TITUS
Otfrid von Weissenburg, Evangelienbuch
Part No. 56
Previous part

Chapter: 23  
p. 70r    

XXIII. OMNIA QUAECUNQUE VULTIS UT FACIANT VOBIS HOMINES; ET: CAVENDUM A FALSIS PROPHETIS.


Verse: 1     Nu léru ih íuih hárto   \   kúrzero wórto,
Verse: 2     wio ír giduet fóllon   \   then drúhtines wíllon.
Verse: 3     Ni dúa (zéllu ih thir éin)   \   widar mánno nihein
Verse: 4     wíht in worolti álles,   \   ni so thu thír wolles;
Verse: 5     Mit thíu ir thanne irfúllet   \   thaz fórasagon síngent,


p. 70v    


Manuscript page: 70v 
Verse: 6     joh wírket iogilícho   \   then wizod fóllicho.
Verse: 7     Wártet iu io hárto   \   fon dríagero wórto,
Verse: 8     fon fórasagon lúggen;   \   thes scúlut ir io gihúggen.
Verse: 9     Sie sínt iu in ánaratin   \   in scáfinen giwátin,
Verse: 10     thar buent ínne in wáre   \   wólva filu suáre.
Verse: 11     Ni múgun sie iu wánkon,   \   séhet zị iro wérkon,
Verse: 12     joh in álathrati   \   scówot iro dáti;
Verse: 13     Ni dúit man untar mánnon   \   thaz thrúbon lese ir thórnon,
Verse: 14     in hiafon fígon thanne,   \   thóh man es bigínne.
Verse: 15     Úbil boum birit tház   \   thaz ímo ist io gisláhtaz;
Verse: 16     so dúat ouh ther gúato,   \   iz límphit so gimúato.
Verse: 17     Then úbilon sie brénnent,   \   iz mán ouh al so wóllent;
Verse: 18     then gúaton áfur ana wan   \   lázent sie mit frídu stan.
Verse: 19     In hímil al ni géngit   \   (joh iz gót ni hengit,
Verse: 20     iz wírdit noh giwéizit!)   \   thaz mih drúhtin heizit;
Verse: 21     Giwisso wízit ana wan:   \   thie lázit man thar íngan
Verse: 22     thie híar giwirkent fóllon   \   mines fáter willon.
Verse: 23     Ih ságen iu in alawár:   \   klagont mánage sih thár
Verse: 24     mit séren mánagfalton   \   joh léidlichen wórton;
Verse: 25     Quit íogilih in thráti,   \   thaz er zéichan dati
Verse: 26     in mínes namen námati,   \   thaz ih thoh thés gihogeti.


p. 71r    


Manuscript page: 71r 
Verse: 27     Ih zéll in thanne in gáhun,   \   thaz sie mir kúnd ni warun,
Verse: 28     theih er sie hál ju lango,   \   ni rúach ih iro thíngo:
Verse: 29     Fare in álethrati   \   so wer so io úbil dati,
Verse: 30     fon mír in alagáhe,   \   joh sih mir ni náhe!"


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.