse: 19     Wio ér thar untar sínen   \   móhti thaz irlíden,
Verse: 20     thaz ér ekordi éino   \   lebeti so réino,
Verse: 21     Odo ouh únhono   \   sih drágeti so scóno
Verse: 22     (sprách er odo déta waz,   \   tház was al githíganaz);
Verse: 23     Fon wélicheru gibúrti   \   er io súlih wurti,
Verse: 24     war wórolt io giwúnni   \   sulih ádalkunni.
Verse: 25     Thoh ér ni wari gúater,   \   thoh giéiscotạ er thia múater;
Verse: 26     ni hórt er wergin mári,   \   wer ther fáter wari.
Verse: 27     Wanta ér nan harto fórahta,   \   in álla wisun kórota,
Verse: 28     bi thiu móht er odo dráhton,   \   in thésa wisun áhton:
Verse: 29     "Oba thíz ist thés sun   \   ther líuti fuarta hérasun


p. 46v    


Manuscript page: 46v 
Verse: 30     thuruh thaz éinoti   \   in mánageru nóti,
Verse: 31     Mit wáti si thar wérita,   \   fon hímile sie ouh nérita,
Verse: 32     bi mánagemo járe   \   sie prúantota tháre:
Verse: 33     Nu scephe er ímo hiar brót,   \   ther hungar dúit imo es nót,
Verse: 34     bílido nu in nóti   \   thes sines fáter guati!"
Verse: 35     Untar thésen ahton   \   joh mánagen gidráhton
Verse: 36     ni wán ih, imo brústi   \   grozara ángusti.
Verse: 37     Thoh er si úbiles so báld   \   (tház imo io zi scáden ward),
Verse: 38     thoh wán ih, blúgo er rúarti   \   thia míhilun gúati.
Verse: 39     Tho sprah er zị ímo in thésa wis:   \   "óba thu gotes sún sis,
Verse: 40     quid, these stéina thanne   \   zi bróte werden álle!"
Verse: 41     Nim góuma waz er wólti,   \   waz sulih béta skolti,
Verse: 42     waz Kriste scólti thaz brot;   \   ni wás imo es nihein nót!
Verse: 43     Uns érrent sine plúagi   \   bi járon io ginúagi;
Verse: 44     thoh bát er nan zi nóte   \   thia stéina duan zi bróte.
Verse: 45     Iz déta imo thiu fásta,   \   thaz ínan es gilústa,
Verse: 46     thoh wólt er in ther fári   \   irfíndan wer er wári.
Verse: 47     Thó quad Krist: "giscríban ist,   \   in bróte ginúag nist,
Verse: 48     noh in thíu ginuhti   \   zi thes ménnisgen zúhti;
Verse: 49     Thiu prúanta simo méra   \   theru drúhtines léra,
Verse: 50     thiu wórt thiu er irfínde   \   fon themo gótes munde."


p. 47r    


Manuscript page: 47r 
Verse: 51     Thánana er nan fúarta   \   in eina búrg gúata,
Verse: 52     fon then stétin thanana úz   \   zi themo drúhtines hús.
Verse: 53     Er ínan in thie wénti   \   sazta in óbanenti,
Verse: 54     thar ríaf er ímo filu frúa   \   thrato rúmana zúa:
Verse: 55     "Oba thu sís", quad, "gótes sun,   \   laz thih nídar hérasun
Verse: 56     in lúfte filu scóno,   \   so scal sún frono.
Verse: 57     Iz ist giscríban fona thír,   \   thaz faren éngila mit thír,
Verse: 58     sie thih biscírmen állan   \   joh thíh ni lazen fállan;
Verse: 59     Sie thín giwaro wárten   \   jóh thih harto hálten,
Verse: 60     thaz thin fúaz iowánne   \   in stéine ni firspúrne."
Verse: 61     Er spúnota, sosọ er wás,   \   thaz giscríb thaz er lás,
Verse: 62     er kérta iz iogilícho   \   zi Kriste lúgilicho.
Verse: 63     Iz méinit hiar then gotes drút   \   (in themo férsẹ ist iz lút),
Verse: 64     then éngila iogilícho   \   haltent blídlicho;
Verse: 65     Thaz imo wíht ni dérre,   \   thes wéges ouh ni mérre,
Verse: 66     odo ouh wíht ni duélle   \   then weg ther fáran wólle.
Verse: 67     Krist, ther drúhtin unser íst,   \   er ríhtit thaz in wórolt ist;
Verse: 68     ni bitharf thiu sín fuara   \   thero éngilo stiura.
Verse: 69     Ním nu gouma hárto   \   thes sátanases wórto,
Verse: 70     wialicha únredina   \   er zi ímo sprah hiar óbana.
Verse: 71     Ob er spráchi ubar ál,   \   so man zi gótes sune skál,


