TITUS
Otfrid von Weissenburg, Evangelienbuch
Part No. 55
Previous part

Chapter: 22  
p. 69r    

XXII. NEMO POTEST DUOBUS DOMINIS SERVIRE; ET: NON COGITANDUM IN CRASTINUM.


Verse: 1     Ni mag thaz mán duan nihéin,   \   thaz thiono héreren zuein,
Verse: 2     thaz er irfúlle io follon   \   bédero willon;
Verse: 3     Ni thúrfut ir bigínnan   \   thaz ír ouh megit bríngan,
Verse: 4     thaz ir góte thionot   \   joh thóh thia wórolt minnot.
Verse: 5     In múate sị iu giféstit,   \   thaz múases iu ni brístit;
Verse: 6     mit suórgon ouh ni rátet   \   mit wíu ir íuih wátet.


p. 69v    


Manuscript page: 69v 
Verse: 7     Fúrira ist thiu séla,   \   thaz múas ni si iu méra,
Verse: 8     thes líchamen dati   \   thánne sin giwáti.
Verse: 9     Séhet these fógala   \   thie hiar flíagent óbana:
Verse: 10     zi ákare sie ni gángent   \   joh ouh wíht ni spínnent;
Verse: 11     Thoh ni brístit in thes   \   (zi wáru thoh ginúages),
Verse: 12     ní sie sih ginérien   \   joh scóno giwerien.
Verse: 13     Biginnet ánascowon   \   thio frónisgon blúomon,
Verse: 14     thar líuti after wége gent,   \   thie in themo ákare stent:
Verse: 15     Sálomon ther rícho   \   ni wátta sih gilícho,
Verse: 16     thaz ságen ih iu in alawár,   \   so ein thero blúomono thar.
Verse: 17     Nu er tház so wilit wérren,   \   thaz míthont scal irthórren,
Verse: 18     thie fógala ouh zi wáre,   \   thie íu sint úndiure:
Verse: 19     Wio harto míhiles mer   \   suórget druhtin íuer?
Verse: 20     thu mo líabara bist   \   thanne al gifúgiles thaz ist.
Verse: 21     Er gidúit (thaz thu wéist)   \   thaz thu nákot ni geist,
Verse: 22     joh ouh gíbit thir thia wíst   \   thu húngiru nirstírbist.
Verse: 23     Gidúan ni mahtu in wára   \   thih mínniron noh méra,
Verse: 24     hár nihéin, hugi ouh thés,   \   thu iz álleswio gifárawes.
Verse: 25     Bi thiu laz thia suórga (theist es gúat)   \   themo thih súlichan giduat,
Verse: 26     mit wáti er thih io wérie   \   joh émmizigen nérie.
Verse: 27     Er wéiz ana zuíval,   \   thaz ir es bithúrfut ubar ál,


p. 70r    


Manuscript page: 70r 
Verse: 28     ni múgut ouh firlázan,   \   nị ir súlih sculit níazan.
Verse: 29     Súachet io mit máhti   \   thes hímilriches ríhti;
Verse: 30     iu biquímit, ih sagen iu tház,   \   thaz ándaraz állaz.
Verse: 31     Nist iuer nihéin (thaz ist wár)   \   so hárto sulih dúfar,
Verse: 32     thin kínd thih bitte brótes,   \   thaz thu mo stéina bietes;
Verse: 33     Ouh gibórges thu thés,   \   bítit er thih físges,
Verse: 34     ni biutist thía meina   \   nátarun nihéina;
Verse: 35     Ni bíutist ouh in wára   \   scórpion (thia zála),
Verse: 36     harto bórgest thu thés,   \   bítit er thih éies.
Verse: 37     Nu ir bírut thes giwón,   \   ir frúma gebet kíndon,
Verse: 38     joh ál thaz in líchet,   \   thaz ír se ni bisuíchet:
Verse: 39     Wio harto míhiles mer   \   gíbit druhtin íuer
Verse: 40     gúat, ob ir mo fólget   \   joh inan bítten wollet?
Verse: 41     Bittet ágaleizo   \   joh hárto filu héizo:
Verse: 42     thaz ságen ih iu in alawár,   \   thia fruma gíbit er íu sar.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.