TITUS
Otfrid von Weissenburg, Evangelienbuch
Part No. 39
Previous part

Chapter: 6  
p. 49r    

VI. ITEM DE EODEM.


Verse: 1     Ih állaz, soso ih wólta,   \   tharfórna ni gizálta
Verse: 2     thaz unser mánagfalta sér;   \   bi thiu zéllu ih iu nu ịz híar mer.
Verse: 3     Tho drúhtin themo mán luag,   \   thes ih hiar óbana giwúag,
Verse: 4     óbaz theih hiar fóra quad,   \   thaz er mo hárto firspráh:
Verse: 5     Hárto sageta er imo tház,   \   thaz er mo bórgeti thiu baz;
Verse: 6     joh mit thráwon thuruh nót   \   iz filu wásso firbot.
Verse: 7     Quád, ob er iz ázi,   \   imo úbilo iz gisázi,
Verse: 8     joh ób er iz firslúnti,   \   fon dóthe ni irwúnti.
Verse: 9     Tház imo ouh ni wári   \   thaz gibót zi filu suári,
Verse: 10     jóh iz mohti írfúllen   \   mit gilústlichemo wíllen:
Verse: 11     Liaz ínan waltan álles   \   thes wúnnisamen féldes;
Verse: 12     núzzi thera gúati,   \   zi thiu er thíz gihialti.
Verse: 13     Thiu nátara iogilícho   \   spuan siu drúgilicho,
Verse: 14     tház sies wíht nintsázin   \   joh thaz óbaz azin.
Verse: 15     In tód, quad, ni gigíangin,   \   thoh siu tharazúa fiangin,
Verse: 16     noh bi thía meina   \   in fréisa niheina.
Verse: 17     Thaz ér iz ouh ni intríati,   \   zalta imo thia gúati,


p. 49v    


Manuscript page: 49v 
Verse: 18     quad, thánana in quami wízzi   \   joh mánagfalto núzzi.
Verse: 19     Quad, wúrtin thanne indániu   \   thiu óugun iro scóniu,
Verse: 20     joh gisáhin thanne tház,   \   thaz nóh tho siu firhólan was.
Verse: 21     Gilíh, quad, wurtin thánne   \   góton, nales mánne,
Verse: 22     joh thánne in iro brústin   \   gúat ioh ubil wéstin.
Verse: 23     Er was thes áphules fróu   \   joh uns zi léide er nan kóu,
Verse: 24     joh uns zi sére er nan nám;   \   waz wán ther wénego man?
Verse: 25     Zi wéwen wárd uns iz kund,   \   thaz er nan scóub in sinan múnd;
Verse: 26     want er nan kóu joh firslánt,   \   nu buen ánderaz lánt.
Verse: 27     Ward tho ménnisgen wé,   \   thaz er nan úz thoh ni spe,
Verse: 28     iz wídorort nirwánta   \   inti únsih so firsáncta.
Verse: 29     Inti ér er iz firslúnti,   \   theiz wídorort irwúnti,
Verse: 30     joh tház er es firléipti,   \   iz avur thára kleipti
Verse: 31     In then bóum thar si iz nám:   \   ni missigíangin wir so frám.
Verse: 32     harto wégen wir es scín,   \   thaz ér iz ni liaz in zít sin.
Verse: 33     Óba er iz firlíazi   \   ódo iz got bilíazi,
Verse: 34     ouh wórolt ni gigíangi   \   in thesa góringi.
Verse: 35     Ér gistuant uns méron   \   then mánagfaltan wéwon,
Verse: 36     bálo ther uns klíbit,   \   joh léidor nu ni líbit.
Verse: 37     Thia frúma er uns intfúarta,   \   wánt er nan birúarta;
Verse: 38     deta unsih úrwise   \   fon themo páradyse,


p. 50r    


Manuscript page: 50r 
Verse: 39     Fon scínenderu wúnni;   \   wáz er lewes wúnni!
Verse: 40     tho irfirta uns mér ouh thaz gúat,   \   thaz er lóugnen gistúat
Verse: 41     Thaz ér gigiang in bága   \   thera gótes fraga
Verse: 42     joh fon ímo iz wanta,   \   thaz wíb iz anazálta.
Verse: 43     Ob ér sih thoh biknáti,   \   jáhi sos er dáti,
Verse: 44     zaltiz állaz ufan síh:   \   ni wúrtiz alles so égislih;
Verse: 45     Íz irgiangi thánne   \   zi béziremo thínge,
Verse: 46     got ginádoti sin;   \   léidor, thaz ni scólta sin.
Verse: 47     Want er es thó ni ward biknát,   \   nu ist es béziro rat:
Verse: 48     tho santa drúhtin sinan sún   \   fon hímilriche hérasun.
Verse: 49     Ér io mán ni gisáh   \   thera mínna gimáh,
Verse: 50     thero wérko er uns irbót,   \   tho uns was hárto so not.
Verse: 51     Then gáb er ana wanka   \   bi únsih muadun scálka,
Verse: 52     thaz sin líaba houbit   \   bi unsih mánohoubit;
Verse: 53     Thoh Ádam ouh bi nóti   \   zi thiu éinen missidáti,
Verse: 54     thaz sulih úrlosi   \   fora gótẹ unsih firwási.
Verse: 55     Nu birun wir gihúrsgte   \   zi gotes thíonoste,
Verse: 56     wir wízun waz ther scádo was,   \   thaz wír got mínnon thes thiu báz;
Verse: 57     Joh bírumes mit rédinu   \   in zuívalteru fréwidu:
Verse: 58     nu wir thaz wízi miden   \   joh hímilriches bliden.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.