p. 47v    


Manuscript page: 47v 
Verse: 72     spráchi thanne in thésa wis,   \   thaz wári so gizámlih:
Verse: 73     "Oba thu sis gótes sun,   \   far thanne héimortsun
Verse: 74     hina ubar hímilạ alle;   \   so irkénnit man thih thánne."
Verse: 75     Thó sprah Kríst zi imo sár:   \   "giscríban ist in álawar,
Verse: 76     thaz mánnilih giwéreti,   \   selb drúhtines ni kóroti.
Verse: 77     Ih mag iz wóla midan,   \   mag hiar nídarstigan;
Verse: 78     ziu scal ih íowanne   \   gótes koron thánne,
Verse: 79     Thaz ih mih híar irréke   \   inti hina nídarscrikke,
Verse: 80     joh fare in lúfte thara zi thír?   \   sulih únthurft ist es mír!"
Verse: 81     Tho fúar er thuruh suórga   \   mit ímo hohe bérga,
Verse: 82     thar óugta in ánalihi   \   imo ellu wóroltrichi,
Verse: 83     Éra joh thiu ríchi   \   inti manag gúallichi,
Verse: 84     theiz wári mo gizámi   \   int imo in múat quámi.
Verse: 85     "Thiz lázu ih", quad, "zi hénti,   \   zi thíneru giwélti,
Verse: 86     in thiu thu nítharfalles   \   joh mih béton wolles."
Verse: 87     Er spénit unsih álle   \   zi míhilemo fálle
Verse: 88     in wórton joh in wérkon;   \   thaz múazin wir biwánkon.
Verse: 89     Then sálidon sie intfállent,   \   thie inan béton wóllent,
Verse: 90     joh thúltent siẹ in éwon   \   then mánagfaltan wéwon.
Verse: 91     Tho gab er imo ántwurti,   \   thoh wírdig er es ni wúrti,
Verse: 92     joh dét er thaz hiar ófto   \   filu mézhafto:


p. 48r    


Manuscript page: 48r 
Verse: 93     "Far hína, wídarwerto,   \   ni rúah ih thero wórto;
Verse: 94     in búachon ist irdéilit   \   joh álleswio giméinit.
Verse: 95     Thar íst gibotan hárto   \   sélben gotes wórto,
Verse: 96     thaz mán imo iogilícho   \   thiono fórahtlicho;
Verse: 97     Man óuh bidráhtoti,   \   er ánderan ni bétoti,
Verse: 98     in wórolti nihéinan,   \   ni si selbon drúhtin einan."
Verse: 99     Fuar ther díufal thana sár;   \   tho warun éngila thár:
Verse: 100     ni brást iro iowánne   \   imo zi thíononne.
Verse: 101     Ther díufal sin ni kórati,   \   furi mán er nan ni hábeti;
Verse: 102     thie engila quámun thuruh tház,   \   want er drúhtin iro was.
Verse: 103     Éllu thisu rédina,   \   wir híar nu scribun óbana,
Verse: 104     thaz ínan ther wídarwerto   \   grúazta thero worto --
Verse: 105     Ni quám iz in sin múat in war   \   (thaz ni mohta wésan sar),
Verse: 106     odo óuh thes hérzen guati   \   wiht ínnana birúarti.
Verse: 107     Ni móht er nan birúaren   \   noh wérgin ouh gifúaren;
Verse: 108     ouh sélbun theso férti   \   ni wúrtin, er ni wólti.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.