TITUS
Otfrid von Weissenburg, Evangelienbuch
Part No. 54
Previous part

Chapter: 21  
p. 68r    

XXI. QUOMODO SIT ORANDUM, ET DE ORATIONE DOMINICA.


Verse: 1     Óba thu ouh bigínnes   \   thaz thu zi góte thinges,
Verse: 2     ínti thu githénkes   \   thaz thin gibét wirkes:
Verse: 3     Thaz si in hérzen thanne,   \   thaz thír es wiht ni intfálle;
Verse: 4     gidóugno in themo múate,   \   theiz thír irge zi gúate!
Verse: 5     In hérzen si iz scono,   \   thaz iu es gót gilono,
Verse: 6     si ther githáng iu festi   \   ínnan theru brústi;
Verse: 7     Thaz io bi themo méine   \   thaz múat si fasto héime,
Verse: 8     then húgu in then githánkon   \   ni lázet wergin wánkon!
Verse: 9     Ni lazet fáran iu thaz múat   \   so then dríagarin duat;


p. 68v    


Manuscript page: 68v 
Verse: 10     úmbi kérit sih thaz múat   \   sélb so mo ther háls duat;
Verse: 11     Thaz duent sie állaz zi thíu,   \   ther liut se lóbo bi thíu,
Verse: 12     joh sie se éren thuruh tház;   \   bi thiu nist es wíht in thiu baz.
Verse: 13     Wéist thu weih thir rédinon:   \   thaz selba lób theist thaz lón;
Verse: 14     giwisso wízist thu thaz:   \   in thíu gisteit iz állaz.
Verse: 15     Thanne ir bétot, wizit tház,   \   duet iz kúrzlichaz,
Verse: 16     ni rúachit druhtin hárto   \   thero mánagfalton wórto;
Verse: 17     In hérzen betot hárto   \   kúrzero wórto
Verse: 18     joh lútoro tháre,   \   thaz iz gót gihore!
Verse: 19     Thaz lón laz imo állaz,   \   thaz thes gibetes si thiu báz,
Verse: 20     thaz thu in théra dati   \   ni firlíasest thie árabeiti.
Verse: 21     Ir ni thúrfut bi thíu;   \   got irkénnit in iu,
Verse: 22     ér ir imo iz zéllet   \   állaz thaz ir wóllet.
Verse: 23     Gináda sina grúazet,   \   so minu wórt iu iz súezent,
Verse: 24     mines sélbes lera   \   (ni thárf es wesan méra);
Verse: 25     Sos ih íuih ubar ál   \   hiar nu léren scal;
Verse: 26     firfáhent iogilícho   \   thiu iz allaz gáralicho:
Verse: 27     Fáter unser gúato,   \   bist drúhtin thu gimýato
Verse: 28     in hímilon io hóher,   \   wíh si námo thiner.
Verse: 29     Biquéme uns thinaz ríchi,   \   thaz hoha hímilrichi,
Verse: 30     thára wir zua io gíngen   \   joh émmizigen thíngen.


p. 69r    


Manuscript page: 69r 
Verse: 31     Si wíllo thin hiar nídare,   \   sos ér ist ufin hímile;
Verse: 32     in érdu hilf uns híare,   \   so thu éngilon duist nu tháre.
Verse: 33     Thia dágalichun zúhti   \   gib híut uns mit ginúhti,
Verse: 34     joh fóllon ouh, theist méra,   \   thínes selbes lera.
Verse: 35     Scúld bilaz uns állen,   \   so wír ouh duan wóllen,
Verse: 36     súnta thia wir thénken   \   joh émmizigen wírken.
Verse: 37     Ni firláze unsih thin wára   \   in thes wídarwerten fára,
Verse: 38     thaz wír ni missigángen,   \   thara ána ni gifállen.
Verse: 39     Lósi unsih io thánana,   \   thaz wir sin thíne thegana,
Verse: 40     joh mit ginádon thinen   \   then wéwon io bimíden. Amen.
Verse: 41     Ob ir in múat iu lazet,   \   thaz súnta ir io bilázet:
Verse: 42     so dilont síno guati   \   thio iuo míssidati;
Verse: 43     Ther thar afur só ni dúat   \   (lazet quéman iu iz in múat!):
Verse: 44     gizélit sint themo in thráti   \   allo thịo úndati.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.